EAE-ko ikuskizunetako eta ekitaldietako langileen lehen hitzarmen kolektiborako negoziazio mahaia eratu da –

Pandemiaren geldialdiaren ondoren 2020an sortu zen TEKNIKARIOK sindikatuak, bultzatu du negoziazioa beste sindikatu batzuen babesa eta aintzatespenarekin.

Urtarrilaren 15ean, astelehenean, Euskal Autonomia Erkidegoko ekitaldi eta ikuskizunetarako zerbitzu tekniko eta osagarrien hitzarmen kolektiborako negoziazio-mahaia eratu da. Lan Harremanen Kontseiluko bilerak ELA, LAB, CCOO, UGT, ESK eta TEKNIKARIOK sindikatuen babesa jaso du. Enpresen aldetik, berriz, EUKI enpresa-elkartea egon da, sektoreko enpresa adierazgarrienak biltzen dituena.

TEKNIKARIOK 2020an sortu zen, ekitaldi eta ikuskizun gehienen geldiunearen ondoren, sektoreko langileei ematen zitzaien laguntza faltari erantzuteko, behin-behinekotasun handia eta autonomo ugari zituen sektore bat laguntzeko helburuarekin. Plataformaren lehen ekintza administrazioei laguntzak eskatzea izan zen, eta, ondoren, sektoreko hitzarmen kolektibo bat sortzeko negoziazio-mahai bat osatzea, gaur bertan egi bihurtu dena Bi aldeen arteko lehen bilerak duela bi urte inguru hasi ziren, eta, urte horietan, enpresen arteko elkartea sortu da, hitzarmenaren negoziazioan parte hartu ahal izateko.

Lan-baldintzak arautzea eta prekarietatetik ateratzea funtsezkoa da sektore honentzat, besteak beste, urteko egutegirik ez duelako, ordutegiak astebete lehenago edo gutxiago aldatzen direlako, lanaldiak 14 ordutik gora luzatzen direlako inolako konpentsaziorik gabe, lanaldien arteko atsedenaldiak ez direlako errespetatzen eta gauekotasuna, aparteko orduak eta jaiegunak ez direlako behar bezala konpentsatzen. Baldintza horiek asko zailtzen dute langilearen bizitzaren antolaketa eta familia bateragarritasuna.

TEKNIKARIOK sindikatuak azpimarratzen du beharrezkoa dela alde batera uztea sektorearen baldintzak hobetu ezin direnaren ideia. Premiazkoa da lanaldi luzeak, txandak ezartzeko ezintasuna, azken orduko aldaketak eta gainerako prekarietate-egoerak atzean uztea. Sindikatuak ulertzen du esparru horretan logikoa dela gehienek atseden hartzen duten uneetan lan egitea, baina horrek ezin duela bidezko ordainsariei uko egitea suposatu. Gauekotasuna edo jaiegunetako lana bezalako egoerak konpentsatu egin behar dira.

Gaur arte, oso enpresa gutxik dituzte teknikariak babesteko hitzarmen propioak. Hala ere, berariazko hitzarmenik ez izateak ez ditu enpresak langileen estatutua betetzetik salbuesten; izan ere, erregelamendu horrek nahitaez bete beharreko gutxieneko eskubideak ezartzen ditu, eta enpresak etengabe urratzen ditu.

Hori izango da negoziazioaren gakoa, langileen egoera arautuko duen lege-esparrua sortzea, sektorearen ezaugarrietara egokitzen ez den eta etengabe urratzen den langileen estatutuaz haratago.

EAE-ko ikuskizunetako eta ekitaldietako langileen lehen hitzarmen kolektiborako negoziazio mahaia eratu da