Filtroko sarraskiaren 30. urteurrena –

Leire Vargas, ERRIAn.

---

 

Bihar hogeita hamar.

Bihar hogeita hamar

Filtroko ospitaletik Fernando Morroni eta Roberto Facalenetik

Josu Goitia, Luis Mari Lizarralde eta Mikel Ibañezenetik

izen gabeko beste hainbesterenetik.

Ordutik hogeita hamar

eta mugaezina den tarte bat

noizbait hasi zen borroka hartatik

oraindik amaitu ez den borroka honetara.

Berberean aurpegi desberdinak

aurpegi desberdinetan berbera.

Norbaitek nonbait gu baten alde egin duen aldi bakoitza

hari berean.

Gaur urteroko zita

Bilbon

ordu batean Eliptikan

hiruretan Txori Barrote parean

konpartsako barran gauean

urtero eta asteroko beste hainbeste zitatan bezala

borroka eremu bihur dezakegun txoko bakoitzean

hau ez delako amaitzen

manifa desegiten denean

mahaian esertzen garenean

bozgorailuak piztean

ez da amaitzen lege bat onartzean

ez da amaitzen tiroak isiltzean

gure aditzak ezabatzen diren bitartean

inperialisten hizkuntza haz dadin,

gu arrastaka lepoa makur belaunak urratuta gabiltzan bitartean

norbait besaulki bigun batean eser dadin,

elkartasun-keinuei kolpez erantzuten zaien bitartean

beldurra gu guztion zainetan zabal dadin.

Gaur urteroko zita

herri bat eraikitzeko alea ipintzearren

148 baitaude espetxean oraindik

148 horma artean

148 etxe zulaturik.

Eta hori gurean soilik.

Eta badira gure presoak

baina bada baita Palestinako herria, Sahara

eta inperialismoaren biktima guztiak

badira sistema neoliberalak eskubidez husten dituen gorputzak

gu bizi garen moduan bizi gaitezen esplotatutako esku guztiak

borroka berean.

Gure borrokan.

Bihar duela hogeita hamar

Uruguayn gurekin borrokatu zuten moduan.

Hogeita hamar bihar

hau ez baitzen atzo hasi

hogeita hamar bihar

hau ez da gaur amaitzen

bihar ere izango dira hamaika

hamaika lehertzear

hamaika batzear

hamaika altxatzen

eta altxatzen

eta altxatzen

elkarrekin.

Filtroko sarraskiaren 30. urteurrena