Beste katastrofea Mayotte uhartean, Indiako Ozeanoan, Madagaskar ondoan, gertatu da. Bai, gaurko zutabea mapa batekin irakurri beharko da. Chido deituriko zikloiak jo du bete-betean Mayotte, hondamendia handia da, eta oraindik ez dakite zenbat jende hil den bertan, ehunka agian. Katastrofe natural-naturala, zer egingo diogu, eta abar. Baina apur bat aztertuz gero, konturatu naiz Mayotte (Maoré, bertako hizkuntzan) Frantzia dela (kolonialismoaren eta deskolonizazio ezaren gauza bitxi horiek), are gehiago Frantziako departamendu bat, gure Pirinio Atlantikoak bezalakoa, eta, beraz, Europako Batasuna, are gehiago Europako Batasuneko Eskualde Ultraperiferikoetako bat, Kanariak bezalakoa. Mayotte Frantziako departamendurik txiroena da, (eta deforestatuena beste harribitxien artean), populazioaren % 83a pobrezia-atalasetik behera dago, txaboletan bizi da, infraetxeetan, orain esaten den bezala. Albisteen arabera Chido zikloiak txabola guzti-guztiak suntsitu ditu. Katastrofea, beraz, ez da uste bezain naturala izan, katastrofe naturalak ez baitira inoiz natural-naturalak. Katastrofea baino lehen jendearen egoera katastrofikoa zen.

Mayottekoak frantziarrak dira, beraz, europarrak, baina ez dakit nahikoa frantziar eta nahikoa europar diren kontu batzuetarako, ikusiko dugu.

Kertx, Mayotte, urrutiko bi leku gu gure arazotxoekin aritzen garen bitartean: transferentziak, Madrilgo epaitegiak, Gabonetako erosketak eta nahigabeak. Ezer berrik ez, iaz bezala, datorren urtean bezala.

Kertx Mayotte