2024ko balantzea eta 2025eko NAFARROA OINEZen aurkezpena

2024-11-07 16:00
Nafarroa Oinez
- Euskara

2024ko balantzea eta 2025eko NAFARROA OINEZen aurkezpena –

Zangozako Ikastolak Nafarroa Oinez urtearen balorazio positiboa egin du

Zuzendariak eta lehendakariak auzolana azpimarratu dute eta eskerrak eman dizkiete boluntario guztiei

Zangozako Ikastolak Nafarroa Oinez urteari amaiera eman dio gaurko balorazio prentsaurrekoan. Horretan Nagore Oria Telletxeak, zuzendari pedagogikoak, eta Carlos Arcelus Rotak, lehendakariak, parte hartu dute. Oria Nafarroako beste 14 ikastolei, Zangozako Ikastolako komunitateari eta babeslei eskerrak ematen hasi da: “Arduraz eta maitasunez bete dugu gure lana eta harro gaude gure komunitateaz”, baieztatu du.

Auzolana suspertzea Nafarroa Oinez 2024ko helburuetako bat izan da. Zangozako Ikastolak aurten 121 familiek osatzen dute, 100 pertsona gora antolaketa lanetan ibili dira eta Nafarroa Oinez egunean 700 boluntario inguruk lan egin zuten. Zuzendariak komunitateak egindako “lan erraldoia” azpimarratu du eta, halaber, Nafarroa Oinezek “ikastolako komunitatea indartu eta kohesionatu gaituela” adierazi du.

Bestalde, Carlos Arcelusen arabera, Zangozako Ikastolak Zangozaldean euskara sustatzeko lanean jarraituko du: “Euskararen, dibertsitatearen, auzolanaren eta etorkizun handiko proiektu kooperatibo eta bizi baten alde lan egiten jarraituko dugu”, esan du.

Nafarroa Oinez eguna urriaren 20an ospatu zen baina ikastolak oraindik lanean jarraituko du Oinez Basoa aurrera eramateko. Hurrengo hilabeteetan hiru proiektu egingo dira: zuhaitz landaketa, bi hegazti behatokien instalazioa eta saguzarrentzako kutxak jarriko dira. Arcelusek horien mustutzearen gonbidapena luzatu du.

Zangozako Ikastolak bere “desio onenak” opa dizkio Paz de Ziganda Ikastolari eta bere babesa erakutsi dio.

…

Buruz, bihotzez, oinez!

2025 urteko Nafarroa Oinezeko leloa izango da;
Logoa, deseraikia dagoen buru baten irudia.

Atarrabiako Paz de Ziganda ikastolak antolatuko du 2025eko Nafarroa Oineza. Gaur goizean iragarri dituzte Nafarroako ikastolen festa handirako aukeratutako leloa eta logoa. Leloa “Buruz, Bihotzez, Oinez” da eta logoa buru deseraiki baten irudia, non begi bat, sudur bat eta aho bat antzematen diren, bihotz bat erdian duela.

Halaber, Oinez dendak azaroaren 15ean irekiko ditu ateak Atarrabiako Kale Nagusian. Gainera, azaroaren 9an Uharteko Itaroa merkataritza gunean izango den aurkezpen ofizialaren berri eman dute. Leloaren eta logoaren aurkezpena Aintzane Apezetxeak, Paz de Ziganda Ikastolako ama eta komunikazio batzordeko kideak, eta zuzendaria den Iñaki Errozek egin dute. 2025eko jaiaren sinboloarekin agertu dira.

“Nafarroa Oinez aipatzen dugunean, sentimendu zurrunbilo bat sentitzen dugu. Ez da euskara bultzatzeko ekimen bat soilik, ez da gure hezkuntza proiektuaren aldeko bultzada bat soilik, Nafarroa Oinez milaka familiaren lana, boluntarioa eta parte-hartzailea da. Komunitatea eginez, sinisten dugun proiektu bat sortu eta aurrera atera nahi dugunaren isla da. Buru pentsalariak dituen proiektua, baina, batez ere, bihotzak dituena eta pausuz pausu aurrera jarraitzen duena: Buruz, bihotzez, oinez”

2025eko Oinezen helburuak hauek dira:

– “Ikastola izatea”, hezkuntza eredu propioa.
– “Herri izatea”, gizarte ekimen irekiko proiektua.
– “Euskara izatea”, gure kultura biziz, bere hedapenarekin konprometituta.
– “Hezkuntza izatea”, irakaskuntza prozesua bermatuz.
– “Gizarte izatea”, inguruko proiektuetan inbertituz.
– “Jasangarria izatea”, inguruko baliabide guztiak kudeatuz.

Leloa hiru hitzek osatzen dute:

BURUZ, buruarekin, arrazoiari erantzunez, helburu argi batekin, baina bere nortasunaren ezaugarriak ahaztu gabe.

BIHOTZEZ, bihotzez, sentimenduz eta emozioz. Izan ere, pertsona erdigunean jartzen duen proiektu bat da, bere emozio eta sentimenduei balio emanez. Euskara eta euskal kultura maite dutelako. OINEZ, mugimenduan, aurrera eginez, dinamikoa. Herritar mugimendu arduratsua direlako eta izaten jarraitu nahi dutelako: plurala, modernoa, ekologikoa eta osasuntsua.

Logoaren irudiari dagokionez, honek sudurra, bihotza eta ahoa lotzen dituen marra baten mugimenduan irudikatutako buru deseraiki bat erakusten du, kolore biziekin konbinatuta. OINEZ hitza nabarmentzen da, Ikastolen sarea eta kide izateko indartzea helburu duena, haien ordezkaritza aldarrikatuz.

Paz de Ziganda ikastolaren datuak:

52 urteko ibilbidea, hirugarren Oinez jaia, 780 familia, Nafarroa osotik etorritako 1206 ikasle eta 141 langile.

2025eko Nafarroa Oinezen helburuekin bat egiteko deia egin dute, bai urtean zehar, bai jai egunean, esandako helburuak lortzeko. Auzolanean pertsona ugari ari dira dagoeneko lan komisioetan lanean, besteak beste, familiak, ikastetxeko langileak, ikasle ohiak eta lagunak.

Paz de Ziganda ikastola 1970ean sortu zen, “Nuestra señora de Uxue”, bere aitzindaria, 1965ean sortu bazen ere, kokaleku askoren ostean eraikin nagusia 1995ean sortu zen, Atarrabia eta Burlatako mugen artean. Ikasleak Iruñerri osotik eta Nafarroa osoko beste herrietatik datoz. Beren adinak bi eta hemezortzi urte bitartekoak dira. Antolatuko duten hirugarren Oinez jaia izango da, lehena 1991n “Euskaraz bizi” leloarekin eta bigarrena 2010ean “Munduz mundu” leloarekin.