Guttiengoak gehiengoa gara eta ez gara uste bezain ttikiak

Guttiengoak gehiengoa gara eta ez gara uste bezain ttikiak –

Maialen Sobrinok Erran, Nafarroa Mendialdeko kazetan, kooperazioa eta hizkuntza uztartzen dituen egitasmo interesgarri bati buruz.

Esker mila aunitz izanen dira gure lehenbiziko h­i­tzak, aldian behin tarte hau Garabide Elkarteari eskaintzeagatik. Orri arteko estreinaldia dugunez, saiatuko gara argitzen nor garen eta zer egiten dugun.

Hasteko, Garabide Gobernuz Kanpoko Erakundea da eta kooperazioa da gure lan alorra. Duela dozena bat urte, sortu ginelarik, euskal lankidetza birpentsatu nahi izan genuen, kooperazioan nagusi den asisten­tzia­lismotik urrundu eta hizkuntza garapenaren zentrora ekartzeko. Hizkuntza lankidetza deitzen diogu horri, hain­ zuzen ere, munduko hizkuntza gutxi­tuen biziberri­tze prozesuen bidelagun izan nahi baitugu, euskararen esperientziatik abiatuta.

Guttiengoak gehiengoa gara eta ez gara uste bezain ttikiak
Garabide Elkarteko Maialen Sobrino eta Bortzirietako Euskara Mankomunitateko lehendakaria den Mentxu Peña.

Jakintza eta bizipenen trukea, nagusiki, Ameriketako hizkuntza komunitateekin egiten dugu: Mexikoko yukatango maiak eta nahuatl-ak, Guatemalako kaqchikelak, Ekuadorreko kitxuak, Boliviako aimarak eta guaraniak, Txileko maputxeak eta Kolonbiako nasak. Ho­rrez gain, Rifeko amazighekin, kurduekin eta Poloniako kaxu­bia­rrekin elkarlanean ari gara. Beraz, formazio eta aholku­laritza proiektuen bidez zuzenean paratzen ditugu harrema­netan euskalgintza eta komunitate indigenak, batzuetan Euskal Herrian, bertzeetan tokian-tokian. Horrela, batetik, esperientzia arrakastatsuak elka­rren artean partekatzea eta, bertzetik, etorkizunerako ametsak herrien arteko auzolanean eraikitzen hastea lortzen dugu.

Munduko hizkuntza gehienak desagerpenerantz joaki dira geroz eta agudoago, beraz, batera saiatu behar dugu denena den korapilo hau laxatzen. Euskal jendarteak azken hamarkadetan joera horren kontra egiten asmatu du, neurri batean bederen, eta hortaz uste dugu funtsezkoa dela euskaldunendako gure hizkuntzaren biziberritze prozesua ongi ezagutzea, balioan paratzea eta, bidelagunen ilusioaz bustita, euripean bada ere, bidea egiten segitzea.

Akitzeko, lerro hauek probestu nahi ditugu gure lana posible egiten duen Euskal Herriko laguntzaile sareari eskerrak emateko, bai bazkideei, baita enpresa eta erakundeei ere. Eskualdean Baztango Udala izan dugu oraintsu arte zutabe nagusia, eta berriki, Bor­tzirietako Euskara Mankomunitateak ere gehitu zaigu. Bihotzez, mila esker hizkuntza lankidetzaren aldeko apustua egiteagatik!

Guttiengoak gehiengoa gara eta ez gara uste bezain ttikiak
garabide, hizkuntza, kooperazioa
Salabardoa

Sarean, han eta hemen argitaratzen direnak harrapatzen ditut, gure interesekoak direlakoan.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude