Dena ondo zihoan, argia piztu den arte (Maialen Lujanbiok)

Euskal Herriko Bertsolari Txapelketa Nagusia dugu aurten, eta finalaurreko lehen itzuliko bigarren saioa izan zen atzo Irunengo Artalekun. Maialen Lujanbio gailendu zen bertan, eta prentsak zein bertsozaleek izugarri goretsi dute bakarka egin zuen lana.

Honela egin zion aurre hernaniarrak kartzelako gaiari: “Dena ondo zihoan, argia piztu den arte”:

 

Trago bat eta beste trago bat,

gure kaletan barrena

(e)ta piztea da alkoholak eta

sexu grinak dakarrena.

Zure etxera nire etxera

betiko gauzak aurrena,

zure logelan sartu gara-eta

hara hemen ondorena.

Argia zegoen itzalita (e)ta

bertan biluztu naiz dena,

(e)ta bat-batean piztu egin da

argi txiki xumeena

nire gerrira begira zaude,

ez naiz uste zenuena.

.

Estali arte izan dugunak

nahiko irri nahiko broma,

ahorik aho pasa dugunak

Gin-tonic barruko horma.

Bular parea zut neukan eta

zuk eman didazu forma,

galtza estuak nerabilzkin arren

ez takoi eta ez gona.

Hau eta hura naiz, hartzen ari naiz

zenbait botika hormona,

gizona eta andrea nauzu,

ez andrea ez gizona.

Nire inon ez egon nahia ote

da zure ezinegona.

.

Gizarte honen estereotipo

(e)ta gizarte honen usteen

tranpan zu ari zara erortzen,

eta hori ez dizut uzten.

Zuk badakizu nola zizelka

eta marraztu gaituzten,

ze inporta du gaur ari bainaiz

zure aurrean biluzten,

eta neroni ni neu naizena

hori bakarrik gorpuzten.

Nire gerripeko zintzilikako

desira ari da puzten,

itzali ezazu argia eta

utzi azalari ikusten.

.

Dena ondo zihoan, argia piztu den arte (Maialen Lujanbiok)