Herri-lotsa –

Rikardo Arregik Deia egunkarian.

Ane Lindaneri lapurtu diot izenburuan datorren hitz hori. Hitz berri bat, nik behintzat inoiz entzun edo ikusi gabea, Ane Lindanek asmatu eta euskarari, guztioi, oparitu ziona, ziguna, X sare asozialean, Gasteizen kafetegi-edo kate ospetsu baten inaugurazio egunean ate aurrean pilatu zen jende ilararen irudiei iruzkina egiteko. Herri-lotsa. Auzo-lotsa hitzaren ereduari jarraituz eraikia, ados, baina zabalagoa eta izugarriagoa.

Irudiok ikusi nituenean ez nintzen gehiegi harritu, kezkatu ninduen ez harritzearenak, esaten baitute harridurak gazte mantentzen gaituela, eta ni adin arriskutsuan nago. Tira, apur bat harritu nintzen ilara kale osoan zehar luzatzen baitzen, kontuan hartzen bada, gainera, kale horretan lauzpabost taberna eta kafetegi daudela (Hungaria tabernako zerbitzaria adeitsua eta euskalduna da, bide batez). Baina ergelkeriak ez du mugarik. Agian zerbait doan ematen dute inaugurazio egunean, pentsatu nuen, katilu bat edo edari bat, eta askok denbora saltzeko prest daude edozein tontakeria eskuratu ahal izateko. Edo, besterik gabe, moderno eta berezi sentitzen dira kafetegi horretan lehendabiziko egunean sartu zirela gero esateko. Herri-lotsa.