Egoitzetako langileen lana funtsezkoa da jendartearentzat, eta horrela aitortzea eskatu dugu Bilbon egindako agerraldian. Lan-baldintzak langile publikoekin parekatzea eta ratio gizatiarrak izatea exijitu dugu.

Zaintzak merkantilizatzeak miseria baino ez dakarkie adinekoei, eta prekarizazioa sektoreko langileei. Gaur egun, zaintza negozio bat da, enpresek dirua irabazten dute erabiltzaile-plaza berri bakoitzarekin, eta Aldundia da gurpil horren arduraduna, gutxi batzuk aberastu eta sektoreko 5.000 langile baino gehiago prekarizatu eta esplotatzen gaituena.

Enpresek dirua eta irabaziak soilik ikusten dituzte guk zaintza eta lana ikusten ditugun tokian. Langileak gara eta ematen dugun zerbitzu publikoa onartzea eskatzen dugu. Hauek dira gure aldarrikapenak:

– Egoitzetako langileen lan-baldintzak langile publikoekin parekatzea. Lan-baldintzak hobetzeko eta, ondorioz, adinekoen zaintza hobetzeko benetako urratsak emateko unea da. Orain da unea, honek izan behar du parekatzearen negoziazioa.

– Ratio gizatiarragoak. Gaur egungoak baztertzen ditugu, eskasak eta ez gizatiarrak direlako. Osasunaren aurkako erasoa dira, egoitzetako langileak ez gara robotak, pertsonak baizik. Eta egunero eraso egiten diote zaintzak jasotzen dituzten adinekoen duintasunari. Langile gehiago behar da.

LABen ustez, gatazka honen azken irtenbidea adinekoak zaintzeko zerbitzua publifikatzea da.

Pribatizazioa inposatzen du Aldundiak

Urtebeteko antzerkiaren ondoren eta patronalarekin 10 bilera egin ondoren, emaitza borondaterik eta nagusitasunik eza da, eta negoziaziorik ez dago. Aldundiak adinekoen zaintza pribatizatzea inposatzen du, eta bera da Bizkaiko egoitzetan bizitzen ari denaren erantzule nagusia.

Egoera horren aurrean, LABek egoitzen sektorean abenduaren 14rako greba egun baterako deialdia erregistratu du. LABen ustez, gatazka honek batasun sindikal indartsu eta argia eskatzen du. Aldarrikapenak eta borrokarako gaitasuna partekatzen ditugun sindikatuen erantzukizuna da sektoreko langileentzako mobilizazio-eskaintza bateratua egitea. LABek bere gain hartu du norabide horretan duen konpromisoa, eta gehiengo sindikalari gonbita egin dio diagnostikoa eta agenda mobilizatzailea partekatzeko.

Sektoreko langile guztiei dei egiten diegu abenduaren 14an mobilizatu daitezen. Beharrezkoa da aipatutako egoera eta zainketak jasotzen dituzten pertsonena ikusaraztea eta erdigunean jartzea.

LABek elkarretaratzea egingo du abenduaren 14an Bilboko Batzar Nagusien egoitzaren aurrean, 10:30ean.