Oscar sariek 8 kategoria utzi dituzte galatik kanpo

Akademiak iragarri duenez, zortzi kategoria ez dira zuzenean iragarriko, galaren aurreko uneetan baizik, eta ondoren laburpen bat ikusiko da.

Oscar sarien azken zeremonietako audientzia jaitsierak kezka sortu du. Urtero berritzen saiatzen dira eta forma berriak bilatzen ikusle berriak erakartzeko eta zeudenek telebista ez itzaltzeko. Aurkezlerik gabeko zeremoniak probatu dituzte, musika-emanaldiak, etab. Eta orain azken neurria. Akademiak zeremoniako zortzi sari kentzea erabaki du, eta telebistan emandako gala hasi baino lehen ematea, bizkortzeko eta erritmoa emateko.

Aldaketa polemiko hau Ameriketako Estatu Batuetako hedabideek aurreratu zuten, eta ondoren David Rubin Akademiako presidenteak baieztatu. Kaltetuak honako kategoria hauetan izendatutakoak dira: dokumental onena, muntaketa onena, makillaje eta ile-apainketa onena, ekoizpen-diseinu onena, soinu onena, film labur onena, animaziozko film labur onena eta soinu-banda onena. Funtsezko kategoriak dira eta horiek gutxiesteak ez ditu erreakzio oso positiboak eragin. Muntaketarik, ekoizpen diseinurik, soinu bandarik eta soinurik gabe ez baitago filmik, makillaje eta ile apainketa gabe ez dago pertsonairik eta film labur, animaziozko film eta dokumental gabe ez dago ikus-entzunezko aniztasunik.

Oscar sariek 8 kategoria utzi dituzte galatik kanpo