EHZ Nomada

EHZ Nomada –

Orain bi hamarkada luze sortua, musika jaialditzarretan aitzindaria dugu Euskal Herria Zuzenean gurean, baita eredugarria ere, hastapenetatik izan duen helburu eta kudeaketari dagokionez, auzolanean eratu izan baita.

Aurten, gogoeta sakon bat egin du EHZ elkarteak, eta hiru fasetan diagnostiko bat egin du, “publiko ezberdinen beharrei, lurraldeari eta laguntzaileei egokitzeko”; Euskal Herria Zuzenean berrasmatzeko. Eta EHZ Nomada izan da emaitza, formatu berezia hartu baitu aurtengo festibalak.

.

Aurtengoa, festibal ibiltaria

“2018. urtea, urte berezia izan da Euskal Herria Zuzenean elkartearentzat, transizio urte bat. Horre-tarako, gure ekain bukaerako asteburuak formatu berezi bat ere hartuko du. Lekorneko zelaietatik, ipar Euskal Herriko xoko ezberdinetara eginen du jauzia. Izan ere, festibal ibiltaria izanen dugu aurtengoan: hiru data, hiru leku eta betiko egitarau oparo eta anitza“.

.

Ekainak 29 ostirala, Baigorriko Plaza Xokon:

Hiru egunei hasiera emateko, Baigorrin ematen dizuegu hitz ordua, aniztasun artistikoak jorratuko dituen gaualdi polit batetara. Hala nola, bi antzerkiren artean, bata Etxepare Lizeoko ikasleek emanik eta bestea Huts Teatroaren “Hozkailua” antzezlana, dantza ere izanen dugu ikusgai Kukai konpainiarekin eta bere “Gelajauziak” ikusgarriarekin. Ondotik, Doctor Mephisto taldearen kobre, kantu eta gitarraren blues/soul notek inarrosiko dituzte bazterrak.

.

Ekainak 30 larunbata, Baionan:

EHZ NomadaEgun osoko egitaraua. Goizetik arratsaldera Baionako karrikak animatuak izanen dira bertako ostatu eta Magnéto, MamiTxula, Patxoki eta Zizpa Gaztetxea elkarteekin elkarlanean. Dantza estilo desberdinak ikusten ahalko dira, baita poteo baten bidez ere, ostatu eta leku ezberdinetan animazioak izanen dira: txaranga, argazki erakusketa, musika talde, dantza ikusgarri, Dr Troll magoa eta zirkoa.

Horrez gain, Euskal Herrian eta gure mugetatik at ditugun gaien hausnarketa momentuak ere proposatuak izanen dira eztabaida guneari esker, batez ere feminismoaz (gune ubela ere presente izanen da), errefuxiatuen harreraz, Euskal Herriko gatazkaz, edo altxatzen diren kolektibo edota autogestio guneetaz.

Gaualdia “Mousserolles” harresietan iraganen da, kontzertuekin. Afro-folk estiloan Kolinga bikotea, Baionako Le bal du samedi soir DJ kolektiboa, Donostiatik etorritako Pelax, Yassassin taldearen rock indartsua baita Casey rap kantari engaiatua.

.

Uztailak 1 igandea, Itsasuko Atharrin:

Egun goxoa adin guziendako eskaintzarekin. Goizean Atx Teatroa, Bilboko antzerki konpainia jinen zaigu Itsasuko gaztetxera, “Bihotz Salataria” antzezlanaren proposatzera. Ondotik Atharrin Arberoako txarangak giroa berotuko du Euskal Herriko Laborantza Ganbararen zikiro mitikoa aitzin. Zikiro hau, beti ere etxe-ekoizpenekin, tokiko kalitatezko mozkinekin eta KLI-K txarangak mementoan emanen duen giro paregabearekin burutuko da (tokiak lekuan berean goizeko 10.30etatik goiti). Ondoan eta arratsaldean zehar haurren xoko bat pentsatua da puzgarriekin eta horrez gain, Elirale konpaniaren “Bihotz2” dantza ikusgarria eta Chicken Street zirko konpanien “Poilu” ikusgarriak izanen dira ere.

Gaualdia eta asteburua ongi bukatzeko Foisis Jaunak taldeak, 80 hamarkadako Itoiz taldearen kan-tuak oroitaraziko dizkigu. Azkenik, denen umore on eta parte hartzearekin Goxoki gaztetxeak bere ateak idekiko dizkigu.

Erran gabe doa, deslokalizazio hauek, abiagune berriak ideki dituela eta aurten ere, gazte zoin ez hain gazteen arteko harremanak sustatzeko, eskaintza kultural zabal bat balorizatu nahi izan dugu-la. Beti ere bertako eta bestelako laguntzailegoarekin elkarlanean oinarrituz.

Horretarako, 2018. urteko EHZ izanen da gure asmakuntza berrien sorgin zelaia.

.

EHZ Nomada
Baigorri, baiona, EHZ, Euskal Herria Zuzenean, festibal ibiltaria, Itsasu

Utzi erantzuna

Zure e-posta helbidea ez da argitaratuko. Beharrezko eremuak * markatuta daude