Katalunian

Irailaren 11n Bartzelonara iritsi naiz eta gogoratu dut iaz ere, gaurko egunez, hemen izan nintzela. Orduan ezustean harrapatu ninduen ikusi nuenak: Diada ospatzen ari ziren eta kaleak senyeraz beteta zeuden. Gaur ere horrela aurkitu ditut.

Konparazioak egitea ez da bidezkoa izaten beti, batzuetan bidegabekoa da, baina naturalki atera zait oraingoan. Gogoratu dut azken urtean Kataluinean egin diren independentziaren aldeko erreferendumak. Gogoratu dut uztailaren 10ean Estatut-taren garapenari jarritako trabak denuntziatzeko (eta independentzia aldarrikatzeko) bertakoek egin zuten manifestazio erraldoia. Gogoratu dut hona etorri naizen guztietan izan dudan atsegina toki guztietan katalana entzutean. Gogoratu ditut webean katalanez aurkitzen ditudan eduki didaktiko ugariak. Eta inbidia sentitu dut.

Halako batean, gaur goizean etxetik alde egitean ikusitako azken irudia gogora etorri zait: Realeko bandera bizilagunen lehioetan. Hori izango ote da gure identitatea?

Ikurrina, Katalunia, senyera
Arantza San Sebastian

ITSASGORAN - Irakaslea ofizioz, Idazlea afizioz

Zer duzu buruan “Katalunian”-ri buruz

Utzi erantzuna

Zure e-posta helbidea ez da argitaratuko. Beharrezko eremuak * markatuta daude