Behar bada Irlanda ez da Euskadi eta, segurutik, ezta Euskadi ere Irlanda. IRAko Martin McGuinness-ek nekez duen bezalaxe parekorik Euskal Herriko ETAren baitan.

Euskal Herrian ez dago, ez da sekula egon, 1968an burruka armatuari ekin, hogeita hamar urtez buruzagitzari eutsi eta, hilketa-samaldaren ondotik, bake-bideari Martin McGuinness-ek (Derry, 1950-2017) bezain kementsu heldu dionik.

Euskal Herrian ez dago, hiru hamarkada luzean txispaz armaturik jardun ostean, Hezkuntza sailburu izatera heldu eta Kongresuko parlamentari txartelaz jabetu denik.

Are gutxiago, Nafarroako UPN gisako alderdiren batekin elkarlanean gobernua osatu eta lehendakariorde izan denik, edo erregea agurtze aldera eskua luzatu dionik.