Donostiako Euskal Jaien egitarauak, Inpernuko Poza Trikitixaren XIII. Jardunaldiak hartuko ditu bere baitan, “Trikitixa jotzeko tonalitate ezberdinak lehen eta orain” gai hartuta.

“Garai bateko jotzeko moduari erreparatzen badiogu eta gaur egungoarekin alderatu, hainbat ezberdintasun daudela konturatuko gara” irakurri dugu Trikitilari Elkartearen webgunean. “Horietako bat tonalitatea da, eta horrek sortzen dizkigun kezkak asetze aldera, gai honi erantzuna ematen saiatuko diren itzal haundiko trikitilariak gonbidatu ditugu aurtengo jardunaldietara”.

Jardunaldiak irailaren 10 eta 11n izango dira Udal Liburutegiko Sotoan, iluntzeko 19.30ean.

Argazkia: Xabi Otegi.

Bi hitzordu

Irailaren 10ean, ostegunez, Iker Goenagak hitzaldia emango du galdera hauen bueltan:

• Instrumentuek berez, ez dute ezer jotzen…
• Instrumentuaren kalitateak, jotzeko modua baldintzatzen du?
• Soinu txikiarekin, gaur egun, zenbat tonalitate erabiltzen ditugu?
• Zergatik? Zenbat erabil genitzake?
• Lehengo trikitilariek , soinu txikia hobeto ezagutzen ote zuten?

.

Eta irailaren 11n, ostiralez, mahai ingurua izango da Iñaki Garmendia “Laja” eta Joseba Tapia trikitilarien partaidetzarekin, Iosu Arrizabalaga “Izer” gidari dela.

“Garai bateko trikitixa jotzeko moduaren adierazle gonbidatu dugu Laja. Elgeta eta Sakabiren ikasle izan zen trikitilari honek haiengandik jasotako jotzeko moduak esplikatuko dizkigu. Aldaketa etorri zenean berriz, zuzen-zuzeneko protagonistetako bat izan zen Joseba Tapia, aurrekoena jasotzeaz gain tonalitate berriak jorratuz bere ibilbide propioa egin duen trikitilaria”.

 

Trikitixaren tonalitateak lehen eta orain