Nafarroan Estatuko Administrazioak komunitate euskaldunari eta ezarritako Arauei barre egiten digu ezertxo ere gorritu gabe.

Administrazioan Euskaraz taldeak komentatu nahi du Espainiako Estatuko Administrazioak Nafarroan euskararen ezarpenaren inguruan egindako 2010eko txostena.

1990.go uztailaren 20ko Ministeritza Aginduak urtero egiteko beharra ezarri arren, hogei urteetan egindako bigarrena da. 2009ko txostena izan zen lehena. Langileen Batzordeak egindako presioari esker hasi zen txosten hori egiten.

Agindu horrek honelako betebeharrak ezartzen ditu: Euskara jakiteko betebeharra duten lanpostuak zehaztea; euskara jakitea meritu moduan izanen duten lanpostuak zehaztea, irizpide batzuk ezarrita; irizpide horiek jendeari informazioa ematea, dokumentuak hartu eta erregistratzea, jendearekiko harremana lanean izatea eta hizkuntza faktore garrantzitsua duten jardunak egitea dira; betebehar horien inguruko txostena urtero egitea.

Txostenak ez die betebehar horiei zuzenean erantzuten. Estatuko Enplegu zerbitzu Publikoan euskara jakitea meritu moduan baloratu dela aipatzen du. Besterik ez. Kasu horretan ere Lanpostuen Zerrendan horrelako ezaugarria duten ez du adierazten.

Txostenak landu behar zituen gaiak zuzenean ukitzen ez baditu ere, atera daitekeen ondorioa da euskara jakitea ez dela eskatzen (bi itzultzaileren kasua kenduta) eta meritu moduan (aipatutako salbuespen eskas horrekin) ez dela baloratzen.

Hain txosten lotsarazlea apaintzeko beste gaiak lantzen ditu: Kartelak, liburuxkak, inprimakiak, errotulazioak, euskara ikastaroak eta kasualitatez euskara dakiten langile batzuren aipamena.

Kartela, liburuxka eta inprimakiei dagokienez, zenbait tokitan euskarazko bertsioak badira, baina ziur aski jendearen begi bistatik aparte. Beste zenbait tokitan, gaztelania hutsean daudela aitortzen du lotsarik gabe.

Errotulazioei dagokienez, batzutan elebidun dira eta beste batzutan gaztelania hutsean. Guardia Zibilean, Polizia Nazionalean, Gizarte Segurantzako Diruzaintzan, Gizarte Segurantzako Institutu Nazionalean, Lan eta Gizarte Segurantzako Ikuskaritzan, Estatuko Abokatutzan, Defentsako Ordezkaritzan, Merkataritzako Lurralde Zuzendaritzan, FOGASAn, Espetxean eta Ebroko Konfederazio Hidrografikoan gaztelania hutsean dago.

Langileek euskarari buruz duten ezagutzaren inguruko aipamenak Estatuko Administrazioaren ardura uxatzeko egindakoak dira. Estatuko Administrazioak plantilla euskalduntzeko bere betebeharrak ditu eta horretarako hartu behar ditu neurriak. Kasualitatez langileren batek zerbait badaki, horrek ez du aipatutako betebeharra saihesten. Beraz, horrelako kontakizuna hutsala da eta lotsagarria.

LABek Lanpostuen azkeneko Zerrendaren aurka helegitea jarri zuen, LCA ezaugarria jarrita ez zegoelako. Hau da jendearekiko harremanagatik euskaren ezagutza baloratzeko duten lanpostuei ezartzen zaien marka.

2011ko azaroaren 28an emandako erantzuna hauxe izan da: Marka hori (LCA) jarrita ez badago ere, euskara baloratzen dela 1990ko ekainaren 20ko Aginduan aipatzen diren lanpostuetan.

Bietako bat: Horrelako lanposturik ez dago, edo balorazioa egiten da legeriak aipatzen duen tresna (LCA) erabili gabe. Egia erran, meritu moduan euskara baloratzen ez dela onartu du txostenak (salbuespen batekin).

Nafarroan Estatuko Administrazioak komunitate euskaldunari eta ezarritako Arauei barre egiten digu ezertxo ere gorritu gabe.

Iruñean, 2012ko otsailaren 21ean.

ADMINISTRAZIOAN EUSKARAZ TALDEA.

Ordezkaria: Joseba Otano Villanueva.