Harearen pisua –

Harea-erloju baten bidez irudikatu ohi da denboraren joana. Urteak joan, urteak etorri, Saharako Errepublika Arabiar Demokratikoak 49 urte bete berri ditu otsailaren 27an. Urte hauetan guztietan, harearen pisuak ez du estali Saharako populuaren askatasun-nahia eta justiziaren aldarrikapena.

Harea-erlojuaren hondar aleek ezin izan dute estali duela mende erdi bat Espainiaren abandonua eta traizioa, Madrilgo paktuak sinatu zirelarik sahararrei galdetu gabe ere, Nazioarteko legediei muzin eginda, justiziari iseka eginez, harreman historikoak ahazturik eta saharar gehienen borondatea kontuan hartu gabe.

Mendebaldeko Saharatik bortxaz egotziak, Tindouf-eko errefuxiatuen kanpamentuetan, harea-ekaitz klimatiko eta politikoak gorabehera, sahararrak kapazak izan dira estatu bat eraikitzeko, gaur ospatzen dugun Saharako Errepublika Arabiar Demokratikoa.

Saharako estatua populuaren partehartze zuzenarekin eraiki da eta guk, elkartasunaren bidez, ezen ez karitatea, laguntzen dugu eraikitzen: egun, errefuxiatu kanpamentu bakoitzean bibliobus eta liburutegi bana dute, Saharako liburutegi sare nazionala osatzen dutelarik, jakinik ere basamortuko liburutegi horietan, Saharako Kabia horietan, Saharako populuak berak duela erabakimena eta protagonismoa, eta guri dagokigula gure engaiamendua biderkatzea eta laguntzari eustea.

Harea-erlojuak salatzen du denbora bukatu zaidala eta, amaitzeko, lagun sahararrentzat hain berezia den Ramadanean gaudelarik, —Ramadan Karim, Ramadan mubarak— zorioneko hilabetea izan dadila zuentzat eta zuen senideentzat.

Harearen pisua