Olerkarien Eguna Amotzeko Larraldean –

Urtero, Senperen sortua eta bertan kokagune duen Hatsaren Poesia olerkarien elkarteak, 27. aldiz, bere eguna antolatu zuen apirilaren 6an, igandearekin, Senperen,  Amotzeko Larraldea etxalde handi-zabal eta ederrean. Auxtin Zamora olerkari senpertarrak sortu zuen aipatu elkartea euskal olerkaritza bultzatu eta zabaldu nahian.

Elkarte honek olerki tailerrak antolatzen ditu Euskal Herriko ikastola, eskola eta ikastetxeetan, bertako irakasleek horrela eskaturik. Horretaz gain, apirilaren lehen igandean olerki bilduma bat plazaratzen du eta Hatsaren Poesian egunean, Larraldean, aurkezten du. Aipatu liburuan, urtero, Euskal Herriko bazter guztietatik, eta baita euskal diasporatik ere, bidalitako olerkiak biltzen eta argitaratzen dituzte. Urtero ehun bat olerkarik bere poemak bidaltzen dituzte liburuan plazara ditzaten. Aurten, 128 olerkarik parte hartu dute. Ez da makala, Hatsaren Poesiak egiten duen lana!

Arestian erran bezala, Auxtin Zamora dugu olerkari eskola eta bilgune honen sortzaile, bultzatzaile eta koordinatzaile nagusia. Ahatik, azken bost urte hauetan, Ainara Maia Urroz irundar idazle eta olerkari gazteak lagundu egiten du antolamendu lan guztietan. Odol gaztea adineko maisua laguntzeko. Belaunaldi transmisioa, nolabait erraiteko. Eta erran behar da, Ainarak biziki ongi betetzen duela bere lana, Auxtin Zamora kapitainak gidatutako itsasontziaren lema zorroztasun handiz gidatuz.

Hatsaren Poesiaren egunean, urtero, olerkariak Larraldean biltzen dira, liburuaren aurkezpena egiten dute eta gero lagunarte goxoan elkarrekin bazkaltzen dute aipatu etxaldean, kanpo alde berdean, edota barne goxoan, beheko su piztuaren inguruan. Aurtengoan horrela izan zen, eta hantxe izan ziren solasak, bertsoak, kantuak eta proiektu berriak, Hatsaren Poesia bizi-bizirik baitago, eta geroari bizitzeko grina handiz begiratzen baitio.

Larraldea etxaldearen nagusia Andoni Iturrioz dugu, euskal kulturaren sustatzaile handia, eta etxaldean euskal kultur eragileei, urririk, urte luze hauetan, babesa eta biltoki eskaini dizkiena. Mezenas eta eragile handia, horrelakoa baita Andoni. Berari esker, era guztietako egitasmoak bideratu izan dira Larraldeko barne goxoan. Tamalez, Andoni adinean goiti doa, osasunez ere ez dabil aurreko garaietan bezain ongi, eta Larraldea ixteko beharrean ikusi du bere burua. 2025eko ekainetik goiti, itxita egonen da. Hori dela eta, aurtengo Hatsaren Poesia izan zen Larraldean egin zuten azkena. Olerki-bilduma berriarekin batera, Andoni Iturrioz eskertu zuten urte luze hauetan eman dien aterpe eta bultzada gogora ekarriz.

Adibidez, Marisa Arruabarrena idazle eta olerkari oriotarrak Azken eguna Larraldean izeneko olerkia egin zuen agur gisa. Horratx:

Agur Larralde,

agur eta ohore

hainbeste urtetan

maitekiro hartu nauen

etxe erraldoiari.

                                     

Agur eta ohore

nere barrenak askatzeko

aukera eman didan

Hatsa Poesiari.

 

Atea itxiko da

baina zure indarrak

nigan iraungo du.

Agur eta ohore

zuri, Larralde.

Heldu den urtean, Hatsaren Poesia hor edo han eginen dute, baina zalantzarik gabe, Larraldeak Euskal Herriko olerkarien eskola honi, bere ibilbide luzean eman dizkion, aterpe eta itzala, barne goxo eta inspirazio iturri, galduko dira. Olerkariek ez dituzte erraz ahantziko Larraldearen gerizpean emandako urteak.

Bideoa: Iñaki Lopez Luzuriaga

Urruñan, 2025eko apirilaren 9an

Olerkarien Eguna Amotzeko Larraldean  Olerkarien Eguna Amotzeko Larraldean