ustelkeria

Batzuetan badirudi ustelkeria Ebrotik beherako kontu bat dela, baina ez. Jende askok ikusten du “El Intermedio” Hego Euskal Herrian, eta “pertsona informatua” delakoaren sentsazioarekin geratu. Nafar jendartearen zati handi batek ustelkeria etxeko kontua dela barneratu du, Kontuz! bezalako taldeen lan itzelari esker. Baina EAE-n badirudi ezetz, etxekoek egindako lapurretak albiste izan arren ez dira sozializatzen, eta zerrenda aski polita da: Hiriko, Alonsotegi, Arabako EAJ…

Interviu aldizkari espainiarrak argitara eman duen albistean dioenaren arabera, Ertzaintzako 157 bururi justifikaziorik gabeko gastuak ordaindu zitzaizkien. Ondorengoa Ane Urkolak Argia aldizkarian egindako idatzia da:

“Eusko Jaurlaritza murrizketa ugari egiten ari den garai hauetan, EAEko poliziaren goi-karguei gastuak ordaindu dizkiete inolako kontrolik gabe”

Hainbat gastu ordaindu dizkiete erreportajean ikus daitezkeen dokumentuek egiaztatzen dutenez: justifikatu gabeko kilometroak, ibilbideetatik kanpoko bidesariak, kamisetetan eta zapatiletan gastatutako dirua, besteak beste.

Lanera joateko ibilbideetan 0,29 euro ordaintzen diete kilometro bakoitzeko. Ikerketak, ordea, irregulartasunak salatu ditu. Arabako buru batek, esate baterako, ez ditu bidesarien ticketak entregatu, eta bidaiengatik 10.000 euro kobratu ditu urtero.

Otorduei dagozkien neurriz gaineko ordainketak ere agerian utzi ditu erreportajeak. Ertzaintzek 21 euro gasta ditzakete gehienez bazkari edo afarietan. Erreportajean ikus daitezkeen faktura guztietan 21 euro ordaindu dituzte eguneko menuak. Nolanahi ere, jatetxe horietako menuak 10-15 euro artean balio dute, inolaz ere ez 21.

…

Ikerketa martxan Bilboko auzitegian

Ertzaintza-Fepolen Sindikatu Profesionalak egin zuen salaketa. Juan Carlos Sáenz sindikatuko idazkariak adierazi duenez, “ohartu ginen indemnizazio gehienak ez zizkiotela Ogasunari aitortzen, eta susmoak piztu zizkigun horrek”.

Jose Maria Eguia Baltellas Bilboko auzitegiko epailea aztertzen ari da txosten hori, Ertzaintzaren barnean prebarikazioa, dokumentuen faltsutzea eta iruzur fiskala egin dituzten erabakitzeko.

Ikerketaren protagonistak 157 ertzain buru dira eta bakoitzari 40.000 euroko isuna jar diezaiekete. Txosten horren arabera, horietako batzuk 20.000 euro ere kobratu dituzte dietetan, eta Kontu Auzitegia ere hori aztertzen ari da.

Irabazi duten dirua –20.000 euroko ustezko gainsoldatak urtean– ez diote deklaratuari Estatuari, ez eta Gizarte Segurantzari ere.

Orain arteko auziperatu bakarra Miren Karmele Arias da, Ertzaintzaren Giza Baliabideetako burua, eta ondasun publikoak bidegabe erabiltzea egotzi diote.

ustelkeria