Diaspora eta EHren arteko Anima zaitez! programa abian da –

Iñaki Landa, Garazi Suinaga, Garazi Fernandez eta Larraitz Goikoetxea aukeratu zituzten programan parte hartzeko. Astebete daramate Villa Mariako (Kordoba) Euzko-Etxea Euskal Etxean. Euskarak, sukaldaritza tradizionalak, institutuetan hitzaldiek, dantzek eta musika klaseek osatzen dute bere agenda estua.

Villa María Argentinako erdigune geografikoan dagoen herria da. 90.000 biztanle inguru ditu, eta Flor Denizek, Anima zaitez!en programaren koordinatzaileak, azaldu duenez, euskal komunitate garrantzitsua iritsi zen lurra lantzera. “Gure aitona-amonak lanean hasi ziren eta behitegiak, gaztandegiak etab. martxan jarri zituzten. Batez ere nekazaritzan eta abeltzaintzan lan egin zuten. Hona, batez ere, Nafarroatik iritsi ziren, baina baita Gipuzkoatik, Zuberoatik, Lapurditik eta Arabatik ere”.

Luis Carricabururen familia, adibidez, Nafarroako Arraiotz herritik etorri zen. 1930. urtea zen. “Argentinan finkatuta zeuden euskaldunek lagunak, senideak, bizilagunak… gonbidatzen zituzten, mundu guztiarentzako lana zegoen, lurra, eta guk bagenekien lan hori aurrera eramaten”, azaldu du. “Milaka izan ziren honaino iritsi zirenak eta VIlla María, bere ezaugarri geografikoengatik bereziki interesgarria zen; oso ondo lantzen ziren alpapa, zekalea eta artoa, artzain sistemarako oinarrizko produktuak”, azpimarratzen du.

Euskal Etxe honek Anima zaitez! programaren  seigarren edizioa abian jarri du. Helburua euskal kultura partekatzea da, inplikatutako alde guztiek (argentinarrak eta euskaldunak) esperientzia aberasgarria bizi dezaten. Hitz gutxitan esanda, Euzko-Etxea Euskal Etxearen ahaleginari esker, “Atlantikoaren bi aldeak lotzen dituen zubia eraikitzen ari gara hemendik”, azaldu du Flor Deniz koordinatzaileak.

Horrela, Iñaki Landak (Gasteiz – Iruñea), Garazi Suinagak (Gorliz), Garazi Fernandezek (Barakaldo) eta Larraitz Goikoetxea Urdangarinek (Beasain) astebete daramate Villa Mariako Euskal Etxea osatzen duten 300 bazkiderekin elkarlanean. Fernandezek azaldu duenez, “Garazi Suinagak euskararen euskalkiei buruz emandako hitzaldiarekin hasi ziren ekitaldiak. Ondoren, Iñaki Landa eta Larraitz Goikoetxea sukalde tailerraren buru izan ziren marmitakoarekin, patata tortillarekin eta La Viña tartarekin. Astea dantza eta bertso tailerrekin osatu zen”. Emilia Zugastik, Euskal Etxeko lehendakariak, gaineratu du, “Euskal Etxeak jarduera hauek bideratu ditu Cordobako (Argentina) herritarrengana iristeko eta gure komunitateak Euskal Herriarekin dituen harremanak indartzeko”.

Azken finean, Villa Mariako Euskal Etxeak Anima zaitez! ekimenarekin bilatzen duena “euskal gazteak ezagutzea da, gure Euskal Etxean egiten dugun lana eta gure hiri ederrak eskaini behar duen guztia erakustea; aldi berean, euskal kulturaren hainbat alderdiri buruzko ezagutzak ematen dizkigute, bertan gertatzen denaren ikuspegi eguneratua izateko aukera emanez”, azaldu du Denizek. Ildo horretan, sortzen ari den adiskidetasun eta lankidetza loturak sortzeko sustatu nahi dira.

Euskal etxearentzat esfortzu garrantzitsua da. Izan ere, lau pertsonek 15 egun hauetan egiten duten egonaldiaz arduratzen da. “Merezi duen ahalegina da” Emilia Zugastik azaldu duenez. Izan ere, Zugastiren hitzetan, “bertako jendearekin, euskal komunitatea ezagutu, konektatu eta zubi izatea da kontua. Hor dago aberasgarritasuna”.

.

Profil osagarriak

“Talde oso anitza hautatu dugu, aukeratutako kide bakoitza eremu konkretu batean espezializatuta dagoelako. Funtsezkoa da hori bakoitzaren prestakuntza eta ezagutzak aprobetxatzeko eta tailer ezberdinak garatzeko, hala nola, dantzak eta musika, euskara hizkuntza… baina baita gastronomia ere”, azaldu du Zugastik.

“Kontua ez da eskolak ematea, inolaz ere ez. Partekatzea da kontua, dena oso dibulgatzailea eta praktikoa izango dadin dinamikak sortzea”, adierazi du Iñaki Landa irakasle gasteiztarrak. “Proposamen honetatik gehien motibatzen nauena jendea eta bere eta bere familien istorioak ezagutzen jarraitzea da”.

Testuinguru honetan, euskal filologia ikasi duen Suinagak, adibidez, euskarari eta mitologiari lotutako tailerrak proposatuko ditu. Kultur aniztasuna sustatzen duten proiektuak bultzatu nahi ditu, eta horregatik esperientzia hau aberasgarria izango dela uste du.

Musikari ere arreta berezia eskainiko zaio, batez ere arlo honetako irakaslea den Fernandezen eskutik. Dagoeneko Argentinan izan da, Laguntasuna Elkartearekin batera Macachingo 2022ko Euskal Aste Nazionalean parte hartzen. Bere kasuan, asmoa euskal dantzen eta txistuaren inguruan lan egitea da, txikienentzako proposamen berezi bat egiteaz gain. Euskal Herriko kultura beste pertsona batzuekin partekatu nahi du, hori bere nortasunaren parte baita.

Ostadar taldeko kidea izateaz gain, irakaslea ere bada Larraitz Goikoetxea Urdangarin, eta dantza, musika eta gastronomia tailerretan parte hartuko du Villa Mariako egonaldian. Esperientzia honekin euskal diaspora barrutik ezagutu nahi du, baita euskal etxeek egiten duten lan garrantzitsua ere. Izan ere, hemendik aterako den segizioaren asmoa bidaia aprobetxatuz beste euskal etxeren bat ezagutzea da.

.

Euskal etxe “oso aktiboa”

1946ko irailaren 29an Villa Mariako Euzko Etxea sortu zen, bere 77 urteko lanean funtsezko topagunea izan dena euskal kulturarentzat eta bere garaian bere jaioterria atzean utzi zutenen ondorengoentzat.

Euskara, dantzak edo musika korala barne hartzen dituen tailerren egitarau bizia burutzen du, topaketen, hitzaldien eta proiekzioen antolakuntza ahaztu gabe. “Edizio honetan programa kalera atera nahi dugu eta herriak euskal etxean egiten duguna ezagutu dezala. Horregatik, bi norabidetan lan egingo dugu. Alde batetik, dagoeneko parte hartzen duen jendeari zuzendutako jarduerak egingo ditugu, eta, bestetik, herriko beste espazio eta erakunde batzuekin egindako jarduerak “, adierazi du Flor Deniz Euskal Etxeko kide eta Anima Zaitez elkarteko koordinatzaileak.

Diaspora eta EHren arteko Anima zaitez! programa abian da