TAILER BIZIAK eskualdeko emakume artisauak ikusgarritu eta bultzatzeko –

TAILER BIZIAK antolatu ditugu, Aiarako 4 herritan!

…

Urriaren 11tik azaroaren 9ra bitarte, 4 tailer ireki antolatu ditu Bor-bor Aiaraldeko feminismo elkarteak eskualdean barrena. Saio guztiak doakoak izango dira, baina labur.eus/tailerbiziak2024 helbidean eman beharko da izena.

“Tailer biziak” ekimena sortu du Bor-bor feminismo elkarteak. Udazkenean zehar garatuko dute egitasmoa, urrian eta azaroan zehazki. Guztira 4 jarduera izango ditu 2024ko edizioak, eta partaideentzat doakoak izango dira Arabako Foru Aldundiaren berdintasun diru-laguntzari esker. Hain zuzen, urriaren 11n abiatuko dute zikloa Laudioko Faktorian, Aitziber Duarte @harr.ika sortzailearen gidaritzapean keramika tailerrarekin, 18:00etatik aurrera.

Gainontzeko saioak larunbatetan izango dira: urriaren 19an Artziniegako udaletxe zaharrean Oihane MG @marratikat artistak collage tailerra eskainiko du; urriaren 26an Estitxu Perez @sigi-saga) istorio biziak egiteko tailerra dinamizatuko du; eta azaroaren 9an Aiarandreak batukada elkarteak danborrak astinduz gozatzeko saioa eskainiko du Faktorian, Munduko Kulturak Aiaraldean topaketaren baitan.

Apuntatzeko online fitxa bete beharko dute interesdunek labur.eus/tailerbiziak2024 helbidean.

Ekimenaren jatorria, sortzaileen azokan

Ekimenaren jatorria, Aiaraldeko emakume* sortzaileen azokan dago: “Hiru urte daramatzagu eskualdeko emakume sortzaileen azoka antolatzen, eta iazko balorazioan atera zen ideia; postuetako bat bizia zelako. Keramika egiten egon zen neska gazte bat, eta tailer biziak antolatzea ekarpen polita iruditu zitzaigun sortzaile eta artisau horien lana ikusgarritu eta bultzatzeko”. Modu horretan, azokako partaide guztiei galdetu zieten ea halako dinamika batean parte hartzeko prest egongo liratekeen, eta baietz erantzun zuten hainbatek. Hala, eskualdeko emakume sortzaileen lana aitortu, ikusgarritu eta babesteko planteatu dute egitasmoa, Bor-bor elkarteko kideek kontatu dutenez.

Informazio gehiago nahi izatekotan idatzi borborelkartea@gmail.com helbidera, edota @borbor_elkartea instagram kontura.

TAILER BIZIAK prestatu ditugu, eskualdeko emakume artisauak ikusgarritu eta bultzatzeko