Euskarazko hedabideen kontsumoa

Euskarazko hedabideen kontsumoa

Gorka Salcesek Euskaldunak komunikabideen aurrean: iritzien, ohituren eta jarreren azterketa kualitatibo eta kuantitabioa izeneko tesia defendatu berri du EHUn. Zientzia Kaiera agerkari digitalean ikerlariak egindako lanaren zertzeladak agertu dituzte, eta salabardoak bertatik jaso ditu.

.

Euskaldunak eta euskarazko hedabideen kontsumoa

Euskaldunen hizkuntza-gaitasunak zein -erabilerak, hizkuntzarekiko motibazioak, aldagai soziodemografikoek, hizkuntzaren tokian tokiko egoerak, erabiltzaileen identitateak eta hedabideen eskaintzak euskarazko komunikabideen kontsumoan eragiten dutela ondorioztatu du ikertzaileak.

Euskarazko hedabideen kontsumoaEuskarazko komunikabideek “erronka bikoitzari” aurre egin behar diotela azaltzen du ikerlanean Gorka Salcesek: “Alde batetik, mundu mailako krisia bizi dute komunikabideek, bat-batekotasunean oinarritutako ohitura komunikatiboak eta doako edukiak orokortzearen ondorioz. Bestetik, euskal hiztunen tipologia asko ugaritu da azken hamarkadetan, eta, hortaz, identifikatzen errazagoa zen publiko potentzialarentzako produktuak sortzetik ezaugarri jakin batzuei lotzen zailagoa den komunitate bati zuzendutako produktuak ekoiztera igaro dira euskarazko hedabideak”.

Hala, euskaldunen iritziek, ohiturek eta jarrerek kontsumoan izan dezaketen eraginaz jabeturik, proiektuak “aldagai horien nolakotasuna eta jatorria identifikatzea” izan du xede, etorkizunera begira sektoreak bere publiko potentziala hobeto ezagutu eta estrategia berriak jorra ahal ditzan.

Kontsumoaren aldetik, besteak beste, erdarazko komunikabideek Euskal Herriko panorama mediatikoa menderatzen dutela zehaztu du ikertzaileak. “Prentsaren esparrua, zehazki, monopolistikoa izatetik gertu dago. Hala, komenigarria litzateke galdetzea zeintzuk diren erdarazko prentsak monopolioa mantentzearen arrazoiak. Eta zer egin beharko lukeen administrazioak bi hizkuntza ofizialen arteko berdintasuna bermatzeko, baita komunikabideen arloan ere”.

Etorkizunean euskarazko hedabideen bilakaera nolakoa izango den tesiaren planteamenduetatik kanpo gelditzen den arren, ikertzaileak uste du gaur egungo euskarazko komunikabideen sektorea “jasangarria badela erakutsi duela (ahalegin handiaren eta soldata baxuen truke, maiz)”, eta azken urteetako joera proiektu berriak sortzekoa eta eduki- zein lurralde-hutsuneak betetzekoa izan dela. “Nire iritziz, hori da bidea, baina bitartekoak ere jarri behar dira gutxieneko garapen aukerak emateko hedabide berri horiei”, ohartarazi du.

Gorka Salcesek “Euskaldunak komunikabideen aurrean: iritzien, ohituren eta jarreren azterketa kualitatibo eta kuantitabioa” izeneko tesia defendatu berri du EHUn.Euskarazko hedabideen kontsumoa
komunikabideak
Salabardoa

Sarean, han eta hemen argitaratzen direnak harrapatzen ditut, gure interesekoak direlakoan.

5 pentsamendu “Euskarazko hedabideen kontsumoa”-ri buruz

  • JJ Agirre

    “Komenigarria litzateke galdetzea zeintzuk diren erdarazko prentsak monopolioa mantentzearen arrazoiak. Eta zer egin beharko lukeen administrazioak bi hizkuntza ofizialen arteko berdintasuna bermatzeko, baita komunikabideen arloan ere”.
    Administrazioak egin behar luke hausnarketa hori, bai, baina ez du egingo. Ez zaio komeni.
    Zorionak tesiarengatik. Oso itxura ona dauka.

  • Gorka Salces
    Gorka Salces 2016-05-11 11:03

    Eskerrik asko! Uste dut arrazoi historikoak edo egiturazkoak badaudela erdarazko prentsaren nagusitasuna azaltzeko. Hizkuntza hautuak kontsumo mediatikoan islatzen dira, gehienetan. Haatik, hedabideak inguruneak zeharo baldintzatuta egon arren, arazo formalak (edukizkoak) ere identifikatu ditut. Alegia, asmatu behar da publikoaren nahietara egokitzen, eta ez da beti lortzen (ahal).
    Edozelan ere, erakundeek pentsatu beharko lukete hedabideen arloko inbertsioak (dirulaguntzak zein publizitate instituzionala) informazio aniztasuna eta euskararen biziberritzea sustatzeko erabiliko dituzten, edo, ostera, aurrekontua egungo kontsumo errealitatearen arabera banatzen dela argudiatuz sasi-monopolio horiek elikatuko dituzten. Bestalde, kontsumoaren neurketak Euskal Herriko ezaugarri demografiko, linguistiko eta mediatikoetara egokitu beharko litzatekeela ondorioztatu dut, baina hori beste istorio (luze) bat da…

  • BERRIA eta ARGIAren datu negargarriak. 2016-05-11 12:17

    Zergatik ditu ZuZeu-k iruzkin eta eztabaida gehiago BERRIA edo ARGIAk baino?
    Ba, argi dago, beste medio horietan zentsura itzela ezarria dutelako.
    Eztabaidak erakargarriak dira eta trafiko ugari eragiten du. ZuZeu oso erakargarria da eta baliabide eskasagoak ditu.

    Gainera, BERRIA eta ARGIA nekagarriak dira, beti gai batzuekin buelta eta buelta, beste gai batzuk ikutu ere egiten ez dituzten bitartean. Guztiz ideologizatuak daude. Progreegiak dira.
    Gainera, gehio pentsatzen dute diru-laguntzetan erakargarritasunean baino.
    Horrek ere eragiten du euskal medioen datu negargarrietan.

    • Bete betean asmatu duzu! Aspaldidanik pentsatzen nuena esan duzu eta penagarria da hedabide horietako parte hartze eza hori, salbuespen bakan batzuetan izan ezik. Eskertzekoa litzateke Berrian eta, hemen ematen diren parte hartzeak edo ugariagoak emango balira, baliabideak izan, badituzte eta!!

  • JJ Agirre

    Eskerrik asko zuri, sarean jartzeagatik. Irakurriko dut, bai horixe.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude