Txisteka-Mistekak 30 urte

Txisteka-Mistekak 30 urte

“1986an, Euskal Herriko gasolindegietako kasete saltokietara begiratu eta ttak! Euskarazko txiste kasete batzuk zeuden salgai!”, irakurri dugu asteon umoreari bidea ematen dion Katxonderstan atarian.

“Txisteka-Misteka zuten izena, eta dozenaka euskarazko txiste zituzten. Euskarazko lehenengo txiste kaseteak izan ziren. Guztira, lau argitaratu zituzten”; arrakasta izan ei zuten-eta.

Orain Interneten libre jarri dituzte, jaitsi edo on line entzuteko moduan.

Txisteka-Mistekari buruz hitz egiteko eta 80ko hamarkadan euskarazko txisteen bueltan sortutako ekimenei buruz hitz egiteko, egitasmoan parte hartutako Kike Amonarriz elkarrizketatu dute Oiartzun Irratian Mirari Martiarenak eta Martin Kittok.

Hemen duzu elkarrizketa:

“Txiste afariak, Txisteka-Miskeka kaseteen grabazioak, txiste lehiaketak, Txiskola, euskarazko umorea… Horiek guztiak eta gehiago izan ditugu hizpide Kikerekin, eta Joxe Ramon Galarraga (Txisteka-Mistekako beste txiste kontalaria) eta Jexux Peñagarinako ere izan ditugu gurean”, diote elkarrizketatzaileek.

1986an, Kike Amonarriz eta Joxe Ramon Galarraga jendaurrean jarri eta txisteak kontatu eta grabatu zituzten -kasetetan entzuten diren barre algarak publikoarenak dira!-. Ildo beretik plazaratutako bi kaseteen arrakastaren ondoren, hirugarren bat argitaratu zuten 1987an eta, Guillermo Segurolaren laguntzarekin, baita laugarren eta azken bat ere, 1989an.