Gernikan Urdaibaiko Guggenheimen kontra –

Milaka lagun manifestatu gara gaur arratsaldean Gernikan Udaibain egin nahi duten Guggenheim proiektuaren aurka. Irudiak berez mintzo dira:

Eguzki en X: “Jendetza Gernika! UdaiBAI BAI Guggenheim EZ!!! https://t.co/vJOkVSXA5M” / X (manifestazioa hastear dela).

Eguzki en X: “UdaiBAI BAI Guggenheim EZ!!! https://t.co/8f3xmnLkBA” / X (manifestazio bukaera).

Hemendik aurrera, hitzez hitz, manifestazioaren bukaera-ekitaldian irakurritako GUGGENHEIM URDAIBAI STOP MANIFESTUA.

Arratsalde on denoi, eta eskerrik asko! Guggenheim Urdaibai Stop plataformaren izenean, eskerrik asko gaur Gernikara etorri zareten guztioi!

Bigarren urtez, ozen esan dezakegu asko eta asko garela inposaketen aurrean makurtzeko prest ez gaudenok. Atxikimendu pilo bat jaso ditugu, eta gaur herritar asko eta asko batu gara. Hemen dago herria, ikusi eta entzun nahi duenarentzat!

EZ eta EZ esaten diogu Guggenheim Urdaibai proiektuari. STOP eta STOP esaten diogu Bizkaiko Foru Aldundiak, Eusko Jaurlaritzak, Espainiako Gobernuak eta Guggenheim Bilbao Museoaren Fundazioak gure eskualdean inposatu nahi duten proiektuari.

Harrigarriak eta argigarriak izan dira azken egunotan zenbait administraziotako agintarien ahotik entzun ditugun adierazpenak. Alde batetik, Bizkaiko Foru Aldundiak dio proiektua definitu barik dagoela oraindik; eta, hala ere, “alboratu ezineko” proiektutzat jotzen du. Are gehiago, nazio-proiektua dela ere esan digute. Bestetik, Euskadiko Alderdi Sozialistak ez omen du proiektua ezagutzen; eta, hala ere, Eusko Jaurlaritzaren parte izateko nahiak bultzatuta, proiektu hau jasotzen duen gobernu-akordio bat sinatu du.

Azkenik, kultura-sailburuak dio proiektu honek natura eta artea lotuko dituela; eta, hala ere, programa kulturalik gabeko kultura-proiektu bat da.

Eta, zelan ez, lehentasunezko proiektua da Eusko Jaurlaritza berriarentzat.

Nahaste-borraste horren erdian, guzti-guztiek bat egiten dute puntu batean: proiektu estrategiko bat da Guggenheim Fundazioarentzat. Eta, halere, Fundazioko kideek ez dute erabaki oraindik proiektuarekin aurrera egin nahi duten ala ez.

Noren eskuetan dago gure etorkizuna?

Gure eskualdea etengabeko gainbehera ekonomikoan dago, eta gure etorkizuna gero eta ilunago ikusten dugu. Horri buelta emateko, zer-eta turismo masifikatua bultzatzen duen makroproiektu bat inposatu nahi digute. Non-eta hemen, Urdaibaiko paduretan, biosfera-erreserba baten erdi-erdian. Gainera, sinestarazi nahi digute herritarrongan pentsatuta izan dutela burutazio hori, eta horixe dela eskualdeak duen irtenbide bakarra.

Baina ez, hori ez da egia. Proiektu hau fundazio pribatu baten ekimenez eta haren neurrira egina dago, eta haren gurariak asetzea du helburu. Guri prekarietatea besterik ez digu ekarriko. Onartezina da diru publikoa gutxi batzuen probetxurako erabiltzea, eta onartezina da diru publikoa ingurumena suntsitzeko baliatzea.

Eta onartezina da, baita ere, horrelako proiektu batean pentsatzen hastea herritarron parte-hartze erreala bermatu barik, eskualdeko biztanleon nahi eta beharrak kontuan hartu barik eta ingurumen-azterketarik egin barik. Inposatuz!

Ez gaude ba inposiziorako sasoian. Gobernantza-eredu demokratikoa behar dugu, eta gure eskualdearen etorkizuna guk geuk erabaki nahi dugu, elkarrekin hausnartuz, baldintza barik. Hutsetik hasita.

Eraiki dezagun guztion artean etorkizuna: bidezkoa eta atsegina, pertsonen bizitza eta natura erdigunean jarriko dituena. Dena ez da dirua, Urdaibai ez dago salgai!!

Amaitzeko, Guggenheim Urdaibai Stop plataformak eskaera zuzen eta zehatza egiten die administrazio publikoei eta agintari politikoei: gelditu bihar bertan proiektu hau bideragarri bihurtzeko egiten zabiltzaten urrats administratibo eta ekonomikoak. Ez alferrik erabili diru gehiago etorkizunik ez duen proiektu bat bideragarri egiten. Sekula ez da bat etorriko herritarren eta naturaren beharrizanekin.

Urdaibai ez dago salgai!

Eskerrik asko!

Gernikan Urdaibaiko Guggenheimen kontra  Gernikan Urdaibaiko Guggenheimen kontra