Zestoarren %63ak zekorketak antolatzearen alde egin du
Zestoako Udalak zekorketak antolatzen jarraituko du. Hala erabaki dute Zestoako herritarrek, galdeketan edo “eskaera-jasotzean”. 963 zestoarrek zekorketen alde egin dute, 542 pertsonak, aurka. Boto eskubidea zutenen %50,5ak hartu du parte galdeketan. Leire Etxeberria alkateak emaitzak errespetatuko dituela esan du: “Orain badakigu herriak zer nahi duen, beraz, zekorketekin jarraituko da”. Zestoako Udalak bere webgunean eskegi ditu zekorketen alde edo kontra egiteko galdeketan izandako emaitzak.
Muu Herri Ekimenak egin du zekorketen aurkako kanpaina, “odolik gabeko festen alde” lelopean. Sarean ere zenbait blog anonimo sortu dituzte zestoarrek zekorketen aurka. Eztabaida bolo bolo ibili da Zestoan azken asteetan. Azkenean, ekainaren 3ko eskaera-jasotzean, zekorketen aldekoek gehiengoa lortu dute, %63 hain justu.
ZuZeun ere galdetu nahi dugu: Zekorketen alde ala kontra? (Zekorketa hitzaren esanahia: Zezena edo zekorrari, banderillak sartzen zaizkion eta ezpatarekin hiltzen den ikuskizuna)
Aurka bakarrik ez, Zestoako zekoreketen aldeko bloga ere sortu dute, 17.000 bisita baino gehiago izan ditu gainera: http://amparitoerdikalean.blogspot.com.es/
Baina zer da hau? Bildukoak zezenketen alde? animalien torturaren eta espainiaren ikur den zezenketen alde? norbaitek azalduko al du..? txundituta nago, zearo!
Txantxangorria, zure galdera hain topiko, tendenzioso, tonto eta maltzurra denez, ez dut uste inork erantzungo duenik. Ze graziosoa zaren, benetan
bai darta, hemen Bilduri egiten zaio kritika oro da tendenzioso eta maltzurra. Gauza berberak kritikatu izan zaizkienean, ezker abertzalearen ingurutik, beste alderdiei, kritika sanoa eta koherentea izan da.
Baina, bitartean, Espainiako banderak eta zezenketak bizi bizi Bilduko udaletan. Aupa!
Oraingoan Dartari arrazoi eman behar. Bilduri bozka eman dietenen artean zezenketen aldekoak daude. Hori edonork daki, baita haiek ematen dituzten argudioak ere. Beraz “harridurarik ez”, ez bada zirikatzeko. Eta, bide batez, Zestoa dena ez da Bildu.
Garrantzitsuena herriaren borondatea ikustea eta errespetatzea.
Alderdi politikoen jokotik at idatzi nahi nuke. Bazterrera utzi gabe, noski, Bilduri kritika dakiokeela, nire ustez argudio indartsuekin, zekorketak antolatzeko politika.
“Zekorketa bai ala ez” galdera egitea zilegi da? Niri ezetz iruditzen zait. Zekorketarik ezin da egin, ezin zaion moduan ikaskideari bullinik egin. Kasu batzuetan erreferenduma ez da bidea. Herritarron arau moraltzat hartu behar litzateke lehena, bigarrena hartzen den moduan.
Noski, horrek eztabaida asko irekitzen du: animeliekin ezin da jolasik egin, eta animaliak, ondorioz, etxekotu eta gure mesederako erabil ditzakegu? Abeltzantza, hortaz, zilegi da?
Badakit Euskal Herri haragijale amorratuan halako eztabaidek etorkizun laburra izaten dutela. Ni haragijalea naizen arren, ordea, eztabaida osoari heldu behar zaiola iruditzen zait, zekorketetatik hasita.
Erreferendumak egitearen alde egotearen aitzakiarekin kasu honetan, Zestoan Pilatosena gertatu da; esku garbiketa penagarria.
.
2010ean Catalunyako Legebiltzarrean onartu zuten zezenketak debekatzea, argi dago zezenketak antolatzen ziren herriz herriko erreferendumak egin izan balute Catalunyan gaur egun jai basati hori egiten jarraituko zutela.
.
Zezenketa arruntak baina basatiago diren beste tortura motak erabiltzen dituzte beste herri batzuetan (esaterako; Tordesillasen). Argi dago egunen batean herri horietatik halako hilketa odoltsuak desagertzen badira ez dela izango herri horietan egin daitezkeen erreferendumen bidez.
.
Zestoan egin dena zuritzeko entzun dudan beste arrazoi bat izan da “ezin dela debekatu herriko tradizio bat”. Bale; bihar bertan egin dezagun erreferendum bat Irun eta Hondarribin Alardean emakumeen esku hartzeari buruz. Nola? Ezezt? Emakumeen eskubideak ukaezinak direla eta edozein tradizio gainetik daudela? Noski, ados nago, tradizio batzuk bidegabeak eta basatiak dira. Bidegabekeria horiei buruz tradizio horietatik nolabaiteko gozamen edota etekina ateratzen duenak erabaki behar du?
.
Espero dezagun hurrengo Eusko Legebiltzarrak Catalunyakoaren bidea jarrai dezan eta Zestoan ikusi dugun ikuskizun penagarria berriro ikus ez dezagun.
Kaixo Larrea
Zestoarra naiz, eta nolabaiteko zentzua hartu nion nik galdeketa egiteari. Katalunian zezenketak debekatzeko eskumena zeukanak debekatu ditu, Zestoako kasuan, udalak egin zezakena zezenketetarako plazarik ez utzi eta babes legalik ez ematea zen (eskumena Jaurlaritzarena da). Zestoan Bilduk erabaki zezakeen zezenketak antolatzeari uztea, besterik gabe, baina etorkizun batean alkatetzako alderdia aldatuko balitz, atzera egiteko aukera izango luke. orain arte Zestoan EAJ eta ezker abertzalea nolabait txandaka egon izan dira, eta Zestoako EAJk zezenketen aldeko nahiko jarrera garbia erakutsi izan du.
Gero dexenteko zartatekoa hartu dut, ez bainuen uste emaitza hau aterako zenik, eta are gutxiago atera den aldearekin. Baina beno, nik uste Muuk ondo egin duela bere lana, eta etorkizuneko hazia erein duela
Kaixo “Ni Neu”.
Eskerrik asko argibideengatik.
.
Ezagutzen ditut Zezenketen jai sadikoa “tradizionala” bilakatu den herri batzuk eta argi daukat herri horietako biztanle gehienak zezenak torturatu eta erailtzearen alde daudela, berdin Zestoan zein Tordesillas. Zestoan egindakoarekin EAJk ez du alkatetza berriro lortu behar zezenketekin jarraitzeko eta horrez gain ikuskizun sadiko honen aldekoen jarrera indartuta atera da.
.
Horregatik esaten nuen herriz herriko erreferendumena ez dela bide egokia basakeria honekin amaitzeko: “Espero dezagun hurrengo Eusko Legebiltzarrak Catalunyakoaren bidea jarrai dezan eta Zestoan ikusi dugun ikuskizun penagarria berriro ikus ez dezagun.”
Azaldu dizudana galdeketaren aurretik egindako hausnarketa zen. Noski, nik ez nuen espero emaitza hau, eta are gutxiago alde horrekin. Baina esplikazio bat badu, eta hori zezenketa zaleek egin duten kanpainan dago; guztia nahastu dute, indignazio haundiz hitz egin dute, inposaketaz… Musikaren galeraz, herriko bandaz, barrerez… Horiek izan dira emaitzaren giltzarriak nire ustez (mehatxuak, esango nuke), eta ez zezenketak bere horretan.
Zilegi al da, ordea, zekorketarik ezin egitea jendarte baten arau moraltzat ezartzea, jendarte horretan honi buruzko herri galdeketan zekorketen aldeko iritzia garbi asko nagusitu denean?
Ona iruditu zait galdera, Neu.
Pentsatzen jarri eta ez zait punpalasterrean ideia argirik bururatzen. Besteren batek zure galderari erantzuteko argitasunik baleuka…
Neu, I.Larreak goian esan duen bezala, zergatik ez dute erreferendum bat egiten hondarrabian eta irunen alardeen arira? ah, noski ezberdina delako…noski…
beraz zure galderaren erantzuna garbia da: komeni zaidanean BAI, eta komeni ez zaidanean EZ
politikari guztien jokoa, baita bildukoena ere…bistakoa da.
nik txundituta jarraitzen dut…
– “Zergatik ez dute erreferendum bat egiten Hondarrabian eta Irunen alardeen harira?”
Zekor bat. Emakume bat. Entenditzen?
– Katalunian zezenketak debekatu dituzte, bai, baina ez denak: Kataluniako herrietan hain maitatuak diren correbou-ak (alegia, gure plazetako sokamutur, betizu eta zekorketen parekoak) ez dituzte debekatu; seguru asko, Zestoan Bilduk kontuan hartu dituen motibo berak egon dira tartean. Alegia: Bozkatu ezazu horrelako mozio bat udalbatzan, eta ea gero nork irabazten dituen berriz hauteskundeak gehiengo osoarekin.
– Ni ez daukat nire burua “animalistatzat”, batzuek definitzen duten moduan behintzat. Hala ere, horrelako jaiak pixkanaka desagertu behar liratekeela uste dut, mendebaleko Europako parte gehienean aspaldi gertatu zen bezala. Hori lortzeko, herri-kontsulta estrategia egokia iruditzen zait, nahiz ez den beti ongi ateratzen, Zestoan bezala.
-“ Zekor bat. Emakume bat. Entenditzen?”
Zezenak publikoki torturatua eta pixkanaka pixkanaka erail gure auzokoen gozamenerako huskeria da, baina eskopeta batekin lepo gainean kaletatik mozorrotuta desfilatu ahal izatea askoz garrantzitsuagoa da. Fale, entenditzen dut.
.
-Catalunyan zezenketen alderik ankerrena debekatu dute; hau da, zezenak torturatu hil arte debekatu dute. Urrats bat agian egun batean erabat desagertzeko. Zestoan mantendu dute zezenketa osoa; hau da, zezenak torturatuko dituzte hil arte. Zuk, Amonamantangorri, kontrako esan erran (“seguru asko, Zestoan Bilduk kontuan hartu dituen motibo berak egon dira tartean”) Catalunyan eta Zestoan erabili diren motiboak, erabakia eta arriskuak erabat kontrajarriak dira.
.
Amonamantangorri : “Bozkatu ezazu horrelako mozio bat udalbatzan, eta ea gero nork irabazten dituen berriz hauteskundeak gehiengo osoarekin”. Interesgarria zure burutazioa. Batetik pentsatzeko motiboa da; hobe ez mindu gure auzokoen sentimendu eta zaletasun sadikoak botoak ez galtzeko. Bestetik, eta beste adibide bat jartzearren; zaramak biltzeko atez atekoa sistema zergatik ez dute erreferendumetan (erabat ados nagoelarik egindako moduan) erabaki herriz herri? Ez dago oposiziorik? Ea entenditzen dudan. Badirudi Catalunyako Legebiltzarrean erabaki hori hartu zuten alderdiek arrisku hori , botoak galtzearena, onartu zutela, eta hala ere ez dira ondoratu.
.
“Hala ere, horrelako jaiak pixkanaka desagertu behar liratekeela uste dut” Pixkanaka diozu? Nola? Antza denez Catalunyakoa ez da eredu egokia (ez du kontutan hartzen herrien iritzia) eta zezenketak egiten diren herri “tradizional”etan egin daitezkeen erreferendumen emaitzak zein izango diren badakigu.
.
“herri-kontsulta estrategia egokia iruditzen zait, nahiz ez den beti ongi ateratzen, Zestoan bezala”. Nik esango nuke Zestoakoa oso ondo atera dela; zezenak torturatzen eta erailtzen jarraituko dute bozka gutxi galduta (gazte eta “antisistema” gutxi batzuena), baina erabakia ez da “gurea” izan, “herriarena” baizik. Oleeeeee !!!
Ertz asko dituen gaia da.
Animalien sufrimendua ikuskizun bihurtzea ez al da delitua, berez? Horregatik debekatu ziren ahari topekak, ezta? Baina Espainian zezenen kontua sakratua da, ukiezina.
Hari horretatik tiraka, gizakien gozamenerako animaliei sufritu araztea ere ez litzateke zilegi izan behar. Askorentzat, animaliak jatea ikaragarrizko astakeria da, debekatu beharko litzatekeela uste dute. Granjetan animaliek asko sufritzen dute. Zer deritzozue?
Animaliei sufritu araztea debekatu, baita jateko ere, baina belar-jendea izorra dadila. Ez dakit ba!
Herri bati arau moralak inposatzeak badu bere zera. Beharbada zestoarrentzat zekorrek ez dute arimarik, eta ez dute sufritzen. Batzuentzat emakumeek ere ez dute arimarik izango, edo ez, behintzat, gizonen mailakoa. Burkak debekatu behar dira?
Irun eta Hondarribiko emakumeek eskubidea dute jaietan berdintasunez parte hartzeko, baina gehiengoak (seguru?) ez du nahi. Zer dira eskubideak? Jaungoiko (edo andragoiko) batek emandako zerbait? Ala, eskubideak eskubide, irabazi egin behar izaten dira? Badirudi baietz.
Erreferendumak erreferendum, Zestoako Bilduk iritzi argi bat izan eta esan beharko luke. Erreferenduma egitea ez dadila izan jarrera bat hartzea saihesteko aitzakia. Bilduk hartzen duen jarreraren arabera, erreferendumak zentzu desberdina har dezake. Adibidez, Zestoako Bildu zekorketen alde baldin badago, erreferenduma egiteak bere alde hitz egingo luke; zekorketen kontra baldin badago, inposatzeak ez lioke helburua lortzen lagunduko, gero hauteskundeak galdu eta zekorketak berrezarriko bailituzkete; beraz, erreferenduma egin aurretik lan handia egin beharko luke. Eztabaidarik egon al da Zestoan? Zergatik ez hasi ikastoletan animaliak errespetatzeko sentsibilizazio kanpaina batekin, beste kasu asko erakutsi, zekorketak espainiar kulturarekin lotu (seguru?), eta pixkanaka jendeari erakutsi?
Bide batez, ez birziklatzea eta zaborrak erraustea eskubidea al da? Erreferenduma egin behar da?
Tira, kaka nahas-mahasa, zekorrarena. Kontuz, zapaldu gabe!
Legea azkar batean begiratu nahi baduzu, absurdoak gorriz azpimarratuta, hemen: http://txokokrispis.wordpress.com/2012/05/30/legearen-absurdoa/
Zestoako Ezker Abertzaleak komunikatu bat kaleratu zuen galdeketaren aurretik, kontrako botoa eskatuz. Kanpainan hautagaiek onartu zuten beraiek zekorketen aurkakoak direla, baina Ezker Abertzalean (ez oinarrian soilik) denetik dago. Nik ez nuke espainiartasunarekin lotuko, historiari begiratu bat emanda ez baita sostengatzen (musika eta parafernaliaz haratago, eta ez da hori kentzea nahi zena), Zestoan 350 urte daramatzate zekorketek. Nik ezkertiar izaerari lotuko nioke gehiago, edo izaera faltari.
Eztabaidak, kalekoak ezin ekarri hona, norbaitek jakinminik izango balu:
http://muu-herriekimena.blogspot.com.es/
http://txokokrispis.wordpress.com/
http://amparitoerdikalean.blogspot.com.es/
http://novilladas.blogspot.es/
Hor ageri diren argudioak izan dira kalean ibili direnak. Hirugarrena taurino anonimo batena da (hondar gainekoari heldu gabe, hamaika buelta ematen dizkio inguruko parafernaliari; zezenketazaleek kanpainan egin duten bezala). Gainontzekoak kontrakoak dira, baina hauetariko bi azken asteetan sortu dira.
Eskerrik asko argibideengatik, hi heu.
.
Deus gutxi nekien gaiari buruz, orain zertxobait gehiago dakit: adibidez, Bilduko hautagaiek jarrera garbia zutela. Dena dela, badirudi herrian gaiak nolabaiteko pisua duela, eta alde horretatik uste dut ez dela nahikoa hautetsiek jarrera hartzea; ezker abertzaleak kontrako botoa eskatu omen du, seguru aski alde zuen jende bat kontra jarriz, eta ongi egin zuela deritzot. Ni Hondarribikoa naiz, eta alardearen txinpartak eztanda egin zuenean ezker abertzalean eztabaida egin zen, eta zatiketa isila bezain gogorra izan zen, Batasunan emakumeak desfilatzearen aldeko jarrera nagusitu eta plazaratu zelako. Urte askotan horren ondorioak jasan ditu, eta oraindik ere jasaten ditu, baina herrian arazo potoloa dagoenean adarretatik heldu behar zaio (tira, ez dirudi zekorketena alardearena bezain mingarria denik, giza jendearentzat).
Erreferenduma egin aurretik eztabaidarik egin ote den galdetuta, esan nahi nuen ea fororik egon ote den, mahai-ingururik… Ez dakit… Eztabaida, ez kaleko eta ziber-kafeko norgehiagoka. Tren-azkar-putarekin eskatzen dena, alegia.
.
Badakit gauza asko nahasten ditudala, baina uste dut sakoneko eztabaida demokrazia gauzatzeko eran dagoela (edo behintzat horretan ere bai), eta horrek dakartzan zailtasunetan.
.
Hitz-jario merkean gera ez dadin, argi utzi nahi dut zekorketen aurka nagoela. Sokamuturrekin eta abar ez daukat batere argi. Baina, batez ere, animali-jendearentzat eskatzen dugun errespetua belar-jendeak ere merezi duela pentsatzen dut. Baina tira, errespetuz ere akabatu daiteke, azken finean bizi-legea da: bizitzeko hil beharra. Ez dugu gosez hil nahi, ezta?
Ba ezta egon aurrez aurreko eztabaidarik. Behin koinziditu zuten Euskadi Irratian http://www.eitb.com/eu/audioak/osoa/839306/audio–zestoan-herri-galdeketa-festetako-zezenketak-bai-ez/. Baina hurrengo elkarrizketan, zezenketazaleek eskatu zuten antenan aldi berean ez egotea, hau da, elkarrizketak aparte egitea. http://www.eitb.com/eu/audioak/osoa/897706/zezenketen-inguruko-erreferenduma–faktoria/
Bestela, herri mailan, mahaian eseri eta debaterik ez da egon, kuadrillakoetatik aparte. Gainera, zezenketazaleak azken bi asteak arte ez dira apenas antolatu
“Neu” izeneko horri: zer da “jendarte”? Ni eztabaida honetatik konforme geratuko nintzeteke, animalismo guztiez haraindi, inork berriro erabiliko ez balu “jendarte” absurdo hori. “Gizarte” hitz aski normalizatua eta asumitua da, eta lupa zorrotza erabili behar da gero (zerebroan) hor atzean “gizon” ikusteko.
Bogotako hiritik dator notizia…:
Alcalde de Bogotá termina con las corridas en la plaza de toros Santamaría
“El alcalde de Bogotá, Gustavo Petro, anunció este miércoles que la plaza de toros de Santamaría (este) pasará a convertirse en un escenario de cultura y educación donde se darán cita literatos que dictarán clases a estudiantes de colegios públicos….”
[…] hilabete batzuk lagun batzuen artean eztabaidatu genuen Zestoan izandako bozketari buruz. 2012ko ekainaren 3an zezenketen aurkako herri plataformak antolatutako referendumean boto […]