Maiatzeko aipagarrienak –

2024ko maiatzan zehar herritarrek Behatokira bidalitako hizkuntza eskubideen urraketen lagin bat, lorpenak eta zoriontzeak jaso ditugu ondorengo zerrendan. Zuk ere intzidentzia bat bidali nahi badiguzu, erabili Euskararen Telefonoa.

URRAKETAK:

» Irungo udaltzaingoan arreta euskaraz eskaini ahal dion inor ez dagoela erantzun diote herritar bati.

» Azpeitiako eta Zumarragako Lanbideren bulegoetan sarrerako segurtasun kideek ez dute euskarazko arretarik eskaintzen.

» Euskal Erlaitzako Herritarren Elkarteak esku-orriak frantses hutsean zabaldu ditu Urruñako errepidean.

» Osakidetzan euskarazko osasun-arreta eskatu arren, euskararen ezagutzarik ez duten medikuak onartu behar izan dituzte herritarrek.

» Eusko Jaurlaritzak bidalitako ‘Itsasoko ur-azaleko kirol arrantzarako baimena’ gaztelania hutsean heldu zaio herritar bati.

» Nafarroako Ogasuneko telefonoetan ez da euskarazko arreta bermatu (euskaraz dakien inor ez zegoela erantzun diote herritarrari).

» Ibarrako anbulategiko ordezko pediatrak ez du osasun arreta euskaraz eskaintzen.

» Zumarragako SEPEren egoitzan euskarazko arreta eskatu arren, gaztelaniaz egin behar izan dute herritarrek.

» Enpresa batzuetatik etxeetara bidaltzen diren iragarki orriak gaztelania hutsean zabaltzen jarraitzen da.

» Bilboko Udalaren Mugikortasun eta Jasangarritasun Sailetik hainbatetan gaztelania erabiltzeko eskatu diote herritarrari, euskaraz dakiena ez zegoela esanez.

» Nafarroako Unibertsitate Publikoak antolatzen duen eta Nafarroako Gobernuak eta Iruñeko Udalak babestu eta laguntzen duten Navarra LAN Party ekimenaren webgunea gaztelania hutsean ezarri dute.

» Donostiako DBUS zerbitzuan erabiltzaileak gaztelania erabiltzera behartuak izan dira beste behin, gidariak oinarrizko ulermen mailarik ere ez zuelako. Gidariak, gainera, «ahora sí, habérmelo pedido bien desde el principio» erantzun zion.

» Hainbat herritan aldi baterako bide-seinale edo oharrak gaztelaniaz ezarri dira.

» EAEn Lanbide Heziketako hainbat ikasketa A ereduan (gaztelaniaz) egiteko aukera baino ez dagoela salatu da.

» AENAren APPa ezin daiteke euskaraz erabili.

» Tolosako ertzain-etxean herritar batek ezin izan du salaketa euskaraz jarri agenteak euskaraz ez zekiela adierazi diolako.

» Osakidetzan euskaraz idatzitako kexaren erantzuna gaztelaniaz jaso du herritar batek.

» Iruñeko Hizkuntza Eskolako telefonoan ez dute euskarazko arreta eta informazioa bermatzen.

» Emakumezkoen Eibarko Hiria Sari Nagusiaren txirrindularitza probaren YouTube bidezko emankizuna oso-osorik gaztelaniaz izan zen, aurreko urteetan ez bezala.

 

ZORIONTZEAK:

» Ollokiko (Esteribar) Low Cost gasolindegiko langileei, euskaraz artatzeagatik.

 

LORPENAK:

» ERA higiezin agentziak Lapurdin zabaldutako propagandan euskara ere txertatu du.

» Liberty Seguros aseguru-etxeak gaztelaniaz bidali zuen mezuarekiko zuzenketak egin ditu herritarrari mezuak euskaraz bidaltzeko.

» Erandioko Udaleko obretako seinalitikan euskara txertatu den arren, ez da euskara lehentasunez erabili araudiak ezartzen duen bezala.

» Bermeoko Teilape aholkularitzak euskarazko dokumentuak jarri ditu bezeroen esku.

» Durangoko Udalaren erosketak jasotzeko armairu digitalak euskaraz ere erabilgarri jarri dituzte.

» Nafarroako Bideko Ama Birjinaren ospitaleko irakurketa txokoan euskaraz ezarri dituzte kartelak.

» Bizkaiko Foru Aldundiaren Interbiak sozietate publikoak bidesariak ordaintzeagatik ematen dituen tiketetako informazio guztia euskaraz ezarri dute.

» Nafarroa Arenak neurri ezberdinak hartu ditu euskarazko eskaintza egiteaz gaindi, zerbitzu guztien berri webgune zein sare sozialetan euskaraz ere eskaintzeko eta ekintza guztietan herrien euskarazko izenak erabiliko ditu.

Maiatzeko aipagarrienak