EAEn ez al gaude ba oraindik Maltzagako bidean?
EAEn ez al gaude ba oraindik Maltzagako bidean? –
Joan den igandeko hauteskundeen ondoren ez diot oraindik inori entzun eskatzen EAJ eta EHBilduren arteko akordio orokorra herri hau gobernatzeko, herri hau eraikitzeko bidean.
Araban, Bizkaian eta Gipuzkoan EAJ eta EHBildu izan gara alde handiz bi indar bozkatuenak.
- Araban EAJk 15 eserleku, EHBilduk 14. Guztira 29, 51tik (% 56,9). (PSE+PP+Voxek: 19 (% 37,3); Elkarrekin: 3)
- Bizkaian EAJk 23 eserleku, EHBilduk 15. Guztira 38, 51tik (% 74,5). (PSE+PP: 11 (% 21,6); Elkarrekin: 2)
- Gipuzkoan EHBilduk 22 eserleku, EAJk 17. Guztira 39, 51tik (% 76,5). (PSE+PP: 10 (% 19,6); Elkarrekin: 2)
- Gasteizen EHBilduk 7 zinegotzi, EAJk 6. Guztira 13, 27tik (% 48,1). (PSE+PP: 12 (% 44,4); Elkarrekin: 2)
- Bilbon EAJk 12 zinegotzi, EHBilduk 6. Guztira 18, 29tik (% 62,1). (PSE+PP: 9 (% 31,0); Elkarrekin: 2)
- Donostian EAJk 9 zinegotzi, EHBilduk 8. Guztira 17, 27tik (% 63,0). (PSE+PP: 8 (% 29,6); Elkarrekin: 2)
Beldur eszenikoa ez, paniko eszenikoa diogu, diote gure bi indar abertzaleek elkarrekin gobernatzeari gehiengo absolutuan denean (edo ia Gasteizen). Noski, garbi dago elkarrekin gobernatuta ere ezingo ditugula oraingoz gauzatu gure proiektu nazional maximalistak, gure etsai Espainiak (eta Frantziak) indartsuegi dirudite momentuan. Noski, ezingo ditugu gure helburu sozialak ehuneko ehunean gauzatu. Ez dira berdinak EAJren eta EHBilduren ereduak. Baina ez al dugu Maltzagarainoko bidea hobeto ebakiko elkarrekin, elkarren kontra baino? Ez al dugu hobeto lagunduko herri hau Maltzagarainoko bidean elkarrekin eraikitzen, PSE Espainia zale eta euskaldunon aurkakoarekin baino? Gauza gara halako aukerak garatzeko Nafarroa Garaian edo Iparraldean (eskerrak jainkoei!), amore emanez behar denean, eta elkarren indarrak baliatuz aurrera bideetan, beti jakinik gainera besteentzat ere gobernatu behar dela -kasuan Espainia zaleentzat ere-. Gauza gara akordioak gauzatzeko ere PSOE eta besterekin bakoitza bere aldetik. EAEn gure artean, ez. Gerra gure artean! Etsai okerragorik ez EAJrentzat EHBildu baino. Etsai okerragorik ez EHBildurentzat EAJ baino. Madrilen (eta Parisen) orduan eta pozago. Elkarrekin ados jartzen bagara, errazegi ezagutuko dira gure ahuleziak? Ikasiko ahal dugu inoiz! Elkar lana, mesedez, euskaldunon alde, Euskal Herriaren alde!
EAEn ez al gaude ba oraindik Maltzagako bidean?
Artikulu hau asuntzio batetik eraikita dago. Hau da, aipatutako alderdiok alderdi abertzaleak direla. Ene ustez gehiegi asumitzea da.
Hobe da gerra zibilea sustatzen jarraitzea gure artean, eta bitartean akordioak egiten garbi direnekin Espainia zaleak…
‘gerra zibila’
Zuzenketa ustezkoa, ez da entelegatzen. Espainiar urrina dario, Uf!
EH Bildu eta EAJ gauza bakarrerako elkartzen dira, PSOEko gobernuari Espainiako gobernagarritasuna bermatzeko. Penagarria benetan.
Eta, zure ustez, Bittor, zein da bi alderdi horiek batuta joatea eragozten dabilena?
Biek dute erantzukizun maila berbera? Gipuzkoan PPren babesarekin aginduko duen EAJ, eta Arabar Errioxan EAJri botoak eskaini dizkion EHBildu maila berean irudikatzen dituzu lankidetza amestu horren aurka?
Zure jarrera ekidistante hori ez dut ulertzen. Beno, egiari zor, bai, ulertzen dut. Baina ez zait zintzoa iruditzen.
Jabetuko zara. Nik ez dut sartu nahi errudunenak markatzearen lehian. Ez zait iruditzen hori denik elkarlana bultzatzeko bidea… Nik nahi nuke denon artean lortu dezagun bi alderdi horiek behingoz nahikoa presio izan dezaten bere gainean elkarrekiko lan garaia abiatzeko…, gure Euskal Herri honen mesedean… Ez da ekidistantzia. Da helburuak garbi hartzea… Zein da helburua? Gure arteko gerra sustatzea? Hori da gure etsaiaren helburua… Eta gurea? Zurea?
Bat, txikian bada ere prest dago urratsak emateko. Besteak ez du deus ere jakin nahi, ez txikian, ez handian.
Eta zu, “biei” presio egiten.
Egiak onartu: EAJ abertzaleen arteko edozein elkarlan, txikiena bada ere, boikoteatzen dabil. EHBilduk gaur gaurkoz ez du EAJrekin aliantza nazionala bilatzen, ez du nahi, argi dut hori, baina gutxienez udal mailan unionistak baztertzeko EAJri babesa emateko prest zegoen.
EAJ, ordea, prest dago espainolen botoak jasotzeko, edo are, espainolei botoak emateko (Gasteiz), EHBildu baztertzeko helburu hutsarekin.
Bittor, ekidistantziak etxean. Presio abertzalea egitera, Sabin Etxeara.
Zer egingo diogu, ezker abertzaletik kanpoko abertzaleen zurztasun politikoa ebidentea da. Eta, benetan, penaz diot hori.
Zein gaiztoak diren beti besteak… Hain gaiztoak, non ondo zuritu genezakeen guk egindako guztia… Bitartean alkate espainolzalea Gasteizen, alkate espainolzalea Iruñean… Gaiztoak besteak… Galtzaile gu denok… Noiz arte? Nahikoa da esan dezagun arte…
Eta EAEko gobernu erdia espainolzaleen esku, Gipuzkoako gobernu erdia ere bai, Donostiakoa ere bai…, beren politika antieuskaldunak garatzen… Gu lasai bitartean…
Hara Bittor, zure ereduak, den-denak, EAJren erabakiak dira:
Nor dago agintean Donostian PSErekin? EAJ.
Nork agindu du Gipuzkoan PSErekin? EAJk.
Nork eman dizkio PSEri botoak Gasteizen? EAJk.
Nork egin die uko EHBilduren botoei (dohain emanak) PPren alkatetza ahalbidetuz Labastidan? EAJk.
Nork hautsi du autogobernu lantaldean erabakitzeko eskubidearen aldeko akordioa, “kontsentsu zabalagoen” (erran nahi baita, espainiarzaleen adostasunaren) bila? EAJk.
Nork sartuko du PP agintean Gipuzkoan? EAJk.
Nork onartu ditu PPren botoak Durango, Kuartangon, Zigoitian…? EAJk.
Eta zu, EAJ eta EHBildu maila berean jartzen, fronte abertzalea eraikitzeko ezintasunaren ardurak banatzean.
Eta ez da hooliganismoa, besteena leporatzea eta norberarena zuritzea. EHBilduk Txibite babesten badu Nafarroan, kritikatuko dut, hemen bertan EHBilduren beste gauza asko kritikatu ditudan bezala (EAJk ere babestuko duen Txibite).
Eta bai, galtzaileak denok gara. Baina ekidistantzia merkerik ez gero.
Iruñeko alkate UPNkoaz ere esan zenezake zeoze… Nolanahi nire nahian kontua da nola bultzatu, sustatu, behartu genezakeen lankidetza EAJ eta EHBilduren artean Euskal Herri euskaldunago eta indartuago baten alde independentzia helburu… Eta hori da nik eskatzen dudana, bultzatu nahi dudana, gaiztoenak nor garen eztabaidatzen ibili ordean eta hoberenak beti gu garela aldarrikatzeko. Nola bultzatu, sustatu, behartu genezakeen lankidetza EAJ eta EHBilduren artean Euskal Herri euskaldunago eta indartuago baten alde independentzia helburu… zure ustez? Edo zuk ez duzu hori nahi? Zer nahi duzu zuk? EAJk eta EHBilduk bakoitzak bere orain arteko politika egiten jarraitu dezaten? EAJko gehiengo batek behingoz EHBilduren politika onartu dezan? EHBilduko gutxiengo batek behingoz EAJren politika onartu dezan? Edo bien arteko akordioak burutu ditzaten Maltzaga bitartean? Hobe da EAJk segi dezan PSOErekin akordioak egiten bere aldetik? EHBilduk segi dezan bere aldetik PSOErekin akordioak egiten, ‘ezeren truke’, Karmelo Landak bere ZuZeuko azken artikuluan salatu gisa (‘Naziogintza eta politika Euskal Herrian’, inork iruzkindu gabeko artikulua, bide batez)? Ez dakit zuk ere zer irizten ote diozun Landaren artikuluari… Niri serioa behintzat iruditzen zait kontua… Nola egingo dugu aurrera?
Iruñeko alkatearen hautaketan zer esan behar dut? EHbilduk PSN bozkatu behar zuen? EHBilduk laugarren indarra zen Geroa Bai babestu behar zuen? Gasteizen egin zuen hori Gorka Urtaranekin, ikusi da gerorako emaitza, EAJk PSEri eman dio bozka. Benetan nahi diozu Iruñeko udaleko afera EHBilduri egotzi? Zein da zure analisia Iruñean?
Nik zer nahi dudan? Ez engainatzea. EAJ ez dago ez Maltzagarako bidean, ez Eibarrekoan. EAJ eta UPNren arteko diferentzia bakarra euskara da. Eta nahi nuke behingoz EAJko abertzaleek salatzea euren alderdia ez dela abertzalea.
Baina hemen geure buruari gezurra esaten badiogu, eta EAJ, espainol eta unionista guztiekin elkarlanean dabilen alderdi hori, abertzalez janzten badugu, analisia okerreko oinarriekin egiten dugu. Erregionalismoa ez da independentismoa. EAJ erregionalista da. Kantabriako muga lehenago ireki zuen Nafarroakoa baino. Urkulluk esana: XXI mendean independentziak ez du zentzurik.
“Abertzaleak”, bai noski…
Hau da nahiago duzu EHBildu PSOErekin eta Sumarrekin-edo, EAJrekin baino… Nahiago duzu Espainia ezkertiar bat, Euskal Herria ezkertiar bat abertzaleagoa baino… Ze EAJkoak badira abertzalexeago PSOE edo Sumarrekoak baino… Bitartean prest egon behar dugu amore emateko PSOE edota Sumarrekoekin gure herriaren nortasuna indartzeko ahaleginean, baina ez EAJrekin nahiz eta gure herriaren nortasuna indartzeko jardun?
Diozu “EAJ ez dago[ela] ez Maltzagarako bidean, ez Eibarrekoan”. Eta arrazoi duzu. Hori da nik eskatzen diodana EAJri euskaldunon izenean, eta baita EHBilduri ere. Zuk?
Iruñean berriz hobe UPNko alkatea Geroa Baiko Koldo Martinez euskaltzalea baino, eta Asiron alkate orde hasiera batean, PSN ere prest zegoenean ‘erdibide’ horretarako? Niri ez zait oso irensgarria egiten EHBildure jarrera Iruñeko udalean, azkenean UPNko alkatearen mesede… Zuri bai?
Eta diozu. “EAJ eta UPNren arteko diferentzia bakarra euskara da”. Eta ez da gutxi, diot nik…, baina gobernantza ereduak alderatuz, zuk zinez uste duzu UPNren kudeaketa Nafarroa Garaian, edo PPkoa Gasteizen eta Araban, Alfonso, Maroto eta abarrekin, edo Espainian Aznarrekin, Raxoirekin, parekagarria dela EAJk Gipuzkoan, Bizkaian, EAEn, Gasteizko hirian bultzatu duen garapen ereduarekin…? Ez dago itsu okerragorik ikusi nahi ez duena baino, eta gainera bere itsutasuna aldarrikatzen duena eredu.
EAJren eta EHBilduren ereduak ez direla berdinak, noski… Baina usteko nuke EAEko eta Euskal Herriko biztanleria oro har hurbilago ote dagoen EAJk garatzen duen ereduarekin EHBilduk aldarrikatzen duenetik baino… Nahiz nik ere nahiagoko nukeen behintzat ustelkeria areago kontrolatuko lukeen eredu bat…
Bittor, esnatu zaitez behingoz: PSOErekin agintzen dabilena, eta hala daramazki hamarkadak, EAJ da, ez EHBildu.
Txibiterekin gobernuan azken lau urteetan, euskararen aurkako neurri eta guzti, Geroa Bai ibili da, EAJ.
Gezurrik ez esan: zuk nahi duzuna da EHBilduk karta zuria ematea EAJri, bai ala bai, EAJk agindu dezan PSOEren beharrik gabe. Zilegi da hori nahi izatea, baina hori ez da lankidetza. Hori nagusikeria da.
Eta azken hauteskundeetan ikusi denez, hego Euskal Herrian EAJ eta EHBilduren artean, azken honek boz gehiago atera ditu. EAE beste kontu bat da. Ez nahastu gauzak.
EHBilduren aldetik EAJrekin lankidetza egon denean, autogobernu ponentzia adibidez, lankidetza apurtu, emandako hitza jan, adostasun abertzaleak bigundu, eta PSOE eta PPren besoetara jo duena EAJ da.
Portzierto. Iriartek Gipuzkoan agintzeko akordio zabala proposatu zuen (nik nahiago nuen akordio porposamen mugatua, PSE eta Podemos gabe, baina tira). Aurpegira bota zion EAJk proposamena, eta PSErekin zuen akordioa hobetsi zuten, horretarako PP behar zutela jakitun izan arren.
Izan zintzoa. Proposatzen duzuna ez da “Maltzagaraino elkarrekin”, proposatzen duzuna da EAJk nahi duen guztietan EHBilduk “amen” egitea.
Eskerrik asko niri argitzeagatik nik zer nahi dudan. Behar nuen halako aztirik. Ez dakidana oraindik oso ondo da zuk zer nahi duzun gaur eguneko alderdien indarrak indar, gure Euskal Herriaren erikitzea indartzeko… Eta jakin nahi nuke ere zer pentsatzen duzun / duzuen Karmelo Landaren ‘beldurren’ aurrean. Nola egingo dugu aurrera?
Ez nuen inondik inora zuk zer pentsatzen duzun zuri argitzeko batere asmorik. Zure idatziaren helburua zein den beste irakurleei argi uztea baizik. Zuk argi duzu zer pentsatzen duzun. Esan ordea, ez duzu batere argi esaten pentsatzen duzuna.
Aurrera nola egingo dugun? EAJ erori arte jai dugu. EAJ independentista dela pentsatzen dugun bitartean, jai dugu. EAJ alderdi abertzaletzaz dugun artea, jai dugu.
Nola egin aurrera? EAJ desagerrarazita.
Agian EHBilduri gauza berbera gertatuko zaio etorkizunean, instituzioetan goxo kolokatzen denean. PSErekin gobernatzea planteatzen duenean. Eta orduan EHBildu da desagerrarazi beharko dena.
Baina hori gaur gaurkoz EAJri gertatu zaio, oraindik ez EHBilduri, eta abertzaleek EAJri legitimitatea ematen dioten bitartean, hemen ez dugu zer eginik.
EHBildurekin gustura ez dauden abertzaleek dute hemen zer egina. Sortu euskal alderdi abertzale bat, eskuindarra, edo zentro liberalekoa, edo nahi duzuena.
Baina EAJ sostengatzea eta abertzale izatea ez dira bateragarriak 2023an.
Ulertzen dut nostalgia, eta Alderdia Alderdia dela, baina Unai Rementeria edota Beatriz Artolazabalen alderdia babesteak ez du zentzurik batere abertzale zintzo batentzat.
Ezker abertzaletik kanpoko abertzaleen zurztasuna. Horo konpondu arte, jai dugu. Maltzagara ez gara iritsiko EAJrekin.
Zurekin ere ez, agidanean, edo zu bezala ari direnekin… Orduan ez gara Maltzagara iritsiko! Good! Kulpa, hori bai, besteak! Ze helburua nonbait EAJ desagerraraztea da… Gu beti gureen alde. Bejoandeigula! Mesedez…!
Helburua ez da EAJ ere elkarlanera erakartzea, behartzea. Ondo gabiltza. Hori bai, zintzo jakinda zein dire gure etsaiak. Bejoandigula!
Nola erakarriko edo behartuko zenuke EAJ nahi ez duen independentzia prozesu batera, Bittor?
Autogobernu ponentzian gertatutakoaren ostean, zein da EAJ erakartzeko modua?
Azaldu hori nola egiten den.
Bitartean, EAJ PPren babesarekin agintzen.
Nik independentzia lortu arte behintzat (kimerikoa? -une historiko egokia aprobetxatu beharko, eta hori prestatu euskaltzale guztion artean-), nahi nuke elkarlana bultzatu herri honen euskal nortasuna bultzatu nahi dugun indarron artean, eta ez nortasun espainola edota frantsesa. Eta bide horretan bultzatu, eta eskatu eta exijitu elkarlana hala EHBilduri nola EAJri… EAJ badakigu non dagoen eta bidea prestatu beharko dugu EHBildurekin elkarlanera bildu dadin, eta ez indar espainolistenera… Ez dakidana da une honetan non dagoen EHBildu, edo norantz doan (berriro Karmelo Landa…). Ze badirudi bere helburu nagusia dela EAJk baina indar handiagoa lortzea hauteskundeetan, EAJ azpiratuz (agian ‘desagerraraziz’ zuk zenioen gisa). Eta hori, EAJ behartzeko politika euskaltzaleagoak eta sozialdemokratagoak egin ditzan, ala bere burua saltzeko -eta ez EAJk-, indar espainolistei (berriro Karmelo Landa…), Catalunyan ERCk ere hartutako bide errukigarrian? Ni elkarlana bultzatu, eskatu eta exijitzearen alde, politika ahalik eta euskaltzaleenak eta sozialdemokratenak bultzatzeko, euskal nortasuna ahalik eta sendoen eraikitzearen alde… Zu? EAJrekin ez. Norekin orduan? Lasai eta kulpak besteei botatzen EHBilduk, edo zure lerrokoek, erabateko hegemonia lortu dezaten arte gure gizartean? Bejoandeigula!
P.S. Bitartean badakit psikologoa behar dezadanean nora jo nire nahi ezkutukoak zein ditudan argitu diezadan…
Azaldu duzu nahi duzuna: elkarlana sustatu. Hala diozu: “EAJ badakigu non dagoen eta bidea prestatu beharko dugu EHBildurekin elkarlanera bildu dadin, eta ez indar espainolistenera”
Azal zaidazu, gogorik baduzu, zein den bidea horretarako. Zein neurri hartu behar ditu? Ze diskurtso erabili behar du EHBilduk?
“Elkarlana sustatu”. Oso polita. Ados. Baina nola? Zer eskatzen diozu egin dezala EHBilduri, eta zer EAJri?
Sakodnu pittin, bat, ez geratu “elkarlana sustatu”, “bidea prestatu euskal nortasuna ahalik eta sendoen eraikitzearen alde” eta abar horietan.
Mintza zaitez argi, zer eskatzen diezu alderidei egin dezaten? Adibidez, Gipuzkoako Aldundian. Zer egin behar luke EHBilduk, zer EAJk batzar nagusietan.
Zein da zure proposamena?
Ez naiz ni gauza orain politika programa bat zehazteko indar abertzaleen batasun baterako. Eskatu, exijitu, behartu nahi dudana da bi indar abertzale horiek iritsi daitezen elakrrekin beren arteko erdibideko programa hori zehaztera, eta beste abertzale guztiok batu gaitezen hala EAJri nola EHBilduri eskatzera, exijitzera, behartzera elkarlan hori. Nik nire ahotsa altxatzen dut horretarako, eta gustatuko litzaidake gehiagok ere altxatzea. Gero eta gehiagok. Zuk ere.
Horrela pozik, oso pozik, irakurri dut gaur goizean Naziogintza Taldeak atzo hemen ZuZeun bertan argitaratutako “Etxetik kanpo ere, agenda nazionala lehenetsi” artikulua. Besteak beste hala dioena tarte batean: “Guk ezker abertzaleari zein EAJ-ri plus bat eskatzen diegu: gure agenda nazionala Madrilen ozen aldarrikatzea eta defendatzea. Eta horrekin batera gure eskubide nazionalak Madrilen defendatzeko orduan, elkarrekin lan egitea, euskal nazioaren mesedetan (espainiarrek, ezkerrekoak izan ala eskuinekoak izan, “estatu-gaietan” egiten duten modu berean).” Horixe eskatzen diet biei Euskal Herrian ere, bat zein beste izan bestea baino gehiago edo gutxiago, bien artean garelako askoz indar sendoagoa biok elkarri gerra eginez baino… Gure arteko gerra hori sustatzeak, elkarlanaren ordez, nori egiten dio mesede? Ez gure Euskal Herriari?
Zuk zer nahiago duzu, azaldu ezinezkoa dela elkarlana, ala eskatu badela garaia elkarlan hori txukun bideratzeko? Zer iruditzen zaizu Naziogintza Taldearen iritzia?
Nik nahi dudana da lurrera jaistea, eta “exijitu, elkarlana behartu” kontzeptuetatik zer ulertu behar den azaltzea.
Ikusi dugu EAJk lortu duela Gipuzkoako Aldundia PPren babesarekin, EHBilduk akordio zabala proposatu zuenean. Ikusi dugu EAJ EHBilduren babesa zuen bere hautagaia kentzen Bastidan PPk lor dezan alkatetza.
Nola behartzen da elkarlana egoera horretan? Zer egin behar dugu? Zer nahi duzu nik egitea? Horiek ahaztu eta EAJ eta EHBilduren ardura berbera dela esatea? EHBilduk EAJri eman behar dio botoa, bai ala bai? Hori nahi duzu?
Zer egin behar da “elkarlana sustatzeko”? Mesedez, argi hitz egin. Ziur nago baduzula buruan zer egin beharko litzatekeen…
Beharbada bi alderdiak batera esertzera behartu egoitza itxian eta altxatzen utzi ez akordioa etsi arte? Ni horren alde. Ez dut inondik zuriru nahi, justifikatu nahi elkarlanaren ezina bestearen gaiztotasuna aitzakia. Zu ere horretan jarriko zara, EAJren gaiztotasuna eta akordioaren ezina aldarrikatzen aritu ordez? Eskertuko nizuke…, eskertuko genizuke, genizueke… Baina ez dut batere garbi ikusten elkarrizketa honek irtenbiderik ba ote duen… Akordioa ez da posible, akordiorik nahi ez duenarekin.. Bi alderdiak behartu beharko genituzke akordioa nahi izatera. Nola? Nik behintzat, hori eskatuz… Eta bitartean bi alderdiak salatuz… Zu, ez?
Hara Bittor, zerorrek esan duzu: “Akordioa ez da posible, akordiorik nahi ez duenarekin”. Eta akordioak errefusatzen ibili dena azken aldian ez da EHBildu.
EHBilduk akordioak proposatu dizkio EAJri (autogobernu ponentzian, udaletan, aldundian…). EAJren erantzuna, akordioak pikutara bidaltzea (autogobernu ponentzian, udaletan, aldundian), eta PSE eta PPren besoetara joatea.
Egoera horretan “biak eseriarazi” behar ditugu esatea, bietako baten jarrera zuritzea da.
Eta gu pozik esertzen ez direlako? Zu pozik? Aterako gara biok pankarta batekin eskatuz bi alderdiak ere behingoz elkarrekin eseri daitezen datozen urteetarako euskal bide bateratu bat adostu dezaten arte? Ala konformatuko gara esanez EAJ honekin edo EHBildu honekin ez dagoela elkarbiderik egiterik? Hobe norberak arrazoia izan, denok zulora joango bagara ere? Hobe arrazoi gutxixeago izatea bakoitzak, eta bide bat elkarrekin abiatu… Ni horretan… Eta nahi nuke antzeko ahotsek indar ageriagoa erakutsiko bagenu, elkarri zaplaztekoko aritu ordez…
zaplaztekoka
Ni pozik ez. Espainia eta Frantziaren mendeko segitzen dugun bitartean ez behintzat.
Baina ez nabil ameskerietan. Eta ez dut nire burua engainatzen, EAJrekin independentzia lortuko dugula amesten, argi baitut alderdi horren egiturek, Bizkai Buru Batzarrek, iturginek… ez dutela deus ere jakin nahi independentziaz. Eta akordiorik nahi ez duenarekin, zuk esan bezala, ez da posible.
Gaur egungo EAJ, Ortuzar, Urkullu, Artolazabal, eta Rementeriaren EAJ oztopo da independentzia lortzeko. Eta harritua nago abertzale batek nola eman diezaioken botoa Gipuzkoa, zer eta Gipuzkoa, PPren babesarekin gobernatuko duen alderdi bati.
Eta egoera horretan, ez atzera eta ez aurrera gaude. EHBildu ez da ausartzen EAJ gabe prozesu independentista serio bat abiarazten, eta EAJk bai baina ez jokoan segitzen du. Alderdi eta Aberri egunetan “Gora Euskadi Askatuta” eta “Independentzia” oihukatzen, baina gero PPren babesarekin gobernatzen. Baina hori bai, abertzale dira. Hala diote…
Bai, horixe da. Akordiorik nahi ez duenak / nahi ez duzuenok beti izango dute / duzue aitzakiarik akordioa ezin egin ahal izateko. Gure kalte. Ondo ari zara / zarete.
Gaiztoak, besteak. Beti.
PPrekin eta PSErekin dantzan dabilena ez da EHBildu. Hori onartuko duzu, ezta?
Nik ez dut esan gaiztoak direnik EAJkoak. Esan dut ez direla independentista.
Eta oraindik zain naukazu ea zer demontre proposatzen duzun. Nola egin EAJ nahi ez duen prozesu independentistara erakartzeko galderari ez diozu erantzun. Soilik “esertzera behartu” eta halako esanahi gabeko wishful thinking ariketak dakartzazu.
Niri esaten badidazu nola lortu EAJ independentziara lotzea, saiatuko naiz nire aletxoa jartzen. Zuk bota duzu proposamena, zuk zehaztu bidea.
Baina, nago, hemen esan nahi ez den egia ezkutua dela “EHBilduk EAJ babestu behar du, bai ala bai, hala EAJk PPrekin eta PSErekin adostu behar izan ez dezan”. Baina zertarako babestu behar den EAJ argi utzi gabe. EAJk egin dezala nahi duena, eta horretarako EHBilduk sostenga dezala, espainolen sostengua behar izan ez dezan. Maltzagara joateko, edo Bilbora, edo Madrilera. EAJk nahi duena.
Gaiztoak gaizto, eta noski, bakoitzak berea hoberen, zer da gaur egungo egoeran abertzaleok nahi, eskatu, exijitu, lortu behar duguna gure lurralde(et)an, eta eskuarki EAEn? EAJ-PSE gobernu bat? EHBildu-PSE gobernu bat? Ala EAJ-EHBildu gobernu bat, nik eskatu, exijitu, lortu nahi izan dudana nire artikulutxarekin? Nik garbi eskatu dut hasieratik, ulertu nahi duenarentzat. Zuk zein gobernu mota eskatu, exijitu, lortu nahi duzu?
Zer da EAJ ‘independentziara lotzea’? EAJk Pazkoa igandeetan ere aldarrikatzen du independentzia. Baina zer da gaur egun EHBildu ‘independentziara lotzea’? Pazkoa igande eta astelehenean aldarrikatzea independentzia? Bere helburu nagusia (bakarra?) izatea EAJri irabaztea, EAJ desagerraraztea? Ikasi beharko dugu noizbait hobe dugula elkarrekin abiatzea, elkarri muturrekoka aritzea baino, ala? Edo hobeto joango zaigu indar Espainia zaleekin eskutik helduta… Ala abiatu zen zorioneko Euskadiko Ezkerra ere eta ikusi genuen nola amaitu zuen… Niri beldur ematen dit EHBildu ere ez ote den aldapa horretan labaintzen hasia, eta ez nuke nahi, baina agidanean ez naiz ni bakarra beldur hori duena…
EAJ-PSE? EHBildu-PSE? Ala EAJ-EHBildu? Zer behar dugu?
EAJk hautatu du PSE, EHBilduren aurretik. EAJ 40 urte daramatza PSE hautatzen. EAJ irabazi ditu hauteskundeak 40 urtez. Berak markatu du bidea, hala nahi izan duelako. Lizarra-Garazi ostetik are nabariago. Begira nola diren gauzak, Patxilok Jaurlaritza “lapurtu” ostean ere, haiekin batu dela berriro EAJ.
Baina bale, ardura konpartitua dute: akordioa proposatu duen Iriartek, eta akordioa errefusatu zuen Mendozak. PPkoa alkate ez izateko botoak eskaini zituen EHBilduk, eta PPkoa alkate izateko bere hautagaiak kendu zituen EAJk.
Abertzaleak omen dira… Baina Kantabria Nafarroaren aurretik.
EAJrekin beraz ezer ez. Gaiztoegiak dira. Norekin orduan? PSErekin? Gehiketarekin? Ze EHBildurekin bakarrik nekez goaz inora, munduko zintzoenak balitez ere, ala? Gora gu ta gutarrak!
Bittor, bigarrengoz: ez dut inongo momentutan esan EAJkoak gaiztoak direnik. Esan dut ez direla independentista, eta nahiago dutela espainiarzaleekin adostu, EHBildurekin baino.
Eta PSErekin dagoena, hain zuzen, EAJ da. Zer den begibistakoa ikusi nahi ez izatea.
Ohar historiko banaka batzuk. 1951n, J.A. Agirrek negar egin omen zuen jakin zuenean AEBak Francoren erregimenarekin negoziatzen ari zirela. Iparramerikarren alde “zerbitzuekin” egindako lan zaila eta zintzoa errekara zihoan. Britainiarrek eta estatubatuarrek ez zuten Francoren diktadura uzkailiko; aitzitik, sendotu egingo zuten (1953an, lehen hitzarmena Francok AEBekin). Justu, urte hartantxe erbesteko Eusko Jaurlaritzatik dimisioa eman zuen Telesforo Monzonek bi arrazoirengatik. Orain bi arrazoi horietako bat interesatzen zaigu: Eusko Jaurlaritza espainiar errepublikaren patuari lotuegi zekusalako. Monzonen argudiabidea hauxe zen: espainiar errepublikak gerra galdu du. Hilotz bat da. Zergatik jarraitu behar dugu hari estekatua? 1936ko urrian, jeneral matxinoen estatu-kolpeari aurre egiteko gu prest egonik, autonomi estatutua onartu zigulako Errepublikak? 1953an gaude; Errepublika hil zen.
1956an, Pariseko Lehen Mundu Batzarrean, espainiar errepublikari leial jarraitzeko korronteak irabazi zuen (J.A. Agirre, Leizaola eta beste burukideena; ez T. Monzonena), eta autonomi estatutua defendatzearena. Demokrazia espainolaren alde eta autonomi estatutua lortzea helburu. 1956an.
1964an, ETA jada sortua, baina artean borroka armatuari ekin gabea, nahiz ekintzatxo batzuk eginak zituzten, Txillardegiri eta Monzon anaiei (Telesforo eta Isidro), besteak beste, Julio Jauregi jelkideak Miarritzen bazkari bat egitea proposatu zien, Txillardegik “Euskal Herria helburu” liburuan kontatzen duenez (215-216 orr.). Julio Jauregi, baina, ez zen agertu berak antolatutako bazkarira. Zergatik? EAJko burukideek ez ziotelako baimendu.
1964an, artean ETAk borroka armatua abiatu gabe zuela, jelkideek ez zuten etakideekin bazkari bat ere egin nahi kidetasun eta desberdintasun politikoez hitz egiteko. Zergatik? Etakideak, orduan, abertzaleak ez zirelako? Ez. Jelkideak ez zirelako abertzale independentistak. Trantsizio ondoko bere ibilbide politiko guztia ikusita, eta esan liteke Sabino Arana hil zenetik, edo hark alderdi “vascoespañol”-a sortzeko tentazioa izan zuenetik, alderdi demokrata espainol autonomista-federalista bat izan dela eta halaxe dela egun ere EAJ. Boto-emaile independentistak badituela…hori besterik da. EHBildu koalizioko Alternatiba ere independentista ez den bezala (autodeterminazioaren aldekoa bai). Egunen batean alda daitekeela? Inork ezin du esan ezetz; baina egungo egunean horrelakorik pentsatzeko zantzurik ez dagoela, bai, esan liteke.
Euskararena politikarekin oso lotua dago, baina beste kontu bat da. Hemen, politikaz ari gara. Egoera hori izanik…
(Hizkuntzarena poolitikarekin lotua… ez dakit, baina paralelismo “harrigarriak” aurkitu izan ditut beti… ez baitugu hizkuntzaren alorrean aitzina egiten, politikan egiten ez duguno, eta bai baitirudi ezin dugula politikoki aitzina egin hizkuntzarena burutan ateratzen ez duguno…
Eta, hala ere, paralelismoak haratago ez ote doazen nago, jarrera desberdinetan, jokamoldeetan…)
Eskerrak beste norbait sartu den eztabaidan, ze gu bion artekoa, Manex, gehiago da beste ezer baino gorren edo itsuen arteko elkarrizketa. GAIZTO hitza nik darabilt bai. Euskaltzaindiaren Hiztegia: gaizto: 1 adj./iz. Zintzotasunik edo ontasunik ez duena. Ik. donge; makur1 2; maltzur. Ba, hori!
Kontua da, niretzako noski, zer eskatu behar diegun abertzaleok EAJri zein EHBilduri. Eta nik elkarlan abertzalea eskatu / exijitu nahi diet biei ere herri honen eraikuntza eta independentzia bidean (inoiz independentzia eskuratu ahalko badugu, bidea ahalik eta hobetoen prestatzen joateko). Ez diet eskatzen / exijitzen ez batari ez besteari INDEPENDENTZIA ORAIN ALDARRIKATZEA, nahiz nik oraintxe sinatuko / bozkatuko nukeen honen alde eta honen alde egingo dudan lan oraintxetik. Eskatzen diedana biei da, EAJri zein EHBilduri, herri euskaldun hau egunean-egunean indartzeko lanean jardutea elkarrekin adostasunean, eta ez daitezen elkarri muturrekoka aritu Espaini zaleen mesedean. Ez dut uste horren zaila denik ulertzen. Ez daukazu aritu beharrik mezuz mezu azaltzen zergatik ezin den lan hori egin EAJrekin, ze beste aldekoek gogoraraziko dizute zergatik ezin den la hori egin EHBildurekin. Nik nahi dut bide horri ekitea, ez arrazoi edukitzea, zergatik ezin zaion bide horri ekin. Eta ezina ekinez egin ohi denez, bihoa nire aletxoa, eta eskaera bere burua (euskal) abertzaletzat dugun guztioi. Euskaltzaindiaren Hiztegia: zintzo: 1 adj. Bertute moralen arabera jokatzen duena. Anton. gaizto.
Nahi nituzke entzun beste aldekoen argudioak zergatik EHBildurekin ezin duten, eta PSErekin bai, aberriaren alde.
Autogobernu ponentziako akordioa hautsi zutenean eman zituzten “argudioak” bezalakoak badira, orduan bai, hasiko naiz zintzotasunik ez dutela esaten.
Nik ez. Ez ditut entzun ere egin nahi zein diren EAJren arrazoiak EHBildurekin ezin elkarlana egin ahal izateko. Eta ez ditut ere entzun nahi EHBilduren arrazoiak EAJrekin elkarlana ezin egin ahal izateko. Nahi dudana da elkarlana egin dezaten fundamentuz biek ere.
EAEn, Iparraldean, Nafarroa Garaian eta Madrilen.
Jarrera hori ezin dut ulertu, Bittor. Infantilismo politikoa da: “nik hau nahi dut, eta kitto! Ez esan zergatik ez den posible”.
Bakoitzak zer dioen jakin, eta diotenaren arabera, argudioak bana-bana desarmatu daitezke.
Bestea erregeei gutuna idaztea da. Eskatzea libre. Groucho Marxek esango zukeen bezala: “eta bi arrautza egosi ere bai”.
“Infantilismo politikoarena” fuertea iruditu zait. Halako deskalifikazio nahiak, agian zerori deskalifikatzen zaitu. Baina abertzaleok nahi izatea, eskatzea, exijitzea, behartzea, alderdi abertzale desberdinen arteko elkarlana ‘infantilismoa’ bada, bejoandeigula abertzaleoi! Hobe espainolekin estu! Mesedez…
Barkatu Bittor, ez zen nire asmoa iraintzea, baina ez nekien nola deskribatu zure azken aurreko iruzkina. Pertsona heldu batek, politikaz ari garela, “ez ditut argudioak entzun nahi, nik hau nahi dut” esatea ez dakit nola deskribatu. Eta, gaizki ulertua ekidite aldera, infantilismoa ez da abertzaleen lankidetza eskatzea, infantilismoa da lankidetza hori eragozten duten argudioak entzun nahi ez izatea.