Jaione Camborda zuzendari donostiarraren O_corno/The Rye Horn filmak (Espainia-Portugal-Belgika) irabazi du Donostia Zinemaldiaren 71. edizioko Urrezko Maskorra. Gainera, epaimahai ofizialak erabaki du zuzendari onenaren Zilarrezko Maskorra Tzu-Hui Peng eta Ping-Wen Wang zuzendariei ematea, Chun xing/A Journey in Spring (Taiwan) filmagatik, eta gidoi onenaren saria, berriz, María Alchéri eta Benjamín Naishtati ematea, Puan filmagatik (Argentina-Italia-Alemania-Brasil) –biek zuzendu dute film luzea–.

Interpretazio Nagusi Onenaren Zilarrezko Maskorra ex aequo jaso dute Marcelo Subiottok eta Tatsuya Fujik. Lehenak Alchéren eta Naishtaten Puan filmean jokatu duen rolagatik eta bigarrenak, berriz, Kei Chika-uraren Great Absence filmean egindako lanagatik. Taldeko Interpretazio Onenaren Zilarrezko Maskorra, bestalde, Hovik Keuchkerianentzat izan da, Isabel Coixeten Un amor (Espainia) filmean jokatutako rolagatik. Isabella Eklöfek zuzendutako Kalak filmak (Danimarka-Suedia-Norvegia-Finlandia-Groenlandia-Herbehereak) argazki onenaren saria jaso du (Nadim Carlsenentzat izan da), bai eta Epaimahaiaren Sari Berezia ere; izan ere, “inola ere ezagutzen ez genuen mundu batean murgiltzen gaitu. Antzezpenak harrigarriak eta enpatikoak dira, eta herrialdea eta haren gatazkak eta ezkututako edertasuna erakusten ditu egiazko zinema-artearen bidez”.

Laugarren urtez jarraian, Urrezko Maskorra emakume batek lortu du. Aurretik, hauek lortu dituzte: Beginning (Dea Kulumbegashvili, 2020), Crai nou/Blue Moon (Alina Grigore, 2021) eta Los reyes del mundo/The Kings of the World (Laura Mora, 2022). Gainera, O Corno Ikusmira Berriak programatik datorren eta Sail Ofizialeko saririk garrantzitsuena irabazi duen lehen filma da. Ikusmira Berriak Donostia Zinemaldiak, Tabakalerak eta Elías Querejeta Zine Eskolak antolatzen dute elkarrekin.

Palmaresean, film luzearen debut bat dago (Chun xing/A Journey in Spring), bai eta hiru bigarren film ere (O corno, Great Absence eta Kalak).

Sari horiek eman dituen epaimahai ofizialaren buru Claire Denis zinemagilea izan da, eta honako hauek izan dira gainerako epaimahaikideak: Fan Bingbing aktorea, Cristina Gallego ekoizlea, Brigitte Lacombe argazkilaria, Robert Lantos ekoizlea, Vicky Luengo aktorea eta Christian Petzold zuzendaria.

Galaren ondoren, Dance First James Marshen film berriaren (Erresuma Batua-Hungaria-Belgika) mundu mailako estreinaldia egin da. Gabriel Byrnerekin, Sandrine Bonnairerekin, Aidan Guillenekin, Fionn O’Shearekin eta Leonie Lojkinerekin batera etorri da Donostiara.

BESTE SARI OFIZIAL BATZUK

Bahadur The Brave Diwa Shah zinemagilearen lehen filmak (India) Kutxabank-New Directors saria jaso du, eta El castillo Martín Benchimolen lehen bakarkako film luzeak (Argentina-Frantzia-Espainia), berriz, Horizontes saria. Azken hori Berlingo Panorama sailean estreinatu zen, 2022an, Donostian, WIP Latam Industria Saria eta WIP Latam onenarentzako EGEDA Platino Industria Saria jaso ondoren. Zabaltegi – Tabakalera saria Eduardo Williamsen El auge del humano 3 / The Human Surge 3 filmarentzako izan da (Argentina-Portugal-Herbehereak-Frantzia-Brasil- Hong Kong-Perú), eta Ulises de la Ordenen El juicio / The Trial (Argentina-Norvegia-Frantzia-Italia) filmak aipamen berezia jaso du.

Nest The Mediapro Studio saria California Institute of the Arts School of Film/Videoko Nehal Vyasen Amma ki katha film laburrak (India) jaso du, eta sail horretako aipamen berezia Institut de Arts de Diffusioneko Marie Falysek zuzendutako  Entre les autres filmarentzat (Belgika) izan da.

Edizio honetan berreskuratu den Culinary Zinema Film Onenaren Saria Tran Anh Hungen La passion de Dodin Bouffant / The Pot au Feu filmarentzako (Frantzia) izan da, eta Eusko Label sari berria, berriz, Mikel Urretabizkaiak jaso du, lehena, Latxa filmagatik. Bigarrena Paolo Tizónek jaso du Soroborda filmagatik (Espainia).

Gainera, Euskal Zinemaren Irizar saria El sueño de la sultana / Sultana’s Dream (Sultanaren ametsa) filmak (Espainia-Alemania) jaso du, Isabel Herguera animaziozko filmen zuzendariaren lehen film luzeak. Bestalde, Fingernails Christos Nikouren bigarren filmak (AEB) –Sail Ofizialean lehiatu da hori ere– FIPRESCI saria irabazi du.

Donostia Hiria Publikoaren Saria, Perlak saileko ikusleek aukeratzen dutena, Veneziako zinema-jaialdia itxi zuen J.A. Bayonaren La sociedad de la nieve / The Society of the Snow filmarentzako (Espainia) izan da, eta Europako Film Onenaren Publikoaren Saria, aldiz, Io capitano / I’m Captain filmarentzako (Italia) izan da. Matteo Garronek zuzendari onenaren Zilarrezko Lehoia irabazi zuen Veneziako zinema-jaialdian film horrekin eta Seydou Sarr-ek, aldiz, interprete gazte onenaren Marcello Mastroianni saria. Azkenik, New Dorectors saileko Javier Maciperen La estrella azul / The Blue Star filmak (Espainia-Argentina) gazteriaren TCM saria lortu du.

O CORNO / THE RYE HORN

JAIONE CAMBORDA (ESPAINIA)

Ekoizpeneko herrialdea(k): Espainia – Portugal – Belgika

KALAK

ISABELLA EKLÖF (SUEDIA)

Ekoizpeneko herrialdea(k): Danimarka – Suedia – Norvegia – Finlandia – Groenlandia – Herbehereak

TZU-HUI PENG, PING-WEN WANG (TAIWAN)

CHUN XING / A JOURNEY IN SPRING Ekoizpeneko herrialdea(k): Taiwan

MARCELO SUBIOTTO (ARGENTINA)

PUAN

Ekoizpeneko herrialdea(k): Argentina – Italia – Alemania – Frantzia – Brasil

TATSUYA FUJI (JAPONIA)

GREAT ABSENCE

Ekoizpeneko herrialdea(k): Japonia

HOVIK KEUCHKERIAN (LIBANO)

UN AMOR

Ekoizpeneko herrialdea(k): Espainia

MARÍA ALCHÉ, BENJAMÍN NAISHTAT (ARGENTINA)

PUAN

Ekoizpeneko herrialdea(k): Argentina – Italia – Alemania – Frantzia – Brasil

NADIM CARLSEN (DANIMARKA)

KALAK Ekoizpeneko herrialdea(k): Danimarka – Suedia – Norvegia – Finlandia – Groenlandia – Herbehereak

HORIZONTES SARIA

ZABALTEGI-TABAKALERA SARIA

NEST THE MEDIAPRO STUDIO SARIA

Aipamen berezia

ENTRE LES AUTRES (Film laburra)

MARIE FALYS (BELGIKA) Ekoizpeneko herrialdea(k): Belgika