Saharako Errepublika Arabiar Demokratikoa –

Gaurko egunez, duela 48 urte, Saharako Errepublika Arabiar Demokratikoa sortu zen. Urteurren horren harira, euren lurraldetik egotziak izan ziren sahararren egoera larria ekarri nahi dut gogora. Urte luze hauetan zehar Mendebaldeko Saharako Herriaren askatasunaren eta burujabetzaren aldeko aldarrikapen hori Nazio Batuen eta bere Segurtasun Kontseiluaren ebazpenek eta aginduek sostengatzen duten arren, ez da oraino bete. Gainera, duela bi urte luze, berriz ere, Marokoko Erresumaren eta Fronte Polisarioaren arteko gerra berpiztu egin zen.

Sahararen historiaz eta gaurko errealitateaz liburu ezin interesgarriago bat idatzi berri du Lizarrako Kristina Berasainek, Sahara: Herri bat erresistentzian. Liburua asteazken honetan aurkeztuko dugu Nafarroako Liburutegian, arratsaldeko 7etan eta, Mendebaldeko Sahararen borroka zilegi eta zuzenaren aldeko gure engaiamenduaren adierazgarri, Berriako kazetari Kristina Berasainek berak eginen du.

Kristina Berasainek liburuaren hitzaurrean dioskunez, “Liburu guztiak bezala, hau ere bidaia bat da, erresistentzian ari den herri batera egindako bidaia. Zenbat eta gehiago jakin, orduan eta gehiago konturatzen zara zer gutxi dakizun, eta beti da xarmagarria elezahar berri bat entzutea, gerrako pasarte bat, exodoaren pasadizo bat edo oharkabean pasatu zaizun datu edo xehetasun bat”.

Sahara: Herri bat erresistentzian; ezinbesteko hitzordua dugu asteazken honetan, 7etan, Nafarroako Liburutegi Nagusian, zeren eta asko dugu sahararrengandik ikasteko.

Saharako Errepublika Arabiar Demokratikoa