“Arabako ideia laborategia” antolatu dute Arabako Kuadrilletako euskara zerbitzuek eta Arabako Foru Aldundiak. Laborategia maiatzaren 26an izango da, Espejon, eta egun osoko egitaraua izango du. Helburua Araban euskalgintzan lanean ari direnen praktika onak bildu, eta ezagutaraztea da.

 “Nola berreskuratu galtzear egon den hizkuntza bat?”. Galdera hori egiten dio bere buruari behin eta berriz euskararen normalizazioan lanean ari denak, eta erantzun irmo bat ematea ez da askotan erraza izaten. Gainera, V. Inkesta soziolinguistikoan aurreratutako datuek kolokan jartzen dute erantzunaren irmotasuna: ezagutzan datuak gero eta hobeak dira, gero eta jende gehiagok daki euskaraz, baina erabileraren datuek ezinegona sortzen dute…

 

Erabilera hazteko helburuarekin, Arabako euskalgintzak era guztietako ekimenak jarri ditu martxan, eta asko eta asko arrakastatsuak izan dira. Ekimen horietako batzuk biltzeko  eta ezagutarazteko helburua du “Arabako ideia laborategia” jardunaldiak. Iñaki Martinez de Lunak eta Miel Anjel Elustondok parte hartuko duten mahai-inguru bat izango du abiapuntutzat, eta ondoren aurkeztuko dituzte, besteak beste, Kanpezuko XVII. Mendea elkarteak, Barrundiako Garaion elkarteak, edo sortu berri den Hirinet egitasmo multimediak, beren proposamenak. Bukatzeko, bertso afari bat egingo da Erriberako Antezanan, Iñurrita elkartean, Igor Elortza eta Beñat Gaztelumendi bertsolariekin.

 

Izen-ematea, matrikula, egitarau osatua… kontsultatu nahi izanez gero, www.euskaraba.com helbidera jotzea besterik ez dago.