Hauteskunde-kanpainari ekarpena
Hauteskunde-kanpainari ekarpena –
Gure kalean ez soilik ez dago zakur-kaka jasotzeko ohiturarik; gainera, gaizki ikusia dago. Gure bizilagun batek txakurtxo polit bat dauka, Karlota. Behin batean, Karlotaren gorotza poltsatxoan sartzen ari zela, hamahiru urte inguruko mutila igaro zitzaion albotik bizikletan ziztuan, eta garrasi egin zion: “¡deja eso, que no hay que recoger, déjalo ya!”
Ataritik irten bezain laster, bertan topatuko duzu txakur-kaka mordoa, eta saihestu eta ez zapaltzeko erne eta tentuz beharko duzu ibili; ezin ibilian filosofatu.
Udalera laguntza-eske idatzi eta erantzun antologikoa jaso nuen, gordeta daukat: “no creo que sean cacas de perro, eso tiene que ser algún indigente que remueve las basuras de los contenedores”. Ezin ukatu kontainerretako zaborra ere espaloian egoten ohi dela, baina Udaleko argiturria itxuraz oraindik ez da ohartu bilbotarrok duda barik, eta gainerako euskaldunek igual ere bai, ondo dakigula txakur-kaka eta betiko zaborra bereizten. Hasiera hartan, huts egin zidan Udalak.
Etsita baina adorez, mikropolitikari lotu nintzaion, gerra psikologikoa iskilu: egunero hasi nintzen Udalera gure espaloiko gorozkien argazkiak bidaltzen.
Behin Vitoria-Gasteiz kalea utzita, Cantalojasetik Deustu arte ia ez duzu txakur-kakarik ez bestelakorik aurkituko. Gorteetan, Fleming plazan eta Iturrizan, ez. Agian baten bat Elkanon, bost minutuan desagerraraziko dutena. Baina Rodriguez Arias, Errekalde Zumardia, Eliptikoa, Kale Nagusia, Maximo Agirre, Doña Casilda, Zubiarte, Deustuko zubia… kongitorik ere ez. Auzo horietan PNVk irabazten du (orain dela zenbait urte, batzuetan PPk). Gure auzoan, berriz, Podemosek edo Bilduk. Zeren, Bilboko kaleetako txakur-kakaren distribuzioa ezagutuz gero, ezin baitzara ezkerrekoa ez izan eta, hala ere, kontzientzia aratz, ondo lo egin.
Errudun sentiaraziko al zuten nire argazkiek Udaleko arduraduna? Ezinegon eta kezka itzel pairagaitza eragin akaso, durduza eta dardara? Edo hauteskundeak datozelako izango ote da?
Kontua da, notizia da, duela aste pare batez geroztik, Vitoria-Gasteiz kalean gero eta urriagoak direla txakur-mokordoak. Primeran. Topa dagigun eta bakean bizi gaitezen betiko.
Hauteskunde-kanpainari ekarpena
Galdera ttiki bere. Karlotaren ahaidea, horrela esan beharra dago, eta bestea brakizefaloak al ziren?
Ez nekike xuxen erraiten Karlotaren ahaidea eta bertzea brakizefaloak direnetz, baina Karlota bera bai, Cavalier King Charles spaniel arrazakoa baita.
“Sexua hirian” telesaileko Charlottek horrelako bat dauka, haren omenez jarriko zioten noski “Karlota”.
Hara! “Ostia hi idatzi behar nian”, baina bestea xuxenagoa begitandu zait. Zergatik ez, filosofo handi bat izan daiteke aditua zakurren morfologian, ez naiz ni hori ukatuko dudana. Baina hominodoen morfologian eta hizkeran maingu ikusten deraukot.
Giri me la pela: Espainiako Akademia Edo: termino coloquial para referiese a los turistas, fundamentalmente del norte de Europa. No.Mis abuelos y bisabuelos llamaban giris a Los españoles, que vienen Los giris, Los giristinos de Maria Cristina. Espainoles al fin y al cabo. Y en la cueva de Los Giristinos de Urbasa Los enterraban. Los despeñaban. Giri, espainol zerria, ez turista, atzerritarra bai, baina ez iparraldekoa prezeski.