Euskal Gaizkileak podcastaren atal berrien estreinaldia

2022-03-07 09:02
ZuZeu Podcast
- Podcast

Euskal Gaizkileak podcastaren atal berrien estreinaldia –

Duela hiru urte podcastgintzan murgildu ginen burubelarri ZuZeun, eta ZuZeu Podcast sortu. Euskal Gaizkileak seriea da sortu genuen lanetako bat, eta etenaldi luze baten ondoren, plazerra da guretzat atal berriak estreinatuko ditugula jakinaraztea.

Spotify ApplePodcast GooglePodcast ivoox amazonmusic listennotes

2019ko neguan ikusi zuen argia Euskal Gaizkileak serieko lehen atalak, eta azkena 2020ko urtarrilean plazaratu genuen. Zortzi atal izan ziren orora. Gure herrian gertaturiko krimen ugarik abesten ditugun kantuetan gordeta biziraun dute, urte luzeetan zehar. Hasier Etxeberriak, horretaz jabetuta, artikulu serie bat hasi zuen, eta bere heriotzaren ondoren lan bera egiten jarraitu zuen Beñat Hach Embarekek. Podcastak sortzen hastean ZuZeutik apustu handia egin zen Euskal Gaizkileak aurrera ateratzeko, eta bidelagun izan genituen BIEUSE (Bikoiztaile Euskaldunen Elkartea) eta IN Estudioak-eko Iñigo Etxarri.

Gurea bezalako hedabide txiki batentzat proiektu handia da esku artean daukaguna, eta horregatik luzatu da geldialdia nahi genuena baino gehiago. Baina lan askoren ostean itzuli gara, eta lau atal berri dakartzagu esku artean, lau urre pipita. Oraingoan ere, zorionez, bidelagun berdinekin. Hurrengo astelehenean, martxoaren 14ean, hasiko gara atal berriak estreinatzen, astelehenero bat.

Euskal Gaizkileak podcastaren atal berrien estreinaldia

Baratariako erregeak, Lafitte anaiak

Gidoia eta zuzendaritza: Beñat Hach Embarek
Bikoizketa zuzendaria: Xabier Alkiza, BIEUSE
Grabaketa, soinu diseinua eta musika konposaketa: Iñigo Etxarri, IN Estudioa
Abestia: “Lafitte izena”. Hitzak eta musika: Jurgi Ekiza
Aktoreak: Aintzane Gamiz, Mikel Garmendia, Aintzane Crujeiras, Joseba Sacristan, Mikel Mendizabal, Xabier Alkiza eta Kiko Jauregi.

Lafitte anaien inguruko lehen berriak etxe honetan bertan irakurri ahal izan genituen Joseba Aurkenerenaren eskutik. Josebak urteak daramatza igandero ZuZeun artikulu txukun askoak publikatzen, eta eskerrak eman nahi dizkiogu, egiten duen lanarengatik orokorrean, eta Baratariako errepublikaren berri emateagatik bereziki.

Bestetik, zinez estimatzen dugu Jurgi Ekiza musikariak enkargatutako lana prestatzeko eskaini digun denbora eta mimoa. Ez dugu Lafitte anaien inguruko bertsorik aurkitu, eta horregatik eskatu genion baionarrari kantu baten egitea.