Herri lurretan bertako 700 zuhaitz landatu ditugu auzolanean –

Aurreko asteburuan, martxoaren 2an, Eguzkik deituta, haritz eta pagoen landaketa herrikoia burutu genuen Munttoko magal batean. Leitzaran balaran, Andoaingo Mendiak izeneko herri lurren parte da zeinak mendi babesle izendatuta daude.

Landaketa 1,9ha-ko zaharkitutako pinudia zen batean egin dugu, auzolanean lurzoru horren heren batean 700 pago eta haritz landatuz. Beste bi herenaz, sailaren prestaketa lanez eta landareez Gipuzkoako Foru Aldundia arduratu da

Landaketak bi helburu nagusi ditu:

• Basoen garrantziaz kontzientzia hartzea, egoera onena egoteak gizarteari ematen dizkion onura ugariaz jabetu gaitezen.
• Orain arte herri lurrak kudeatzeko era aldaketak aldarrikatzea.

Aurreneko puntuari dagokionean, basoak betetzen dituzten funtzioei ekosistemikoak esaten zaie eta nagusienak: CO₂ oxigeno eta biomasa bilakatzea, klimaren gorabeheren ondorioak apaltzen laguntzen du, ura araztu eta erregulatzen laguntzen du, uholde naiz luizi arriskuak arindu, gordailu genetikoa da, egurra ekoizten du, aisigune bihurtzen da… Pentsa guzti horiek dirutan itzuli behar bagenitu…

Bestalde, ziurrenik herritar askok ez dute jakingo Andoaingo Udala 668 ha-ren jabe dela Leitzaranen, horietatik gehienak Onddo-Aizkorriko mendien magalean eta Ubaran errekaren bailaran daudenak.  Andoaingo Mendiak bezala ezagutzen dira, kudeaketaz Gipuzkoako Foru Aldundia arduratzen da eta herri onurako mendiak bezala izendatuta daude. Izendapen horren ondorioetako bat basoen funtzio ekosistemikoak era egokian  betetzeaz ziurtatzea da.

Eta hori gaur egun ez dela gertatzen uste dugu guk. Izan ere, egun bertako espezieak %20 baino ez dira heltzen eta kanpokoak berriz, gehienak koniferak -460 ha-tik gora- %71 gainditzen dute ( gainontzekoak mendiko belardiak dira). Gainera sail gehienak etekina lortzeko asmoz kudeatzen direnez, maiz erabat soiltzen dira sailak, baso helduak  izatera iristeko aukera errotik zapuztuz, haizearen higadurari bidea libre utziz, baita euri urarenari ere, inguruko bizidun guztietan desoreka eragin…

Guzti hau kontuan hartuta, Udalari eskatu diogu Andoaingo Mendien kudeaketan zuzenki parte hartzea eta kontserbazioaren aldeko apustua egin dezala, ustiaketarena alde batera utziz. Bide horretan, landaketarekin kudeaketan eskatzen dugun norabide aldaketa aldarrikatu nahi dugu.

Bizitzeko Andoain eraikitzen!  Bizitzeko Lurra eraikitzen!

Eguzki Talde Ekologista eta Antunuklearra, martxoaren 4an.

Oharra: “Andoaingo Mandien Antolamendu Plana” izeneko txostenetik eta “EAEko Baso Inbentario”tik ateratakoak dira.

Herri lurretan bertako 700 zuhaitz landatu ditugu auzolanean