Urte bat argazkitan (2022)

2022-12-31 05:59
Bixio Irrisarri
- Mundua

Urte bat argazkitan (2022) –

Urteak munduan eman dituen gertakari nagusienetako batzuk 100 argazkitan bildu ditu TIME aldizkariak, eta 25 inguru dakartzagu hona… Euskal Herriko batzuk gehituta.

2022aren laburpen grafikoa egin du Time Aldizkariak, ehun argazki bikainenak hautatuta. Batzuk ezagutuko zenituen aurretik ere, eta beste batzuk ikusi gabeak izango zenituen; edozein kasutan, gaiak ez zaizkizu arrotz egingo, irakurle. Esanguratsuenetako batzuk dakartzagu, hauek ulertzeko azalpen labur eta guzti.

Argazki sortari, gainera, zazpi gehitu dizkiogu, Euskal Herriko gertakari azpimarragarrien berri ematen dizkigutenak. Bateren bat gehitu edo ezabatuko bazenu, esaguzu lasai zeure iritzia, iruzkin bitartez.

Urte bat argazkitan (2022)

Goiko argazkian, pandemiaren bortitza agertzen da. Kaliforniako Providence Mission Ospitalean (AEB), ZIUn dagoen Covid-19ak jotako aita gaixoa besarkatzen dute honen seme-alabek (Shannon Stapleton—Reuters).

Ukraina

Egunkari nagusienen azalei erreparatuta, Ukrainako gerraren pizteak pandemiaren desagertzea ekarri zuela zirudien. Ondorengo argazki sorta, sarrera honek azalean daramana bezalaxe -The Washington Posteko Salwan Georgesek martxoaren 5ean egina, Odesako tren geltokian- oraindik bizirik dirauen afera armatuari buruzkoak dira.

Lehen argazkian, martxoaren 5ekoa, Kyiv aldirietan Irpin ibaia gurutzatzen duen suntsitutako zubi baten azpian babesten dira Ukraniarrak (Emilio Morenatti—AP). Bigarrenean, Kyiv hiriburuko herritarrak ageri dira errepidean, otsailaren 24an, Errusiarren erasoetatik ihesi (Pierre Crom-getty Images).

Hirugarrenean, eta kamerak grabatzen ari direla, ikasleak dantzan ari dira Odesako Opera Antzokiaren aurrean, ekainaren 15ean (Laetitia Vancon-The New York Times). Azkenengoan, atsedenaldian diren soldaduak ageri dira, xakean jokatzen Molotov koktelekin (Nicole Tung-Harper´s aldizkaria).

Hurrengo argazki sorta bitxikeriaz osatua dago. Hasteko, eta lerro hauen azpian, NASAren James Webb teleskopio espazialak egindako lehen argazkietako bat agertzen dugu, zeinetan SMACS 0723 galaxia multzoa agertzen den. Ez al da txundigarria? (klikatu handitzeko).

Azpiko lehen argazkian, ezkerrekoan, Sphynx katuak ageri dira, Cheonaneko Soon Bok kafetegian, Hego Korean (Robin Schwartz-The New York Times). Bigarren argazkian Frantziar errepublikako presidente Emmanuel Macron ikus dezakegu, apirilaren 2an jendea agurtzen Paris aldirietan (Ludovic Marin -AFP). Eta hurrengokoan, eskuineko aldean, Qatarreko Munduko Futbol Kopako jarraitzaileak atzera kontaketa egiten ari dira Dohan, azaroaren 20an (Patricia de Melo Moreira -AFP).

Bigarren lerroan, ezkerretara, Angolako egungo presidentearen argazkiak ageri dira Luandako hondartzetako palmondoetan, abuztuaren 23an eta hauteskunde kanpainan John Wessels-AFP). Erdian, Ingalaterrako George printzearen islada ageri da Isabel II Erreginaren hilotza Windsorrera daraman autoa ageri den telebista pantailan (Ian Berry-Magnum Photos). Eta azkenik, lainoak Kaliforniako Golden Gate zubia estaltzen du ekainaren 11n (Nina Riggio-The New York Times).

Migrazioak

Milaka dira hegoamerikar krisiek bultzatuta iparralderako bidea hartzen dutenak, AEBetako mugara heltzeko asmoz. Ezkerreko argazkian, Texaseko Guardia Nazionalak eta mugetako poliziek bidea argitzen diete Rio Bravo zeharkatuz Mexikotik AEBetarako bidea zeharkatu nahian dabiltzan migranteei (Adrees Latif-Reuters).

Eskuineko argazkian, neka-neka egindako haur eta gizon gazte batek atseden hartzen dute Darieneko Tapoian, irailaren 23an; 66 milia dituzte oraindik aurretik, Kolonbiatik Panamara arteko oihan-bidean (Federico Rios-The New York Times).

Jarraian, munduan zehar diren gatazka eta borrokak agertzen dituzten argazki sorta bat dakargu. Lerro hauen azpian, eta hasteko, Uvaldeko ikastetxean eraildakoen omenezko ekitaldia, maiatzaren 30ekoa. Texasko lehen hezkuntzako ikastetxean 19 ikasle eta bi irakasle hil zituzten, tiroz (Christopher Lee-The New York Times).

Azpiko sortan, eta ezkerretik eskuinera, Filipinetako polizia jendea eutsi nahian, maiatzaren 25ean, Manilan (Lisa Marie David-Reuters). Manifestari bat aterki azpian esertzen da, urtarrilaren 31n eta Txilen, inmigrazio ilegalaren aurkako protestetan (Diego Reyes-AFP). Emakume batek laguntza eskatzen du poliziak jipoitzen duen bitartean, irailaren 13an Nairobin, Kenian (Tony Karumba-AFP).

Beheko lerroan, ezkerretara, Nina (erdialdean) eta Priscilla (ezkerraldean) ageri dira, Houstoneko emakumeen klinikako langileak, estatubatuar epaileek aborturako eskubidean atzera egin zuten unean (Meridith Kohut-The New Yorker). Erdialdean, gobernuaren kontrako koka kultibadoreen martxa, irailaren 7an La Paz aldirietan, Bolivian (Juan Karita-AP). Eskuinetara, Mahsa Aminiren heriotza gaitzesteko protestan ari ziren emakumeak poliziarengandik ihesi ageri dira, Teheran erdialdean irailaren 19an, Iranen (AP).

Beroa

Ondorengo hiru sortak bina argazkiz osatuta daude, beroa, istripuak eta lana eta ospakizunak gai dituztela. Hasteko, udako bero itogarrien isla, suhiltzaileak ikus ditzakegu suarekin borrokan, uztailaren 31n Pontevedrako A Cañiza herrian, Galizan (Alberto Sxenick—EFE). Eta ondoren, bi emakume trafalgar Slquareko iturrian freskatu nahian, uztailaren 19an Londonen, Ingalaterran (Dan Kitwood-Getty Images).

Istripuei dagokionean, bi argazki. Batean amildutako zubi baten gaineko ibilgailuak ikus daitezke, laguntza noiz etorriko zain, urtarrilaren 28an Pittsburghen, AEBetan (Gene J. Puskar-AP). Bestean, Ian hurakanak Floridako Fort Myers hondartza inguruetan eragindako txikizioa agertzen da, irailaren 29an (Hilary Swift-The New York Times).

Ezkerreko argazkian kobre eta kobalto meategi bateko langileak ageri dira, Shabakako Comakat kooperatibakoak, maiatzaren 6an Kongon (Laurel Chor). Eskuinekoan, nahua komunitatea artoaren ospakizunetan ari da Mexikoko Xalpatlahuacen, martxoaren 27an (Yael Martinez—Magnum Photos).

Euskal Herrian

Euskal Herrian ere izan dira aurten gertakari politiko, sozial eta kultural aipagarriak. Guk gutxi batzuk baino ez ditugu bildu irudietan.

Ikus dezakezunez, irakurle, tokirik nabarmenena Irulegiko Eskuaren agerpenari eman diogu, garrantzia handiko aurkikuntza izateaz gain poz galanta eragin zigulako. Hautatutako argazkian, brotzezko xafla aurkitu zuen Leire Malkorra arkitektoa ikusten da, eskua lurpetik atera zuen une zirraragarrian (Aranzadi).

Urte bat argazkitan (2022)

Gainontzean, hauexek dira hautatutako argazkiak, ezkerretik eskuinera eta goitik behera: Maialen Lujanbio azken Bertsolari Txapelketa Nagusia irabazi berritan, Iruñean agurra kantatzen (Gari Garaialde-Xenpelar Dokumentazio Zentroa); EAEko parlamentuko alderdien arteko Hezkuntza-Lege Berrirako hitzarmena (EiTB); uztailaren 25ean zendu zen Gregorio Larrañaga Manukorta zenari agur eta ohore (Txemi Valdecantos); Gazte Koordinadora Sozialistaren ekaineko Aieteko argazkia (GKS); azaroan Landetan 5 kiloko onddo zuri bat aurkitu zuen gizona (Paul Guegan); Osakidetza afera, edo abenduan Donostiako Ospitaleko zerbitzuburuek osasun agintariekin izan dutena (EFE).

Bateren bat duzu faltan ala soberan?