15 proiektu hurbiletik ezagutzeko aukera – 

Euskal Herriko hainbat txokotatik etorritako 15 proiektuk beteko dute larunbat honetan, Beran izango den proiektu azokako gunea. Eremu ezberdinetako proiektuak izango dira bertan ezagutu ahal izango direnak, baina guztiek gauza bera dute komunean: euskara dute lehentasun eta emaitza edota eragin positiboa izaten ari dira beraien eragin eremuan. Azoka zabalik egongo da 11:30etik 15:00etara bitartean.

Azokan bilduko diren egitasmoak errealitate eta hutsune edota behar zehatzei erantzuteko sortuak izan dira, baina aldi berean, esportagarriak eta moldagarriak izateko bokazioa dute. “Bakoitzak bere herrira egingarriak diren ideia sorta eramateko balioko du azokak: inspirazio iturri eta ekintzarako pizgarri izango delakoan gaude”, diote azokaren arduradunek.

Proiektuak ezagutzearekin batera, azokak bestelako helburu nagusi bat ere badu: “Proiektuen berri izateaz gain, euskararen sustapenean lan egiten duten Euskal Herriko eragileek elkar ezagutu, elkarrengana hurbildu eta elkar indartzeko gune bat izatea nahi dugu”, azpimarratu dute.

Berako azokan, besteak beste, honako eremuak lantzen dituzten proiektuak izango dira aukeran: nazioarteko hizkuntza gutxituen gazte aktibisten saretzea eta Bortzirietako eskualdetze esperientzia; herrigintza euskaratik ahalbideratzen duten proiektuak; eremu digitalera begirako egitasmo ezberdinak eta aisialdiarekin zein hezkuntzarekin lotutako tresna eta baliabide berritzaileak eskaintzen dituztenak.

Azoka irekia da, eta aurkezpen dinamikoekin eta musikarekin girotua egongo da. Jan-edanerako aukera eta haurrentzako txokoa ere izango dira bertaratzen direnen esku. “Giro atseginean, elkar ezagutu eta elkarrengandik ikasteko aukera paregabea”, gaineratu dute. Ekimen hau Pirinioetako Lan Elkarteak diruz lagundutakoa da.

 

BIDASOKO AZOKAKO PROIKETU PARTE-HARTZAILEAK
PROIEKTUA	ELKARTEA	HERRIA/LURRALDEA
Mintzalasai euskaraz!	Mintzalasai elkartea	Baiona – Angelu – Miarritze hiri eremua (Lapurdi)
Euskara(z) plazara!	Plazara Kooperatiba	Ipar Euskal Herriko kideak
Kirola Euskara Ahoan	Kirola Euskara Ahoan	Ortzaize (Nafarroa Beherea)
Gookapi	Gookapi elkartea	Durango (Bizkaia)
Pulunpa (e)ta Xin	Pulunpa (e)ta Xin	Usurbil (Gipuzkoa)
Euskararen Kriseilua	Euskaltzaleen Topagunea	Euskal Herria
HIGA Topaketak	HIGA elkartea	Euskal Herria
Ulerlaguna pilotajea	Euskaltzaleen Topagunea	Donostia eta Aretxabaleta (Gipuzkoa) Erandio (Bizkaia)
Euskara Maitea	Euskara Maitea	Ondarroa (Bizkaia)
Borborraldia	Bor-Bor elkartea	Bortziriak (Nafarroa)
Odola ematen bizia eman	Lau Haizetara	Orereta (Gipuzkoa)
Gure natura ezagutuz	Baso Bizia elkartea Morkaiko Mendizaleen elkartea Elgoibarko Izarraren Atxutxiamaika Saila	Elgoibar (Gipuzkoa)
Paperjale	Abaraska Taldea	Euskal Herria
Pantailak Euskaraz	Pantailak Euskaraz	Euskal Herria
Izaskun Arrue Kulturgunea	Lazarraga elkartea	Gasteiz (Araba)