(Ez dakit nola esaten den euskaraz viral eta Elhuyar hiztegira jo dut ikasteko: biral. Ederki, ba, biral esango diogu aurrerantzean geuk ere, nahiz eta B batzuk egundoko mina egiten diguten begietan, bideo hitzaren B horren antzera. Bedi, beraz, biral.)

Kontua da publizitate birala, gaur egunean hain erabilia den elur-bola hori,  geuk ere frogatu nahi izan dugula. Helburua Digitalak ekoiztetxeak ETBrentzat eginiko bost euskal sukaldariren dokumentalen berri Espainian lau haizetara zabaltzea zen, eta nago, nolabait lortu dugula. Gente digital delakoak dioenez, ikusienen artean ibili da gure albistea, idazpuru edo titular hori-horia jarri baitzioten Soitu-koek: La bronca de Arzak y Adriá por una anchoa. (Milioi bat erabiltzailetik gora ei du Soitu-k.)

Dokumental horiek emanak ditu euskaraz ETB3k eta aurki izango dira, gaztelaniaz, ETB2n. Telebista merkatuetan ibiltzeko asmoa ere badu, serie honek. Ikusi egin behar biralaren kontu honek onik ekarriko dion ala ez. Baiezkotan nago.