Juani askatu!

Juani askatu! –

Palestinara egin nuen lehenengo bidaian Gazako zerrendara sartzeko aukera izan nuen, eta han El-Auda ospitalea bisitatzekoa. Erietxea Jabaliako errefuxiatuen kanpamentuan kokatuta dago, eskualdeko ipar- ekialdean, Israelgo armada okupatzailearen bonbardaketa latzenak pairatu ohi dituen eremuan. Bertan, estreinako bisitaldi hartan, arreta eman zidan X izpien makina batean Eusko Jaurlaritzaren ikurra ikusteak, eta nolabait lasaitu egin ninduen bertatik bertara konprobatzeak gure zergetako apur batzuk sikiera pertsona horien sufrikarioa arintzera iristen direla. Gerora jakin nuen EAEko gobernuak, Israelgo apartheid erregimenarekin harreman adeitsu eta erregularrak dituen horrek, palestinarrentzako nolabaiteko dirulaguntza humanitarioa ere bideratzen duela; eta hori Juani Rishmawi izeneko emakume baten bitartekaritzari esker gertatzen dela.

Juani askatu!

Juana Ruiz Sanchez, Juani Rishmawi ezizenez ezagunagoa, Palestinarekiko elkartasun zirkuluetan, giza eskubideen aldeko ekintzailea da eta 35 urtetik gora dira Palestinan bizi dela Health World Committees osasun-erakundean lanean. Erakundeak komunitate palestinarraren ongizate sanitario eta soziala artatzea du xede, eta Juanik proiektuen koordinatzaile lanak egiten ditu jarduera hori bermatuko duen dirulaguntzak bilduz, gehienbat. Duela bi aste eraman zuten atxilo, kargu zehatzik egotzi gabe.?Gatibu eramateko eman duten argudio bakarra itaunketa egin behar ziotela izan da.

Bahiketa 2021eko apirilaren 13an gertatu zen, Zisjordaniako Beith Sahur herrian, Betleem hiritik oso gertu. Goizaldeko 5.45ean Juaniren familiaren etxean hogei soldadutik gora sartu ziren, gerra armaz hornituta, eta eraman egin zuten. Geroztik preso dute; izan ere, epailearen aurrean hiru agerraldi egindakoan, atxiloketa mugagabe luzatzea erabaki dute, inongo kargu zehatzik leporatu gabe, ustez, itaunketa egin ahal izateko.

Juanirekin batera, HWC erakundeko beste bi lankide ere atxiloketa administratibo erregimenpean daude (babes legalik gabe espetxeratuta eta leporatzen dizkieten balizko karguen berri izan gabe); Tayseer Abu Sharbak, HWC Diruzaintza Departamentuko arduraduna eta Saeed Abbad, duela bi urte arte departamentu bereko arduraduna. Bi lankide hauek martxoaren 8an bahitu zituzten.

Jarduera profesional horrez gain, Juani erreferente bat da Palestinarekiko elkartasunean lanean dihardugun guztiontzat. Hamaika alditan harrera abegikorra egin die Euskal Herritik eta beste hainbat txokotatik iritsitako brigada internazionalistei, eta ezinbesteko gidaritza lana egin digu Zisjordanian eta Gazan zeharreko bidaietan. Gainera, duela urte askotatik Hala Bedi Irratiko albiste-zerbitzuetako ohiko kolaboratzailea ere bada. Urte hauetan  Palestinatik egindako kroniketan, okupaziopeko errealitatearen testigantza eman digu eta ahotsa eman dio herri palestinarraren askatasunerako borrokari.

Atxilotua izan baino egun gutxi batzuk lehenago, Hala Bediko “Uhintifada” saioan salatu zuen bere erakundeak eta hainbat erakunde palestinarrek pairatzen duten jazarpena. Izan ere, indar okupatzailearen autoritatea eta Osloko Akordioen osteko estatusa onartzen ez duten erakunde humanitario eta sozialak okupazio erregimenaren jomugan daude. Eta jazarpen hori Palestinako biztanleen aurkako garbiketa etniko kanpaina baten testuinguruan kokatzen zuen; izan ere, Israelgo erregimenak populazio palestinarraz gain, elkarte-mugimendu edo mugimendu palestinar antolatuaren edozein arrasto desagerrarazi nahi du.

Juani Rishmawi ezinbestekoa izan da Palestinarekiko elkartasun sareak josteko garaian, eta herri palestinarraren borrokaren lekuko eta bozeramaile sutsua da. Hori dela-eta kendu nahi dute paretik apartheid erregimeneko aparatuek. Libre behar dugu. Libre Hala Bediko uhinetan eta Palestinako kaleetan, horixe baita berak maite duen herria eta bere testigantzaz maitarazi diguna.

Juani askatu!
Juani askatu!

BDZ mugimenduko kidea. Israelen aurkako Boikota, Desinbertsioak eta Zigorrak

Utzi erantzuna

Zure e-posta helbidea ez da argitaratuko. Beharrezko eremuak * markatuta daude