HernaniKomik azoka eta jaialdiaren bigarren edizioa ospatuko da datorren asteburuan, azaroaren 17 eta 18an. Euskarazko komikigintza erdigunean jartzeko intentzioarekin sortu zuen iaz HernaniKomik Hernaniko Udalak, udal liburutegiaren bultzadarekin. Euskara hutsezko komikigintzari eskainitako azoka bakarra da Euskal Herri mailan.

Gaurko aurkezpenean, Aitor Huizi Kultura zinegotziak eta Ainara Aiestaran liburutegiko arduradunak HernaniKomiken parte hartuko duten zenbait sortzaile izan dituzte laguntzaile: Ainara Azpiazu Axpi; Mikel Begoña; Dani Fano; Gregorio Muro; Koro Muro; Jon Zabaleta eta Alai Zubimendi.

Mikel Begoña komikigileak azaldu duenez, “komikiaren eragile ezberdinak auzolanean ibili gara hau guztia antolatzen. Jaialdi honek daukan balio inportante bat da euskal komiki munduak daukan aniztasuna kontuan hartuz zubiak eraikitzen dituela eragile ezberdinen artean”.

Bederatzi komiki aurkezpen

Aurtengoan ere, azoka eta komiki aurkezpenak izango dira HernaniKomiken muina. Euskal komikigintzaren nobedadeen erakusleihoa izango da Atsegindegi plaza hilaren 17an eta 18an. Egun osoko azoka izango da bi egunetan eta 10 postu egongo dira bertan: Ataramiñe; Denonartean; Dobera; Elkar; Harriet; Hernani Errotzen; Herrima; Gaueko; Sare antifaxista; Xabiroi-Ikastolen Elkartea; Udalbiltza eta UNRWA Euskadi.

Bederatzi komiki-aurkezpen izango dira, egileen presentziarekin. Tartean, sortzaile hernaniarrek ere parte hartuko dute.

Ikasleentzako komiki-tailerra ere zuzenduko du Ainara Azpiaxu Axpi-k,  Hernaniko Institutuko DBH 2. mailako ikasleekin. Zuzenean marrazteko saioak ere izango dira.

Aurtengo kartela Jon Zabaleta hernaniarrak egin du.

Juan Luis Landarentzako, Joseph Camino saria

Komikigintzan egindako ibilbidea aitortzeko Joseph Camino saria aurtengoan Juan Luis Landa komikigile errenteriarrak jasoko du. 40 urteko ibilbidea egin du komikigintzan. Ipurbeltz, Gabai  edota Irati gisako komiki ezagunen atzean dago Landa. Komikigintzatik aparte, ilustrazio eta marrazki bizidunen munduan ere aritutakoa da. Nazioartean errekonozitutako egilea da.

Gainera, aurten nobedade gisa, hilaren 17tik 30era bere lanen erakusketa ikusgai izango da Biteri Kultur Etxean. Era berean, Landaren Orreagako kronikak abiapuntu hartuta, udal liburutegian komiki-erakusketa bat atonduko da, Wasconicam perfidiam, Orreagako guduaren inguruan marraztu diren lanak biltzeko.

EGITARAUA: