Zizur Nagusiko Udalak bat egin du otsailaren 8ko protestarekin –

Abenduan, epaileek beste epai euskarafobiko bat eman zuten; oraingoan, profil elebiduna kendu zioten Zizur Nagusiko Udaleko lanpostu bati.

Hala, heldu den otsailaren 8an, 17:30ean, elkarretaratzea antolatu dute Zizurko Euskara Taldeak, LABek, STEILASek, ELAk, Euskal Herrian Euskarazek, Behatokiak, EH Bilduk, Geroa Baik eta Euskararen Defentsarako Sareak.

Ba joan den ostegunean Zizurko Udalak elkarretaratzearen alde egin zuen, erakunde gisa. Geroa Baik eta EH Bilduk bozkatu zuten alde, eta UPNk, PPk, PSOEk eta ASk, kontra.

Oso gauza interesgarriak esaten ditu mozioak. Hona hemen:

MOZIOA, ZIZUR NAGUSIKO UDALEAN EUSKARA ERABILTZEKO ESKUBIDEA IZATEAREN ALDE

Iruñeko Administrazioarekiko Auzien 3. Epaitegiak profil elebiduna kendu dio Zizur Nagusiko Udaleko obretako langileen lanpostu bati. Udal obretako 4 langileetatik profil elebiduna zeukan bakarra zen, eta, orobat, Obren Zerbitzuko 9 postuetatik profil elebiduna zeukan bakarra.

Epaiak eman dituen arrazoietako bat da ez dagoela justifikaturik obretako langileekin euskaraz egin nahi izatea, nahiz eta Euskararen Legeak aitortzen duen eremu mistoko herritarrek badugula eskubidea Administrazioarekin euskaraz egiteko. Aurretik, Nafarroako Administrazio Auzitegiak adierazi zuen legezkoa zela postuak profil elebiduna izatea.

Epaitegiaren arabera badugu eskubidea Udalari euskaraz egiteko, baina ez euskarazko ahozko edo idatzizko erantzuna jasotzeko. Legearen irakurketa hori guztiz da murriztailea eta ilogikoa.

Epaileek ez dute aplikatzen Eskualdeetako edo Eremu Urriko Hizkuntzen Europako Gutuna. hauxe dio 7.2 artikuluan: “Eskualdeetako edo eremu urriko hizkuntzen aldeko neurri bereziak hartzea ez da hartuko eremu zabalagoa duten hizkuntzetako hiztunen aurkako diskriminazio-ekintzatzat”.

Gainera, epaiak Zizur Nagusiko Udala zigortzen du kostuak pagatzera. Beraz, legearen aurkako ebazpena emateaz gain, zigor ekonomikoa jarri dio Zizur Nagusiko Udalari.

Epaileen ebazpenak zizurtarren desadostasuna piztu du, eta elkarretaratze bat antolatu dute: otsailaren 8an eginen da, 17:30ean, Nafarroako Justizia Jauregiaren aurrean. Egoera honen aurrean, Zizur Nagusiko Udalak deliberatu du Udaleko hizkuntza-politikak honako printzipio hauei jarraitu behar diela:

1. Diskriminazioari aurre egiteko, eta bizikidetzan aurrera egiteko, beharrezkoa da hizkuntza-eskubideak errespetatzea eta bermatzea. Baldin berdintasunak izan behar badu jendarte berri bat eraikitzeko parametro bat, martxan jarri behar dira diskriminaziorik ez izateko eta berdintasuna bermatzeko politikak, baita euskara-hiztunen komunitateari dagokionez ere, zeina egoera minoritarioan baitago.

2. Ez baldin bada neurririk hartzen egungo hizkuntza-politikari dagokionez, egiten den hizkuntza-politikak oraingo egoera mantenduko du, ez da hizkuntza-irizpide egokirik hartuko euskararen erabilera sustatzeko.

3. Politika linguistikoa politika publiko transbertsala da, eta, beraz, euskara normalizatzeko, beharrezkoa da modu transbertsalean aritzea, Udaleko arlo guztietan, baita Hirigintzaren eta Obren arloan ere.

4. Hizkuntza-politikak orekatua behar du izan. Baldin soilik sektore edo jarduera sozial bakar batean normalizatu nahi bada euskara, prosezua desorekatu eginen da, eta eraginkortasuna galduko du, partez edo osoki. Ezinbestekoa da udal sektore eta arlo guztietan eragitea, eremu batean irabazitakoa ez dadin mugatu eta galdu; aitzitik, beste eremu batzuetara zabal dadin.

5. Normalizazio-prozesua soziala eta politikoa da. Normalizazio-prozesuaren dimentsio politikoa eta soziala estuki loturik daude. Hortaz, herritarren ekimenak eta ekimen politikoak norabide berean jo behar dute.

6. Normalizazio prozesuak progresiboa behar du izan. Hizkuntza politikak kontuan hartu behar du bilatzen duen helburua eta zein den abiapuntua. Horregatik, ezinbestekoa da aurkezten den prozesua egokitu dadila eremu baikoitzaren ezaugarri soziolinguistiko eta administratiboetara.

7. Normalizazioa prozesu adostutzat hartzen dugu. Zenbat eta adostasun gehiago izan, orduan eta gehiago finkatuko da prozesua. Horretatik, hizkuntza-eskubide guztiak bermatzeko, adostasun sozialak eta politikoak eraiki nahi ditugu.

Horrenbestez, Zizur Nagusiko Udalak erabakitzen du:

1. Erakunde gisa bat egitea egindako deialdiarekin: otsailaren 8an, 17:30ean, Nafarroako Justizia Jauregiaren aurrean, aipatutako epaia arbuiatzeko.

2. Lan egitea, helburua izanik udal zerbitzu guztiak bi hizkuntzetan ematea, gaztelaniaz eta euskaraz, herritar guztiei, hala eskatzen dutenean.