Gauzak direna balira –

Gauzak direna balira saiakera aurkeztu du Joseba Sarrionandiak (Iurreta, Bizkaia, 1958). Habanatik bideo batean hizketan, audiobisuala gustoko ez baina egoera berezian gaudela eta, liburuari bisibilitatea emateko egindako aurkezpena dela esan du, lekuz kanpo, arraina uretik kanpo bazala zegoela mikrofonoen aurrean aitortuz. Jose Goitiak azaroaren 30ean grabatutako hamasei minutuko elkarrizketa, Koldo Mitxelena kulturgunean eman dute Pamiela argitaletxekoek elkarrizketa eta aurkezpenaren bideoa. Habanako Gaukaria trilogia ixten duen lana, Bizitzea ez al da oso arriskutsua? eta Airea ez da debalde dira aurreko biak. Egunkari forman egindako liburua, mundua ulertzeko saiakera eta esperimentoak direla esan du. Liburuan analogia politikoak egiteko erabili ditu shakespeareren Caliban, Prospero, Ariel… Kanibalismoaz ere aritu da, antropofagiaz, zer esan den antropofagiari buruz eta zertarako erabili den antropofagiaren ideia, errealitate faktualaz, diskurtsoa eta erretorikaz, gizarte mediatizatuaz, doratuaren bilaketaz, komunitate baten partaide sentitzearen garrantziaz, etab… Hemen biziki pozik utzi gaituen Josebaren liburuaren aurkezpenaren bideoa.

Egiten du inork lo kartzelatik urkabera daraman gurdian? –galdetzen zuen John Donnek–. Guk, ostera, erdi oharkabean egiten dugu normalean amaren sabeletik edonongo hilobira arteko bidea.

Gauzak direna balira literaturaren bidezko itzartasun ariketa da. Izan dezagun arreta eta ardura behintzat, kondenatuta gaudenez gero.

Idazkera eta liburu molde baten hirugarren partea da. Bizitzea ez al da oso arriskutsua? izan zen lehenengoa, Airea ez da debalde bigarrena, eta Gauzak direna balira hau da azkena. Habanako gaukaria azpitituluarekin heldu den trilogia. Gaukaria: neologismo natural horrek iradokitzen du iluntasunari eta lozorroari kendutako izkribuak direla.

Habanako bazter-auzo batean bizi da idazlea 2019ko urritik 2020ko pandemiaren udaberrira arte. Baina, bere gogoetak egunerokotasunetik hedatzen dira espazioan eta denboran. Saiakera politiko eta filosofikoa (isonomia, isegoria, isomoiria eta isotimia) saiakera historiko eta literarioarekin (Prospero, Kaliban, Ariel, Saikoratz) hariztatzen da. Iragan koloniala eta propietarista presente dago gizartean, gizajaletasuna desagertuko dela ematen duen arren, gizakia ez zaiolako gustatzen gizakiari. Deskribaketatzat ala mikroipuintzat har daitezkeen pasarteak daude (agureari poliklinikora laguntzen dion tximeletarena, edo, apagoian agertzen den kokuioarena). Antilletako hitzez (mamei, batei, bohio, baje, jaba, nasobuko), eta bertako ahaztuez (hain gabe, haindu) aberastuz doa euskara.

Baina, literaturaren epidiktikotasunaz mesfidatzen da autorea, literatura ez delakoan ez edertia ez lehiaketa, baizik kondenatuaren bizitzarekiko arreta…

Pamiela

…

+ zuzeu.eus sarrionandia

Joseba Sarrionandia Iurretara bueltatu da lau hamarkadaren ostean

Joseba Sarrionandia: “Argazkiarekin, espero dut espektakuluaren gizarteari zor diodan zerga ordaintzea”

Liburu txiki batean gauza handiak jarri ditu Sarrionandiak

Joseba Sarrionandiaren elkarrizketa osorik

Joseba Sarrionandia: “Azken 20 urteotako poemak ari naiz txukuntzen”

Sarrionandia eta Darrieussecq idazleen arteko elkarrizketa

Joseba Sarrionandia: “Zertarako behar dut elefante zuri bat?”

Sarrionandiaren bat

Muxu gozo bat!!

+ zuzeu.eus Sarrionandia

Gauzak direna balira

Joseba Sarrionandia