Zumadia zaindu –

Zumadia Eskolako familiak arduratuta gaude, ikasle kopuruaren igoeragatik gure eskolak bizi duen espazio falta dela eta. Espazioa funtsezkoa da kalitatezko hezkuntza bermatzeko. Gure eskola bost talde izateko eraiki zen (bi Haur Hezkuntzan eta hiru Lehen Hezkuntzan). Irailaren 1ean zortzi talde izango ditugu espazio horretan, eta agerikoa da baldintza horietan hezkuntza proiektua ezin dela fundamentuzko kalitate parametroetan garatu. Horretaz gain, hurrengo bost ikasturteei begira egiten dugun aurreikuspenak esaten digu errealitate berberarekin jarraituko dugula.

Hilabete ugari igaro dira Hezkuntza Departamentuan honen berri izan zuten lehen alditik; sobera denbora, erantzun ofizialik jaso gabe jarraitzen dugula kontutan izanda. Ez dute Eskola Kontseiluak Gil Sevillano zuzendari nagusiari eskatutako bilera onartu ere egin.

Familiok oso garbi daukagu, gure eskolako profesionalek Hezkuntza Departamentuari behin eta berriz azaldu gisan, hezkuntza jasotzeko espazioa nahitaezko baldintza dela hezkuntza praktika duin baterako. Horregatik, gure komunitatea osatzen duten eragileekin batera, erantzun urgente bat exijitzen diogu Nafarroako Gobernuari, hezkuntza espazioa zabaldu eta proiektuaren ageriko arrakasta soziala egonkortzeko. Biztanleria galtzeko joera pairatzen duen landa eremu honentzat, berebiziko garrantzia duen osagaia da eskola.

Duela hiru ikasturte ekin genion gure ibilbideari Abartzuzako instalazio berrietan, eta hasieratik moldatu behar izan gara ikasle kopuruaren etengabeko igoerak eragin duen espazio faltara. Egoera honek agerian uzten du eskolak eremu honetan daukan babes soziala (Abartzuzan, Gesaltzen, Lezaunen, Jaitzen eta Deierrin).

Arazo hau konpontzeko daukagun borondatea eta elkarlanerako prestutasuna jarri nahi ditugu berriz mahai gainean. Era berean, eskola honen alde eta berau egonkortzearen mesedetan lan egiteko konpromisoan berresten gara. Landa eremu honek hala eskatzen du, eta hala behar du.

Horretarako elkargune eta lan tresna izango den plataforma bat osatu nahi dugu. Gure xedea Zumadia Eskola zaintzea da, eta zonaldeko eragileei gurekin bat egiteko gonbitea luzatzen dizuegu.

Zumadia eskola zaindu!

Zumadia zaindu