Pernan Goñi ilustratzaileak karikaturak Zumalakarregi Museoan –

•  Zumalakarregi museoko “Carliscaturas” erakusketaren egitaraua itxiko duen tailerra Pernan Goñiren eskutik izango da
• Tailerra datorren hilaren 19an arratsaldeko 16:30tan ospatuko da

Zumalakarregi Museoak, Lizarrako Karlismoaren museoarekin elkarlanean, “Carliscaturas: Umorea lubaki gisa” aldi baterako erakusketa zabaldu zuen pasa den maiatzaren 22an. Erakusketaren oinarria Cesar Oroz ilustratzaileak Karlismoaren Museorako prestatutako XIX. mendeko mugimendu honi egindako begirada satirikoa da. Karlistaldiak eta umorea lotzen dituen erakusketa hau egungo ikuspegi satirikotik egindako karikatura batzuen bidez hurbiltzen da garai horretako historiara. Erakusketak Cesar Orozen lana erakusteaz gain, museoaren bildumako XIX. mendeko prentsa satirikoaren bildumaren zati bat ere erakusten du.

Hilabete hauetan, Zumalakarregi Museoak hainbat jarduera egin ditu erakusketaren gaiarekin lotuta eta publiko ezberdinei zuzendua: Cesar Orozekin solasaldia, “Karikaturatzen” udalekuen eskaintza, “Prentsa satirikoa XIX. mendean” solasaldia Mikel Alberdiren eskutik eta “Karikaturen sekretuak aurkitzen” familia tailerra. Karikaturak izanik erakusketa honetako protagonistak, Zumalakarregi museoak Carliscaturasen programazioa amaitu nahi du Pernan Goñi ilustratzailearekin elkarlanean. Goñik tailerra dinamizatuko du, publiko gazte eta heldu bati karikaturak egiten irakasteko.

Horrela, museoak tailer ludiko eta umoretsu baten bidez agurtuko du Carliscaturasen programazioa, Cesar Orozek erakusketa sortu zuenean zuen hasierako asmoari leial jokatuz.

“Karikaturak egiten Pernan Goñirekin” tailerrak 3 €-ko kostua du pertsonako eta beharrezkoa da izena ematea mzumalakarregi@gipuzkoa.eus korreo helbidera.

Pernan Goñi ilustratzaileak karikaturak egiten irakatsiko du Zumalakarregi Museoan