[Urpeko Bonbarda #109] XXI. mendeko ahotsak

2023-02-05 09:17
ZuZeu Podcast
- Podcast

[Urpeko Bonbarda #109] XXI. mendeko ahotsak –

Urpeko Bonbarda Zuzeu Podcastek ekoiztutako musika saioa da, Anartz Bilbao gidari duena. 109. saioan, XXI. mendeko ahots bakarlari bikainenen zerrendari erreparatu diogu The Times egunkarian, eta inoizko saiorik mainstream-ena osatu.

The Times egunkariak XXI. Mendeko kantari bakarlari bikainenen zerrenda plazaratu du. Guztira 20 izen dira -hamalau emakume eta sei gizon- oso mainstream eta, jakina, eszena anglosaxoikoak guzti-guztiak. Alta, gaurko saioa osatzeko aitzakia eman digute. Denbora mugaren eraginez hautaketa bat egin behar izan dugu, eta hogei horietatik zazpi hauexek baztertu ditugu: Ed Sheeran, Taylor Swift, Bruno Mars, Rihanna, Lady Gaga, Lana del Rey eta Weyes Blood.

[Urpeko Bonbarda #109] XXI. mendeko ahotsak Saioa Harry Styles entzuten abiatu dugu, telebistako talent show batean parte hartu eta One Direction mutiko taldeko kide izana. Sam Smith ere britainiarra dugu, eta estatubatuarrak bi lan luze arrakastatsu plazaratu dituen Frank Ocean eta Kendrick Lamar rap kantaria. Azken hau bere belaunaldiko ahotsik nabarmenena dugu askoren esanetan, eta guretzako ere, aurreko hirurak baino dezente kitzikagarriagoa.

Gainontzean entzun ditugun bederatzi ahotsak emakume kantarienak dira. Batzuk oso interesgarriak begitandu zaizkigu: bedroom poparen erregina Billie Eilish harrigarria, eta Lizzo emakume ahaldundua, berbarako -horra bi kantutzar, “Bad Guy” eta “Truth Hurts”-. Bi horiek bezain gaztea eta arrakastatsua da 20 urte betetzear den Olivia Rodrigo ere, eta apur bat eskarmendu handiagoa dute Kelly Clarkson eta Florence Welch kantariek. Azken hau Bilbon izango da uztailean, Florence & The Machine taldea gidatzen.

Saioa mundu mailako izar dirdiratsu diren kantariek itxi dute. Destiny Child hirukotean ezagun egindako Beyonce, egungo artista beltzik itzaltsuenetakoa, eta honek estatubatuetan duen sonaren parekoa duen Adele britainiarra. Eta hauekin batera, 2006an “Smile” kantutzarrarekin ezagutu genuen Lily Allen, eta zerrendan ageri diren guztien artean bizirik ez den bakarra; jada ikono bihurtua dugun Amy Winehouse neosoul kantari apartekoa.