antxoa frijituak

Kanpaina betean gaude eta, tamainaren arabera, sei euro t’erditik behera aurkituko duzu antxoa kiloa arrandegian. Garbituta zerbitzatuko dizkizute, gainera.

Estrenatu berri dugun Pagotxa erReZetategian, oraingoz bi modutan proposatzen dizkizugu antxoak, etorriko diren arren gehiago. Bi horietatik, ordea, errezeta bakarra hautatu nahi dugu astebururako proposamen gisara: antxoa frijituak.

Plater erraz-erraza da, bideoan ikus dezakezunez. Ematen dizkizugun pausoak jarraituz kuzina ditzakezu antxoak, hogei minutu aski eta gehiegi izango dituzu. Puntuan egitea da kontua, tamainan frijitzea. Zu ez zara damutuko eta zeure ingurukoak ere ez. On egin.

…

Antxoa frijituak

 

Antxoa garaia denean,  gutxi izaten dira halako gutiziak baldin eta bi gauza hartzen badira kontutan: arraina fresko-freskoa izatea eta ez gehiegi egitea. Tamainan behar du guztiak. Gurean martxo aldera hasten da kanpaina eta hegaluzearenarekin batera, garrantzizkoena da gure arrantzaleentzat. Hori bai, oso maiz, antxoatara irten arren, sardina edo txitxarroarekin bueltatu beharra izaten da.

 

Osagaiak:

• 28 antxoa, bururik eta triparik gabe
• Oliba olioa, 0,4º
• 6 baratxuri ale
• Gatza eta Kaienako pipermin bat
• Perrexil xehatua (nahi izatera)

 

Errezeta:

1. Baratxuri hortzak zuritu eta zati txikietan moztu. Zati hauek, katilu batean oliba oliotan gorde.
2. Antxoa garbitu, buru eta triparik gabe utzita baina xerrak bizkarrezurretik banatu gabe. Ur txorrotada fin batez lagundu.
3. Hiru hatzeko sakonerako olioa jarri berotzen zartagin batean.
4. Antxoei gatza egin.
5. Olio-baratxuri goilarakada haundi bat gehitu berotzen ari den olioari eta baratxuria olio gainera igotzen denean (edo gainean bir-birrean geratzen bada) antxoak gehitu. Hauek bitsadera baten laguntzaz oliotan mugitu 10-15 segunduz eta oliotik atera plater gainera.
6. Platerean, erretako baratxuriez gaineztatu eta, nahi izatera, eta perrexila hautseztatuko dugu ondoren haien gainean.

 

Dastatzeko gomendioak:

• Gustuko den ogi zati baten gainean antxoak ipini, beren olioaz ogia busti dadin.
• Banaka banaka isatsetik buru aldera tira eginez xerratu eta dastatu.
• Amaierarako, ogiak antxoen berezko olio guztiaren zaporea hartuko du. Hau da mokadurik onena.

 

Kasu!

Olioa ongi berotzea eta baratxuriak gero eranstea, horra berealdiko garrantzia duen zerbait. Antxoak batera eta denbora-tarte txikian frijituko dira horrela egiten badugu. Oker jokatuko genuke olioa baratxuri xerrekin batean berotu nahi izan bagenu: baratxuriak gorrituko lirateke eta olioak ez luke antxoak frijitzeko adina tenperatura izango. Gaizki frijiturik eta bera-bera geratuko litzaizkiguke seguruenik antxoak.

Antxoa garaian, bertako antxoak zapore eta testura hobea du kanpokoak baino. Urtearen araberakoa da garaia, baina normalki, apirilaren erdialdera hasi eta ekainean amaitzen da.

Antxoak omega 3 eta 6 gantza du. Osasunerako aberasgarria dena.

On egin!

antxoa frijituak