Europar Batasuneko kontseiluari eskaria: Euskara, katalana eta galiziera hizkuntza ofizial gisa har ditzala –

Hizkuntzen berdintasunerako Europako sareak (ELEN) Europar Batasunek Kontseiluari eskatzen dio euskara, katalana eta galiziera Europar Batasuneko hizkuntza ofizial gisa har ditzala.

ELEN Europako lurralde-hizkuntzak sustatzeko eta babesteko lan egiten duen nazioarteko erakundea da. Gaur egun 175 erakunde kide ditu, 25 estatutan 50 hizkuntza ordezkatzen dituztenak, Iberiar Penintsulako hizkuntza guztiak barne. Oro har, ELENeko kideek hizkuntza horietako 40 milioi hiztun baino gehiago ordezkatzen dituzte, Europar Batasuneko biztanleriaren ia % 10, eta gobernuen eta nazioarteko erakundeen aurrean hizkuntza horietako hiztunen ahotsa izatea du helburu.

ELENek pozik hartu du euskara, katalana eta galiziera EBko eskubide osoko hizkuntza ofizial gisa hartzeko Espainiak egindako proposamena, eta bere kide Euskalgintzaren Kontseilua, Plataforma per la Llengua, Omnium Cultural, A Mesa pola Normalización Lingüística, Obra Cultural Balear eta Acció Cultural País Valenciàrekin batera, bihar Kontseiluan bildutako EBko estatu kideei Espainiaren proposamena babesteko eskatu die. ELENek gure erakunde kideekin batera urte luzez egin du kanpaina helburu horretarako.

Proposamenak gaur, irailak 19, eztabaidatu eta bozkatuko dira EBko Kontseiluan.

Hizkuntza ofizial gisa hartzeak onura praktiko ugari dakartza, baita estatus ofizialak ematen duen prestigioa ere. Era berean, EBri aukera emango lioke hizkuntza-aniztasuna babesteko eta herritarrei beren hizkuntza EBko erakundeekin erabiltzeko aukera emateko bere politikaren mailan izateko.

Hizkuntza horiek barne hartuz gero eragina oso positiboa izango da, eta urrats handia gure hizkuntzen onarpenerako eta normalizaziorako bidean, Europa mailako estatus ofiziala funtsezkoa baita hiztunen hizkuntza-eskubideak babesteko. Era guztietako 500 lege-xedapen baino gehiago daude EBko hizkuntza ofizialen presentzia eta erabilera eskatzen dutenak, bereziki kontsumitzaileei eragiten dienean. Eta hori oso garrantzitsua da, pertsonen eguneroko bizitzan zuzeneko eta zeharkako eragina duelako.

Azkenik, hizkuntzen inklusioa mugarri garrantzitsua izango da, EBk Europaren eta estatu kideen izaera eleaniztuna onartzen duela esan nahiko lukeelako. Hala ere, argi utzi behar da hori ez litzatekeela hizkuntzen gutxiagotzearen amaiera izango: oraindik bide luzea dago egiteko. Ildo horretan, fronte guztietan lanean jarraitzeko konpromisoa berresten dugu, gure hizkuntzei merezi duten aitortza emateko eta gure herritarren hizkuntza-eskubideak bermatzeko.

Europar Batasuneko kontseiluari eskaria: Euskara, katalana eta galiziera hizkuntza ofizial gisa har ditzala