Dagoeneko iritzi eta istorio asko sortu dira krisiaren inguruan. Estatu Batuetan inon baino gehiago. Bainan herri hartan, badaude oraindik erreportaje zuzen eta zehatzak egiten dituztenak (hemen nekez ikusten direnetakoak, hain justu). Tartean, Frontline saioa egiten duten kazetariak.

Kasu honetan, Inside The Meltdown bideoan, erakusten dute nola, egun gutxitan, ustez errugabea zen finantza sistema amerikarra goitik behera erori zen. Egoera hartan, Ben Bernanke (Erreserba Federalaren Chairman-ak) eta Henry Poulson (Ekonomiako Estatu Idazkariak) beraien sinesmen neoliberalak leihotik bota behar izan zituzten, mundu osoko sistema ekonomikoaren hondamendia saihesteko.

Aurreko egunetan asmotsu, disdiratsu eta modernoak ziren finantza produktuak, dirugosekeria, axolagabekeria eta praktika kriminal bihurtu ziren. Azken hamarkadetan eman den iruzur handienaren ondorioak hurrengo belaunaldiaren ongizatea baldintzatuko du, eta gaurko helduen zahartzaroa, noski!

Ikasiko ote dugun edo gertatutakoa gezur berriekin estaliko ote dugun, ikusteko dago.