Apirileko aipagarrienak –

2024ko apirilean zehar herritarrek Behatokira bidalitako hizkuntza eskubideen urraketen lagin bat, lorpenak eta zoriontzeak jaso ditugu ondorengo zerrendan. Zuk ere intzidentzia bat bidali nahi badiguzu, erabili Euskararen Telefonoa.

URRAKETAK:

» EHUren Giza Zientzien Unibertsitate Titulua soilik gaztelaniaz egiteko aukera dagoela salatu dute ikasleek.

» Kanboko Arnaga Etxeko museoko informazioa eta webgunea ezin dira euskaraz kontsultatu.

» Nafarroako hainbat udalek ez dute euskara kontuan hartu, ezta merezimendu gisa ere, apirileko deialdi publikoetan.

» Osatekek egindako egonkortze deialdietako azterketetan informazio guztia, azalpenak zein oharrak gaztelania hutsean eman ziren.

» Euskal Herriko Itzulia dela eta, Kanboko herriko etxeak euskarari ez diola tokirik eman salatu dute.

» Zangozako Udaleko alkatetzak ez du onartu herritar batek idatzitako prozedura euskaraz egoteagatik.

» Nafarroako Eskubide Sozialetako Departamentuak antolatutako jardunaldiak gaztelania hutsean dira.

» Eusko Jaurlaritzak sistema eragilea osotasunean euskaraz ezarri gabe duela salatu dute.

» Lanbide Heziketan modulu batzuk gaztelaniaz egiteko aukera baino ez dagoela salatu dute.

» Nafarroako 012 zerbitzutik gaztelania hutsean bidaltzen zaizkie herritarrei mezuak.

» EAEko erakunde publikoen webgune ezberdinetan oraindik gaztelaniazko mezuak agertzen zaizkie hainbatetan erabiltzaileei.

» EAEko hauteskunde prozesuan hainbat herritarrek gutunak gaztelania hutsean jaso zituzten.

» Antsoaingo Udaleko lan deialdiak euskararen ezagutza kontuan hartu gabe egin direla salatu dute.

» Durangoko Udalaren adimendun erosketa armairu berriak gaztelaniaz, frantsesez eta ingelesez konfiguratuak daude, baina ez euskaraz.

» Nafarroako ospitaleetako irakurketa txokoetako jarraibideak gaztelania hutsean daude.

» Hainbat erakundek ohar, webgune zein bestelako euskarrietan euskarazko mezu traketsak erabili dituzte.

» Lizarrako Udaleko kultura teknikari eta administrari lanpostuei euskararen ezagutza nahitaezkoa kendu diete plantilla organikoan.

» Ostalaritzako hainbat negoziotan euskarazko arreta eskaini arren, informazioa, tiketak, dokumentuak, eta abar gaztelania hutsean dituzte.

» Nafarroako Gobernuko Kultura, Kirol eta Turismo Departamentuko lan-poltsa eratzeko deialdian ez da euskararen ezagutza kontuan hartzen.

» Metal Enpresen Bizkaiko Federazioak ikastetxeentzat antolatutako programan euskararen presentzia azalekoa soilik izan zela salatu dute.

» Euskal Herri osoko hainbat gasolindegitan oraindik mezuak gaztelania edo frantses hutsean agertzen direla salatu dute.

» Baionako aparkalekuetako gailuek euskara hautatzeko aukera ematen duten arren, tiketak frantsesez ateratzen dira.

ZORIONTZEAK:

» Gasteizko Zurrupa tabernari, kanpoan jarritako menua euskaraz dagoelako.

» Algortako KIZE POKE jatetxeari, zuzeneko arreta zein telefono bidezkoa euskaraz eskaintzeagatik.

» Gironako Futbol Klubari, beraien zelaiko sarreran ongi-etorri mezua euskaraz ere ezartzeagatik.

» Algortako TRIKU tabernari, egunero euskaraz egin ahal izateagatik eta informazio guztia euskaraz izateagatik.

LORPENAK:

» Oronak berriz txertatu du euskara Nafarroako igogailuetako pegatinetan.

» Vital Fundaziotik udalei helarazitako euskarazko mezu traketsak zuzendu dituzte.

» Kontsumobideko webgunean datuen babeserako mezua euskaraz ezarri dute.

» Itziarko zerbitzugunearen emakida duen enpresak maiatzean ezarriko ditu kartel eta seinaleak euskaraz.

Apirileko aipagarrienak