Informatika
Informatika –
Rikardo Arregi, Noticiasen.
Nire ordenagailuak bere kabuz egiten dituen eguneratze horietako baten ostean agertzen hasi zitzaizkidan, piztu ahala, pantaila osoa betetzen dituzten argazki uste eder horiek (tira, ederrak dira normalean), traba egiten zidatenak, fitxategiak-eta erakusten dituen oinarrizko pantailara lehenbailehen iristeko. Oztopoa berehala gainditu nahirik, klik zoroak egiten nituen, harik eta konturatu nintzen arte argazkiak edo ordenagailuak edo programak edo auskalo zerk atsegin-dut/ez-dut-atsegin botoia sakatu arte ez zidala kasurik egiten. Laster ikasi nuen ez-dut-atsegin botoia sakatuz gero, beste argazki bat ateratzen zela, eta galdera bera, eta abar. Informatika kontuetan oso trebea ez naizenez, ez dut ikertu nola ezabatu argazkiena, eta orain ordenagailua piztean badakit jolas txiki bat dudala gauza ustez serioekin (tira, serioak dira normalean) hasi baino lehen.
Ura agertzen bada, berdin zait euri, itsaso, aintzira, errekasto edo elur, datsegit botoia sakatzen dut, baina algoritmoa ez da oso azkarra, antza, tematuta dagoelako basamortuak, harkaitz gorriak edo ordoki lehorrak dituzten argazkiak erakusten, ederrak direnak, ez dut ukatuko, baina akuatiko nago aurten. Etxe orratzez beteriko hiriak, gauez edo egunez, agertzen zaizkidanean, gogoak ez-datsegit botoia sakatzea eskatzen dit, beraz, azkenaldian algoritmoak Dubai eta basamortua elkartzeko trebetasuna garatu duela dirudi.
Orain sistematikoki datsegit botoia sakatzen ura eta pasaian gizakien arrastoren neurriko bat, txikia gehienetan, agertzen bada, zibilizazio apur bat, mesedez. Baina ordenagailuak leku huts, idor eta basatiak nahiago ditu nonbait. Algoritmoa setatia da. Egongo da tematuta nire gustuak alda ditzadan? Beldurra sentitzen hasi naiz, baina nik badakit nola izan burugogorra, eta teknofobiaren eta teknolatriaren artean bidexka bat egongo dela pentsatu nahi dut. Goizean, ordenagailua piztean, Eskozia dirudien toki bat ikusi dut: zeru grisa, aintzira eta erortzeko zorian dagoen gaztelua. Irabazten ari naiz. Gaur, behintzat.
Informatika
