Michael Jackson ez da infernura joango

Michael Jacksonen eskultura. CC-by: Sjors Provoost
Michael Jacksonen eskultura. CC-by: Sjors Provoost

Duela hamahiru egun zendu zen Michael Jackson polemikoa. Ingeleraz, famous esaten zaio ezagun bezain estimatua den pertsonari eta, notorious, fama txarra izategatik ospetsua den horri. Munduko komunikabideen arteko eztabaida piztu egin da: bietatik, zer ote da Michael Jackson?

Aukera edozein dela, polemikoa izan zenik ezin ukatu. Ukan zituen gaixotasunak, egin zituen operazioak, ume eta gaztetxoekin izandako harreman arraroak –Justizia estatubatuarrak errugabetzat jo zuela azpimarratu behar-, eraiki zuen ametsetako jauregia…

Jackson anaietatik gazteenaren bizitzan ezer ere ez da izan ohikoa; eta egin dituen gauza guztietan bera izan da lehena, nagusia. Disko gehien saltzen zituen artista izan gura zuen moduan, diru gehien ematen zuen izarra izan nahi zuela ematen zuen: berdin zitzaion Diana Printzesaren erakundeari 100.000 dolar ematea ospitale bat eraikitzeko ala milioi bateko txekea sinatzea Nelson Mandelaren proiektu solidarioak bultzatzeko.

Diru laguntza zuzenen bitartez izan, zein bere irudia erabiltzea ahalbidetzeagatik izan, 300 milioi dolar eman zituela kalkulatu du The Source aldizkari newyorktarrak. Zifrak, horrela emanda, ez digu ezer adierazten, kopuru batetik gorakoak, lurtarroi, berdin zaigulako 5 edo 15; baina, bere ondareren herena dela esaten badigute, zer? Nabarmen aldatzen da zifra horren esanahia, ezta? Bada, 36 GKEren artean banatu zuen Jacksonek bere jabetzaren %33a. Eta ez hori bakarrik, testamentuan ere, hil ostean GKEek dirua jasoko zutela idatzi zuen. Bera txikia zenean txarto tratatu zuen bere aitarentzat ezer ere lagatzen ez duen testamentu horretan.

Mel Wilsonek, Heal The World fundazioaren presidenteak, zera esan zuen heriotzaren berri izan ostean: “Michaelek solidaritatean sinesten zuen eta mundua aldatzea zuen amets (…). Lur jota gaude inoiz izan den artista solidarioenaren heriotzagatik”.

Ezinezkoa da bere biografia solidarioa artikulu labur batetan sartzea, baina, 2000. urtean, Pop izar eskuzabalenaren Guiness Errekorra jaso izana horren adierazgarritzat jo genezake. Bere ingurukoek ere, artista handiaren urratsak jarraituz, webgune ofizialean fan guztiei dei egiten diete GKEren bati diru laguntzak emateko: “Michaelen benetako jarraitzailea baldin bazara eta bere memoria ohoratu gura baduzu dirua emaiozu berak laguntzen zuen erakunderen bati”. Seguru asko horixe izango zen Jacksonen desioa, eta ez, agian, bart, Los Angelesen, egin dioten show-hileta.

Michael Jacksonek diruz lagundu zituen GKEen zerrenda

  1. AIDS Project L.A.
  2. American Cancer Society
  3. Angel Food
  4. Big Brothers of Greater Los Angeles
  5. BMI Foundation, Inc.
  6. Brotherhood Crusade
  7. Brothman Burn Center
  8. Camp Ronald McDonald
  9. Childhelp U.S.A.
  10. Children’s Institute International
  11. Cities and Schools Scholarship Fund
  12. Community Youth Sports & Arts Foundation
  13. Congressional Black Caucus (CBC)
  14. Dakar Foundation
  15. Dreamstreet Kids
  16. Dreams Come True Charity
  17. Elizabeth Taylor Aids Foundation
  18. Juvenile Diabetes Foundation
  19. Love Match
  20. Make-A-Wish Foundation
  21. Minority Aids Project
  22. Motown Museum
  23. NAACP
  24. National Rainbow Coalition
  25. Rotary Club of Australia
  26. Society of Singers
  27. Starlight Foundation
  28. The Carter Center’s Atlanta Project
  29. The Sickle Cell Research Foundation
  30. Transafrica
  31. United Negro College Fund (UNCF)
  32. United Negro College Fund Ladder’s of Hope
  33. Volunteers of America
  34. Watts Summer Festival
  35. Wish Granting
  36. YMCA – 28th Street/Crenshaw
gke, Michael Jackson, solidaritatea

Utzi erantzuna

Zure e-posta helbidea ez da argitaratuko. Beharrezko eremuak * markatuta daude