Udazkenak gurean udak baino beroagoak izan ohi dira sarri. Halaxe izan zen 2010ekoa, izua eta amorrua hamaika etxeetan, sarekadak bata besteari jarraika, atxiloketak, inkomunikazioa eta torturak. Eta bost urte beranduago, dirudienez, berotik dator aurtengoa ere, Auzitegi Nazionalean nonbait opor osteko trauma luzeegirik ez dute izango. Jarraian beste zenbait sumario izango badira ere, urriaren 19an Askapenaren aurkako epaiketa hasiko da eta bertan Walter, Unai, Dabid, Aritz eta Gabiri seina urteko kartzela zigorra eskatzeaz gain, Askapena, Askapeña eta Elkar Truke elkarteen ilegalizazio eskaerak bildu ditu fiskaltzak.

Epaiketa hau salatzeko asmoz, auziperatu, militante internazionalista, eskubide zibil eta politikoen aldeko ekintzaile eta hainbat herri mugimenduko kide elkartu gara herriak libre dinamikaren baitan. Palestino laranja dugu ikur, batak munduko borrokak ordezkatzen ditu, kolore laranjak aldiz, azken urteetan gurean indarra hartu duen desobedientzia olatua, eskuz esku eraikitako elkartasun eta konpromiso harresia. Guztiok, injustizia berri hau lau haizetara zabaltzea dugu xede eta bide batez, salatzailea salatzeko lizentzia harturik gatoz.

Izan ere, milaka izan dira gure herriak etengabeko salbuespen egoera honetan jasandako epaiketa eta erasoak, eskubide zibil eta politikoen urraketak, lokal eta egoitzen konfiskazio aginduak, erakundeen ilegalizazioak, egunkarien itxierak… denak ere demokraziaren izenean. Frankismo garai gordinetan baina zenbat ote dira tribunal militarretatik pasatakoak edo handik igaro gabe bide bazterrean epaituak? eta historiaren sokari gehiago tirako bagenio, inkisizio santuan sorginen aurka buruturikoak oroitu beharko genituzke, eta…

Epaiketa guzti hauetan gidoi bertsua jarraitu du ondorio dramatikoak dituen ohiko antzezlanak: epaituak euskaldunak, epailea espainiar Estatua. Ez ote da ordua bada behingoz herriak epaitu dezan inoizko politika inperialistarik basatiena gauzatu duen estatu inperialista espainiarra? Epaitu ditzagun hamaika herriren zapalketa, ukazio eta suntsiketak eragin dituen estatua, behingoz jarri dezagun bera gure akusazioen jo mugan, herri libreak izan gaitezen estatu kriminala epaituko dugunak!

Gure lurretatik oso urrunera joan gabe herrien kartzela bezala irudikatzen den inperioaren azken kolonietan, badira hamaika herri zapaldu, hainbat estaturik gabeko nazio; Herrialde Katalan, Galiza, Aragoi, Gaztela… guztietan, geurean bezala etengabeko urraketa kultural, politiko eta sozialak jasaten ari dira egunerokoan, denak ere odolez eta inposizioen bidez eraikia izan den estatu madarikatu honen baitan. Zuengatik ere espainiar Estatu inperialista epaitzera goaz!

Duela bost mende inguru berriz, genozidio beldurgarri bati eman zitzaion hasiera, ezpata eta bibliaren gizonek, 90 milioi jatorrizko herritar erail zituzten Abya Yalan. Mendebaldean nolabaiteko balioa izan zezakeen urre, zilar eta barkuetan sartu zitekeen guztia erauzi zieten bertakoei. Eta gutxi balitz gizateriaren historiako pasarterik ilunenetariko hura, orduko agintarien oinordekoak baliran, transnazionalen bitartez bertakoak esplotatu eta bertakoen baliabideak lapurtzen dihardute egun. Agintari, buruzagi ohi, epaile orojakile eta intoxikazio kanpaina amaigabeei esker aldiz, kateak behingoz apurtu eta bigarren eta benetako independentzia baten alde ari diren estatu burujabeen aurka ari dira, hala nola Venezuelan, Bolivian, Ekuadorren, Kuban… Atzoko eta gaurkoengatik, zuengatik ere, espainiar Estatu inperialista epaitzera goaz!

Bestalde, hego euskal herritarron hitzaren aurka, NATO bezalako egitura inperialistan parte hartuz, zenbat ote dira azken hamarkadatan zuzenean edo zeharka erasotu dituzten herrialdeak? Zenbat petrolio, gasa edo bestelako helburuen mesedetara desagerrarazi dituzten herrialdeak? Sarraski hauen konplize eta partaide da espainiar Estatua. Dirutan 100 milioi inguru eskaintzen dio honek NATOri urtean, bere base militarretatik bi baino ez aipatzearren, Rota eta Moróngoetan esaterako, urtean 6 mila hegaldi baino gehiago bideratzen dira Pentagonotik ekialdera. Zapaldutako herri guzti hauengatik, zuengatik ere espainiar Estatu inperialista epaitzera goaz!

Ezingo genuke baina aipatu gabe utzi saharar herria. Ia mende batez, mendebaldeko Sahara bereganatu eta azkenik, herri bezala zegozkion eskubideak ukatu eta gaur arte luzatu den gatazkan lagun paregabea izan du gobernu marokoarrak. Honela, harreman diplomatiko, komertzial eta militarrak naturaltasunez mantendu ditu gaur arte Madrilgo paktu sekretu lotsagarri haietatik, bertako baliabide naturalak ustiatzen jarraitu du eta gutxi balitz, errepresio eta bortizkeria alauitatik ihesi datozenei asilo eskubidea ukatu die behin eta berriz, Hasanna Aliaren kasuan gertatu bezala. Ahanzturara kondenatu nahi zaituztenengatik, zuengatik ere Estatu espainiar inperialista epaitzera goaz!

Denon artean beraz, duintasun betean atzo eta gaurko Estatu espainiarraren izaera kriminala salatzea eta epaitzea dagokigu. Guregatik, haiengatik eta zuengatik, guztiongatik goazen herriz herri espainiar Estatu inperialistaren aurkako herri epaiketak burutzera, goazen gure oinetakoak eskutan hartu eta gure mespretxua adieraztera. Eta datorren urriaren 12an, herri epaiketa guzti hauek, sententzia bakarrean batuko ditugu, Euskal Herriko eta nazioarteko txoko desberdinetan egindakoa, oihu bakar batean bilduko dugu, espainiar Estatu inperialistaren aurkako Herri Sententzian hain zuzen, bertan elkartuko gara.

Julen Zulaika (Askapenako kidea) eta Gabi Basañez (militante internazionalista auziperatua)

Behingoagatik epaitu dezagun epailea!