Ezustekoak bete-betean Donostiako udala jo zuen M22an. Irabazleen poza galtzaileen tristuraren parekoa izan zen. Ordutik hona alderdiak mugimenduz beteriko xake jokoari ekin diote. Amaiera ez da heldu, galtzailea argia da, ordea. Partidaren orain arteko mugimenduak biltzen dira hemen.

Hogei urtean alkate izandakoak hozkirri urduria sentituko zuen igande hartan. Bere burua hiriaren sinbolo eta gidari bilakatzen saiatu zen horrek galtzear zuen hegemonia. Ustekabean gainera, inork gutxik emango zuen beste alkategai batengatik hurrik. Bilduk, 8 zinegotzi eta 1.500 boz gehiago. Hortik aurrerakoak bata bestearen atzetik etorri dira. Eta gehiago etortzeko daude ekainaren 11 arte.

• Fitxa Bilduk mugitu zuen, irabazleak, eta elkarrizketak martxan jartzea erabaki.
• Odon Elorzak lehenbizi bere hitza irentsi zuen. Lehen indarra ez izanagatik ez zion gobernatzeari uko egin. Oraindik galdu egin zuela sinestu ezinda.
• Egoera asmilitu baino lehen Bilduren aurka hautsak harrotzeko apustua egin zuen, baita Facebooken ere. “Denak Bilduren aurka” leloa bere egin zuen.
• EAJk aurpegia eman eta berehala zaplasteko politikoa jaso zuen Odon Elorzak. Alkate izan ala ez EAJren esku zegoen, eta ezetz esan zuten: “Elorza ez da alkate izango”. Burujabe eta boteredun izateari utzi zion. Errealitatearen horma jo zuen.
• Bitartean, Juan Karlos Izagirre hautagai irabazleak hitza hartu zuen. Elorzaren zikloaren amaiera ospatzen segitu zuten askok.
• Elorzak zinegotzi karguari uko egin eta PSEk alkategai berria proposatu zuen. Ea ba horrela EAJk sozialisten alde egingo zuten.
• Bertsio ezberdinak agertu dira Elorzaren agurraren inguruan. Nahita ala behartuta?
• Keinu eta mugimenduei so egin gabe, jeltzaleek sozialistei laguntza ukatu diete.

Orain artekoa ikusita emaitza argia da. Hautestontzietan esandakoari segiz Bilduko Juan Karlos Izagirre izendatuko dute alkate. Itzulbirarik izan ezean, sozialisten mugimenduak gehiago balioko dute barne gatazkak sortzeko, zer edo zer irabazteko baino. Xake mugimendu bizkorrak alferrik izan dira. Orain arteko errege Odon Elorza eta sozialistek ez dute porrotetik ihes egiteko zirrikiturik.