Kultura-sektorean lan egiten duten profesionalek, sortzaileek eta artistek aliatu bat izan dezakete ingurune digitalean COVID-19ak sektorean eragin dituen ondorio larriei aurre egiteko.

Ezohikoa dirudien arren, sektoreko profesional eta proiektu askok ez zuten webgune propiorik orain arte.

Lagungarri izan dakieke orain? Nola?

Bizi dugun egoera larri honetan, kultura izango da, beste behin ere, kaltetua. Eta kultura-sektorean lan egiten duten profesionalek, behin ere bai, ondorioak ordainduko dituzte. Errua ez da COVID-19rena. Arazoa sakonagoa eta egiturazkoa da.

Baina ez nator honi buruz zuzenean hitz egitera; egoerari irtenbide bat bilatu nahian burutu daitezkeen ekintzei buruz mintzatuko naiz.

Egoera berriaren aurrean, artistek inoiz baino gehiago beharko dute beren lana ezagutzera eman eta zabaldu. Ikusgaitasuna lortzeko eta merkatuan kokatzeko estrategiak garatu beharko dituzte. Testuinguru horretan, baliabide teknologikoak aliatu bihur daitezke eta hori lortzeko tresna izan daitezke.

Arraroa badirudi ere, gaur egun oraindik artista edota kultur proiektu askok ez dute aktibo digital propiorik. Askotan, askok galdetzen didate ea beharrezkoa den webgune propio bat izatea. Ziurrenik, orain arte ez dutelako behar izan, eta ingurune fisikoan ondo moldatzen zirelako baliabideekin.

Baina COVID-19a iritsi da eta paradigma irauli du.

Presentzia digitala izateko beharra agerian geratu da sektore guztietan. Horrelako baliabideak zituztenek aurrera egiteko modua izan dute. Batzuek egoerari aurre egiteko eta jarduteko modu azkarrak garatu dituzte; beste batzuk, berriz, bidean geratuko dira.

Eta kultur arloaren kasuan? Nire ustez proiektu artistiko, sortzaile eta artistek orokorrean bazuten behar hau birusa heldu aurretik. Orain, zeresanik ez.

Horri buruz arituko naiz oraingoan: kultur arloko jarduera edo ekimena bada zurea eta oraindik ez baduzu argi webgune bat sortu behar duzun hori zabaltzeko, bertan azalduko dizkizut hori egiteko arrazoiak. Eta lanari ekingo diozu…

.

Arte edo kultura proiektu baten webgunea, beharrezkoa da?

Proiektu kultural edo artistiko berri batean lan egiten dudanean, galdera horrek jauzi egiten du ia beti uneren batean, bere aldaera guztietan:

• Gaur egun, beharrezkoa da webgune bat garatzea nire proiektua ezagutzera emateko?
• Dagoeneko Facebooka (edo bestelako sare soziala) badaukat, webgunea ere egin behar dut?
• Nola egingo dut? Zer kontatuko dut?

Gainera, gai horri ere ez zaio garrantzi handirik ematen, eta aurrekontua dagoenerako edo proiektua jada martxan dagoenerako utzi ohi da. Baina hau akats handia da. Hainbat arrazoiengatik.

.

Zure webgunea hedapenerako tresnarik onena bihurtuko da

Webgunea da zure proiektua ezagutarazteko erabiliko duzun tresna. Zure publiko guztiengana hurbilduko zaituena, edozein motatakoa izanda ere zure proiektua. Eta beharrezkoa da kultura- eta sormen-jardueretan ere horretaz kontzientziatzea.

Pentsatu une batez erabiltzaile gisa: produktu edo zerbitzu bat ezagutzen duzunean edo erosi nahi duzunean, zer egiten duzu lehenik?

Interneten bilatzen duzu.

Hausnartu, beraz, une batez honi buruz.

Ez duzu uste gauza bera gerta daitekeela zure proposamen sortzaile, kultural edo artistikoarekin? Berdin dio proiektua bakarka bada edo elkarte handi bat bazara. Zure audientziaren zati handi batek (gero eta gehiago) interneten bilatuko zaitu.

Eta ezer ez badu aurkitzen? Eskaintzen duzuna erakusteko aukera galduko duzu.

Eta aurkitzen duena ez baduzu zuk argitaratu? Okerragoa ere izan liteke: agian badira zuri edo zure proiektuari buruzko edukiak errealitatearekin bat ez datozenak edo positiboak ez direnak, eta hor daude. Eta zuk neurririk hartu gabe.

Hori da, beraz, webgunea zure tresna estrategiko handitzat hartzeko lehen arrazoia.

MOTA GUZTIETAKO JARDUEREK ETA PROIEKTUEK DUTE LEKUA

Internetek eskaintzen digun abantaila handienetako bat da proiektu artistiko eta kultural guztiek lekua dutela.

Berdin dio oraindik profesionala ez bazara eta zure jarduera artistikoa ez bada sostengua irabazteko bidea. Ezta artearen, musikariaren, aktorearen edo idazlearen profesionala bazara ere … kulturaren eta sormenaren sektoreko lanbide batzuk aipatzeagatik bakarrik.

Jarduera guztiek aukerak dituzte interneten, eta denentzako aukerak daude. Are gehiago, aprobetxatu zure proiektuak duen izaera artistiko eta sortzailea webgunearen bidez are gehiago garatzeko.

Abantaila bat bezala senti ezazu, mundura irekitzeko aukera, edozein une eta lekutan.

.

ZURE PUBLIKOAREKIN KOMUNIKATZEKO BIDEA

Zuk erabakitzen duzu zein eduki eta baliabide eskaini nahi dituzun zure webgunean.

Informatzeko, zabaltzeko eta zure publikoari nahi duzuna kontatzeko aukera ematen dizun tresna handitzat hartu behar duzu.

Gainera, guztiz bateragarria da webgune bat edukitzea eta sare sozialetan zure kanalak osatzeko profilak izatea. Eta komunikazio-estrategia on bat da zure orrian edukiak argitaratzea eta sare sozialetan profilak erabiltzea horiek zabaltzeko.

.

ZURE DOMEINUA, ZURE ETXE DIGITALA

Beti esaten dut zure webgunea zure etxe digitala bezalakoa dela: zu nolakoa zaren erakusteko eta nor zaren eta zer egiten duzun kontatzeko espazioa. Eduki edo baliabide gehiago edo gutxiagorekin, baina zure etxe digitala da.

Webgune horrek hosting edo alojamendua eta domeinu bat (.eus, .com, .org …) dituen bitartean, espazio propioa izango duzu sarean. Zurea.

Domeinua, bestalde, zure nortasun digitala bihurtzen da. Beharrezkoa eta ezinbestekoa da, dagoeneko egin ez baduzu, zure izena edo zure proiektua Interneten erregistratzea.

Inork ez diezazula kendu, baina batez ere zure proiektuak Interneten nortasun propioa izan dezan. Ez galdu aukera zuzenean .eus luzapenerako zure domeinua erreserbatzea.

Eta zure etxean zuk agintzen duzunez, zure webgunean nahi duzuna eta nahi duzun bezala erakutsi ahal izango duzu. Eta, garrantzitsuena, bilatzen zaituenari zuk kontatu nahi duzuna eskainiko diozu.

.

ZURE ETXEA DENEZ, EZ DIZUTE KENDUKO.

Eguneroko kontu garrantzitsua da hori proiektuekin lan egiten dudanean: zuetako askok esan didazue dagoeneko baduzuela orri profesional bat Facebooken edo Twitterren, eta ez duzue ulertzen webgune bat ere eduki behar denik.

Nahiz eta kasu zehatz bakoitza modu espezifikoan aztertu behar den eta eskaintza, puntu batean tematzen naiz eta batzuetan oso astuna jartzen naiz (aitortzen dut): zure webgunea zurea izango da (alojamendua eta domeinua ordaintzen duzun bitartean) eta inork ez dizu kenduko. Baina beste plataformak, hala nola sare sozialak eta beste batzuk, Facebook, Twitter, YouTube … ez dira zureak. Hori oso argi eduki: denok gaude “maileguan”.

Gure profilak doan sor ditzakegu, plataforma horientzako produktua garelako. Gure datuen eta horien ustiapenaren truke, plataforma horiek (oraingoz) sarean doako presentzia izateko aukera eskaintzen digute.

Baina egunen batean jokoaren arauak aldatzen badira eta erabakitzen badute hau jada horrela ez izatea, edo uztaitik pasatuko gara, edo alde egin beharko dugu.

Eta kontziente izan behar dugu beraien baldintzekin jokatzen dugula eta plataforma horietan ekintza ezberdinak gauzatzeko modua edo eskaintzen dituzten baliabideak alda ditzaketela eta guk, erabiltzaile bezala, ezin dugula ezer egin.

Beraz, zure estrategia zure eduki guztiak horrelako plataformetan bakarrik argitaratzean oinarritzen bada, jakitun izan behar duzu zer arriskatzen ari zaren.

Imajinatu une jakin batean Facebookek, adibidez, erabakitzen duela jada ez dituela orrialdeetako argazkiak erakutsiko: ideia bat egiten duzu zuretzat zer suposatuko lukeen?

Gogoeta egin horren inguruan, eta berriz diot: sare sozialetan plataformen produktu bat gara, eta edozein unetan gauzak alda daitezke.

.

SARE SOZIALEN IRISMENA

Aurreko puntuarekin lotuta, kontuan hartu behar da sare sozialek, bereziki Facebook/Instagramek, gero eta irismen gutxiago eskaintzen digutela modu naturalean eta organikoan. Horrek esan nahi du orrialdeetan argitaratzen diren edukiak gero eta erabiltzaile gutxiagorengana iristen direla modu naturalean.

Zein da arrazoia? Facebookeko algoritmoa gure edukiak gure orrien jarraitzaileei erakusteko diseinatuta dago, baina errezeta sekretuan eduki horiek erabiltzaile gehiagorengana edo gutxiagorengana iristea eragiten duten osagaiak ditu, ikusgarritasun handiagoa edo txikiagoa dutenak.

Eta egiaztatuta dago irismen hori gaur egun txikiagoa dela.

Zergatik? Funtsean, Facebookek gozokia ahoan jarri zigulako eta, gozatzen eta zaporea ateratzen hasi garenean, jokoaren arauak aldatu dizkigulako; orain, kutxatik pasatu eta ordaindu egin behar da, gure edukiek ikusgarritasuna lor dezaten.

Beraz, Facebooken garatutako estrategiekin kontuz ibiltzeko beste arrazoi bat da hau.

.

WEB ORRI BAT IZATEAREN ABANTAILAK

Azaldu dizudana errepasatuz, ondoriozta dezakegu proiektu artistiko edo kultural baten web orri bat edukitzea abantailaz betetako erabakia dela.

• Irudi profesional bat eta marka bat eskaintzea.
• Komunikazio-kanal propioa izatea.
• Marka, proiektua edo dena delakoa kokatzeko posizionamendu tresna bat izatea.
• Zure lanari balioa ematea.
• Beste profesional edo proiektu batzuengandik bereiztea.
• Interneteko bilatzaileetan hobeto kokatzea.
• Zure portfolioa erakusteko plataforma bat izatea.
• Hedapenerako eta harremanetarako tresna beti aktibo izatea, edozein lekutatik eta edozein unetan. Internet beti dago zabalik.
• Dakizun hori, egiten duzuna, zure espezializazioa frogatzeko kanal gisa erabiltzea.
• Zure audientzia ezagutzea, eta zein den haien jokabidea.
• Zure produktuak edo zerbitzuak saltzea, hala behar izanez gero.

Ia ezer ez, ezta? Konturatzen zara zein estrategikoa bihur daitekeen?

.

WEB ORRI BAT GARATZEAK DAKARRENA

Puntu honetara iritsita, imajinatu ahal izango duzu webgune bat garatzeak gutxieneko lan eta inbertsio bat eskatzen duela.

Kontuan hartu beharko dituzun oinarrizko alderdiak errepasatuko ditugu, zer gastu eta denbora inbertitu beharko dituzun jakin dezazun.

.

HOSTING-A ETA DOMEINUA

Aipatu dizkizut bi alderdi tekniko horiek.

Zure webguneak izen bat (domeinua) behar du, bai eta hura osatzen duten fitxategi guztiak interneten ostatatuta egongo diren gune bat ere (zerbitzu hau hostinga da).

Hau ez da inbertsio handia, eta merkatuan aukera eta alternatiba ugari daude.

Aukeraketa behar duzun espazioaren eta baliabideen araberakoa izango da, noski, segun eta zure proiektua nolakoa den eta zelako aurrekontua duen.

Eta hostingari dagokionez, kontratatu aurretik erabaki beharko duzu leku asko beharko duzun, irudiak edo bideoak hartzeko, adibidez; erabiltzaileen trafikoa etengabe eta eskari handiarekin jasotzea espero duzun, eta abar.

Gomendagarriena da arlo honetako profesional bati gai horiek planteatzea eta nola hasi aholkatuko dizu.

.

Edukiak

Zure proiektua erakusteko webgune bat garatzea erabakitzen baduzu, webgune hori edukiekin elikatu behar dela aurreikusi beharko duzu.

Batzuk estatikoak izango dira, ez dira etengabe aldatuko. Mota horretako edukia da zure aurkezpenari, kontaktuari edo webgunean agertzea nahi duzun informazio iraunkorrari buruzkoa.

Eta badira beste eduki mota batzuk ere, bizirik egotea gomendatzen direnak eta etengabe eguneratzen direnak.

Mota horretan sartzen dira proiektuen portfolioak edo galeriak. Zure proiektua eta egiten duzuna erakusteko webgune bat garatzea erabaki baduzu, atal hori eguneratuta egotea izango da egokiena, eta, gertatzen diren heinean, berrikuntzak sartzea.

Bigarren eduki mota horretan, bloga ere etengabe eguneratu daiteke.

.

Bloga

Webgune batean blog bat edukitzea modu bikaina izan daiteke zure jarduera artistikoaren egunerokoa eskaintzeko eta erabiltzaileei egiten duzuna erakusteko.

Gainera, Interneteko bilatzaileetako posizionamenduari dagokionez, bilaketen emaitzetan agertzeko tresna estrategiko bihur daiteke.

Edonola ere, zure webguneak edukiak sortzeko lan bat beharko duela aurreikusi beharko duzu.

Zuk zeuk sortzeko gaitasunik ikusten ez baduzu, komunikazioaren eta marketin digitalaren profesionalek horrelako lanak egiten ditugu.

.

PLATAFORMA

Garapenarekin hasi aurretik erabaki beharreko beste alderdi bat zure webgunea zein plataformarekin sortuko duzun erabakitzea da.

Edukien kudeatzailea (CMS izenekoa, Content Management System siglak) zure webgunea eraikitzeko erabiliko duzun programa da.

Alternatiba desberdinak daude, hala nola edukien kudeatzaile baten neurrira egindako garapena edo gaur egun merkatuak eskaintzen dituen aukera ugarietako bat aukeratzea: WordPress, Wix, Site123, Webnode,…
Gainera, zure obra webgunetik zuzenean saldu nahi baduzu, horretarako plataforma espezifikoak aukeratu beharko dituzu, hala nola WordPress, Joomla, Drupal edo Magento.

Nire gomendioa? Garatu ezazu zure webgunea WordPressen.

.

ZERGATIK GOMENDATZEN DIZUT WORDPRESSEN GARATZEA?

Abantaila ugari dituen plataforma da:

• Behin bakarrik egingo duzu lan. WordPress da gaur egun webgunea garatzeko plataformarik garrantzitsuena.
• Sendoa eta segurua da.
• Lana erraztuko dizuten doako milaka baliabide eskaintzen ditu.
• Zure webgunea hainbat hizkuntzatan sor dezakezu.
• Praktikoa eta arina da.
• Erabiltzeko erraza, baita programazioari buruzko ezagutzarik ez baduzu ere.
• SEO posizionamendurako baliabideekin prestatua.
• Arduraduna: zure garapena edozein gailutatik izango da eskuragarri.

.

ORAIN PUNTUEUSEK ATE BERRI HAU ZABALTZEN LAGUNDU NAHI DIZU

COVID-19aren krisia sortu eta gutxira, PuntuEUS Fundazioak laguntza eskaini nahi izan zuen eta eskaintza berezi bat sortu zuen zure jarduera edo proiektua digitalizatzeko beharrezko baliabideak izan ditzazun: .EUS domeinua eta zerbitzaria kosturik gabe lehen urterako.

Beraz, aukera ederra aprobetxatzeko zure eskura.

Honaino, kultura-, arte- edo sormen-proiektu baterako webgune baten garapena planteatzeak dakarrenari lehen hurbilketa.

Nire aholkua? Erabaki dezazun, zalantzarik gabe: tresna estrategiko perfektua da, irismena eta ikusgaitasuna ziurtatzeko eta Interneten posizionamendu ona lortzeko.

Beraz, ekin lanari!

Ingurune digitala kultur sektoreko profesionalentzat aliatua Ingurune digitala kultur sektoreko profesionalentzat aliatua Ingurune digitala kultur sektoreko profesionalentzat aliatua